୧୦ ଲକ୍ଷ ଟଙ୍କା ବଟି ନେବା ପରେ ନେତାଙ୍କୁ ହତ୍ୟା କଲେ ଅପହର୍ତ୍ତା

ପାଟନା: ବିହାରର ପୁର୍ଣ୍ଣିଆରୁ ଅପହୃତ ଲୋକ ଜନଶକ୍ତି ପାର୍ଟି (ଏଲଜେପି) ନେତା ଅନିଲ ଉରାଓଁଙ୍କ ମୃତଦେହ ରବିବାର ଉଦ୍ଧାର କରାଯାଇଛି। କୃତ୍ୟାନନ୍ଦ ନଗର ଥାନା ଅନ୍ତର୍ଗତ  ଡମ୍ବରାହା ଗ୍ରାମରୁ ପୁଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଗତ ଗୁରୁବାର ଅନିଲଙ୍କୁ ଅପହରଣ କରାଯାଇଥିଲା। ତାଙ୍କୁ ଛାଡ଼ିବା ଲାଗି ଅପହର୍ତ୍ତାମାନେ ୧୦ ଲକ୍ଷ ଟଙ୍କା ମୁଣ୍ଡ ଜାମିନ ରଖିଥିଲେ। କିନ୍ତୁ ଟଙ୍କା ନେବା ପରେ ସେମାନେ ଅନିଲଙ୍କୁ ହତ୍ୟା କରିଛନ୍ତି।

ସୂଚନା ଅନୁସାରେ, ଗତ ୨୯ ତାରିଖରେ ଅନିଲଙ୍କୁ ଅପହରଣ କରାଯାଇଥିବା ନେଇ ପରିବାର ଲୋକଙ୍କ ପକ୍ଷରୁ ଥାନାରେ ଅଭିଯୋଗ କରାଯାଇଥିଲା। କିନ୍ତୁ ପୁଲିସର ଅପାରଗତା ଯୋଗୁ ଅପହର୍ତ୍ତାମାନେ ଅନିଲଙ୍କୁ ହତ୍ୟା କରିଥିବା ପରିବାର ପକ୍ଷରୁ ଅଭିଯୋଗ ହୋଇଛି। ଅନିଲଙ୍କ ପରିବାର ଲୋକେ କହିଛନ୍ତି, ଅପହରଣ ପରେ ଅପହର୍ତ୍ତାମାନେ ୧୦ ଲକ୍ଷ ଟଙ୍କାରେ ଅନିଲଙ୍କ ମୁଣ୍ଡ ଜାମିନ ରଖିଥିଲେ। ପୁଲିସ ଯୋଜନା ଅନୁସାରେ ୧୦ ଲକ୍ଷ ଟଙ୍କା ସହିତ ପରିବାର ଲୋକଙ୍କୁ ନେଇ ଅପହର୍ତ୍ତାମାନଙ୍କୁ ଧରିବା ଲାଗି ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲା। କିନ୍ତୁ ଅପହର୍ତ୍ତାମାନେ ଟଙ୍କା ନେବା ସହିତ ପୁଲିସକୁ ଚକ୍‌ମା ଦେଖାଇ ଖସିଯାଇଥିଲେ। ଏହା ପରେ ଅନିଲଙ୍କୁ ହତ୍ୟା କରି ଡମ୍ବରାହା ଗ୍ରାମରେ ଫିଙ୍ଗି ଚାଲିଯାଇଥିଲେ।

Comments are closed.