ବଜ୍ରପାତରେ ଜଣେ ମୃତ

ହରଭଙ୍ଗା: ବୌଦ୍ଧ ଜିଲା ହରଭଙ୍ଗା ଥାନା ଅର୍ନ୍ତଗତ ଧଳପୁର ଟିକିରାସାହିରେ ରବିବାର ରାତିରେ ବଜ୍ରପାତ ଘଟି  ଶିବ ବେହେରା(୩୮) ନାମକ ଜଣେ ବ୍ୟକ୍ତିଙ୍କ  ମୃତ୍ୟୂ ଘଟିଛି। ଗତକାଲି ରାତିରେ ଶିବ ନିଜ ଘର ପିଣ୍ଡାରେ ବସିଥିବା ସମୟରେ ବଜ୍ରପାତ ଘଟିଥିଲା। ଫଳରେ ଶିବ ଚେତାଶୂନ୍ୟ ହୋଇପଡିଥିଲେ।ତାଙ୍କୁ ମୁମୂର୍ଷୁ ଅବସ୍ଥାରେ ପୁରୁଣାକଟକ ମେଡିକାଲ  ନିଆଯାଇଥିଲା। ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଖବର ପାଇ ସୋମବାର ସକାଳେ ହରଭଙ୍ଗା ପୁଲିସ ପୁରୁଣାକଟକ ମେଡିକାଲରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ  ବୌଦ୍ଧ ପଠାଇଛି। ହରଭଙ୍ଗା ପୁଲିସ ଏକ ଅପମୃତ୍ୟୂ ମାମଲା ରୁଜୁକରି ତଦନ୍ତ ଚଳାଇଛି। ସୂଚନାଯୋଗ୍ୟ, ବାଉଁଶୁଣୀ ବୈଦ୍ୟନାଥପୁର ଅଞ୍ଚଳର ଶିବ ବେହେରା ଧଳପୁର ଟିକିରାସାହିର ଏକା ନାଏକଙ୍କ ଝିଅକୁ  ବିବାହ କରିବା ପରେ ଶ୍ବଶୁର ଘରେ  ଘରଜ୍ୱାଇଁ ହୋଇ ରହୁଥିଲେ। ତାଙ୍କ ମୃତ୍ୟୁ ପରେ ପତ୍ନୀ ସାବିତ୍ରୀ ଏବଂ ତିନି ମାସର ଏକମାତ୍ର ଝିଅ ଅସହାୟ ହୋଇପଡିଛନ୍ତି। ମୃତକଙ୍କ ପରିବାରକୁ ସରକାରୀ ସହାୟତା ଯୋଗାଇଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।

Comments
Loading...