ଖାଦ୍ୟ ସାମଗ୍ରୀ ରଖିବାରେ ସାମାନ୍ୟତମ ଅବହେଳା କଲେ, ସେଥିରେ ପୋକ ଲାଗିଥାନ୍ତି। ଏସବୁ ପୋକ ଦାଉରୁ ରକ୍ଷା ପାଇବା ମଧ୍ୟ ଏତେ ସହଜ ନୁହେଁ। କେତୋଟି ସହଜ ତଥା ସରଳ ଉପାୟ ପାଳନ କରି ରୋଷେଇ ଘରେ ଖାଦ୍ୟ ସାମଗ୍ରୀକୁ ସୁରକ୍ଷିତ ରଖିପାରିବେ।
– ଅଟାକୁ ଏୟାର-ଟାଇଟ୍ ନଚେତ୍ ଷ୍ଟିଲ୍ ଡବାରେ ରଖିବା ଉଚିତ। ଏଥିସହ ଅଟା ରଖିବା ପୂର୍ବରୁ ଡବାରେ ନିମ୍ବ ପତ୍ର ରଖନ୍ତୁ। ନିମ୍ବ ପତ୍ରର ବାସ୍ନାରେ ଅଟାରେ ପୋକ ଲାଗିନଥାନ୍ତି। ନିମ୍ବ ପତ୍ର ନ ମିଳିଲେ, ୬-୭ଟି ତେଜ ପତ୍ର କିମ୍ବା ଗୁଜୁରାତି ୪-୫ଟିକୁ ଭଲରେ ଗୁଣ୍ଡ କରି ଅଟା ଡବାରେ ରଖିଦେବେ। ଏଇ ଉପାୟରେ ଅଟାରେ ଆଦୌ ପୋକ ଲାଗନ୍ତି ନାହିଁ।
– ସୁଜିରେ ମଧ୍ୟ ପୋକ ଶୀଘ୍ର ଲାଗିଯାନ୍ତି। ଫ୍ରିଜ୍ରେ ଖାଲି ସ୍ଥାନ ଥିଲେ ସୁଜି ଡବାକୁ ସେଠାରେ ରଖିପାରିବେ। ମାସମାସ ଧରି ସୁଜି ତାଜା ରହିବ; ନଚେତ୍ ଅନ୍ୟ ଏକ ଉପାୟ ହେଉଛି ସୁଜିକୁ କଡ଼େଇରେ ହାଲକା ଭାଜି ଏକ ଡବାରେ ରଖନ୍ତୁ। ଏହା ସହ ସେଇ ଡବାରେ ଗୁଜୁରାତି ଗୁଣ୍ଡ ପକାଇଦେବେ।
– ମଇଦା, ବେସନରେ ମଧ୍ୟ ଶୀଘ୍ର ପୋକ ଲାଗିଯାନ୍ତି। ସେଥିରୁ ରକ୍ଷା ପାଇବାକୁ ହେଲେ ଏସବୁ ସାମଗ୍ରୀକୁ ଏୟାର୍ ଟାଇଟ୍ ଡବାରେ ରଖିବା ସହ ବଡ଼ ଗୁଜୁରାତି ଓ ତେଜ ପତ୍ର ସମାନ ପରିମାଣରେ ଡବାରେ ରଖିଦେବେ।
– ଚାଉଳରେ ପୋକ ଲାଗିଲେ ବାହାର କରିବା ଖୁବ୍ କଷ୍ଟକର। ଏକ ସହଜ ଉପାୟ ହେଉଛି ପୋଦିନା ପତ୍ର ବିଡ଼ାଏ ନେଇ ତାହାକୁ ଖରାରେ ଶୁଖାଇ ଭଲରେ ଗୁଣ୍ଡ କରିଦେବେ। ଏବେ ସେହି ଗୁଣ୍ଡକୁ ଚାଉଳ ଡବାରେ ପକାଇ ଦିଅନ୍ତୁ। ଦେଖିବେ, ଚାଉଳରେ ଆଦୌ ପୋକ ଲାଗିବେ ନାହିଁ।
– ବୁଟ ଡାଲି ଓ କାବୁଲି ବୁଟରେ ମଧ୍ୟ ଶୀଘ୍ର ପୋକ ହୋଇଥାନ୍ତି। ସେଥିରୁ ରକ୍ଷା ପାଇବା ଲାଗି ଡବାରେ ଖଣ୍ଡ ହଳଦୀ କିମ୍ବା ଶୁଖିଲା ନିମ୍ବ ପତ୍ର ରଖିଲେ ଲାଭ ମିଳିଥାଏ।
Comments are closed.