ଲକ୍ଷ୍ମୀପୁର: କୋରାପୁଟ ଜିଲା କାକିରିଗୁମା ଥାନା ଅନ୍ତର୍ଗତ ବାରିଗୁଡା ଠାରେ ଏକ ହାଇଓ୍ବା ଦୁର୍ଘଟଣାରେ ଜଣେ ବାଇକ ଆରୋହୀଙ୍କର ମୃତ୍ୟୁ ଘଟିଛି। ତେବେ ପରେ ଘଟଣା ସ୍ଥଳରୁ ମୃତ ଦେହକୁ ଲକ୍ଷ୍ମୀପୁର ଶବ ବ୍ୟବଚ୍ଛେଦ ପାଇଁ ନ ପଠାଇ କୋରାପୁଟକୁ ପଠାଇବାକୁ ନେଇ ଉତ୍ତେଜନା ପ୍ରକାଶ ପାଇଥିଲା। ଏପରିକି ଉତ୍ୟକ୍ତ ଲୋକମାନେ କାକିରିଗୁମା-ଦାମନଯୋଡି ରାସ୍ତାକୁ ଅବରୋଧ କରୁଥିବା ବେଳେ ପୋଲିସ ପହଞ୍ଚି ବୁଝାଇବାକୁ ଚେଷ୍ଟା କରି ଲୋକଙ୍କ ଆକ୍ରୋଶର ଶିକାର ହୋଇଥିବା ସୂଚନା ମିଳିଛି।
ସାନ ନେର୍କା ଗ୍ରାମର ଲଳିତ କମାର କୌଣସି କାର୍ଯ୍ୟ ପାଇଁ ଦାମନଯୋଡି ଯାଇ ନିଜ ବାଇକରେ ଫେରୁଥିବା ବେଳେ ବିପରିତ ଦିଗରୁ ଆସୁଥିବା ଏକ ହାଇଓ୍ଵା ଧକ୍କା ଦେଇଥିଲା। ଘଟଣାସ୍ଥଳରେ ହିଁ ଲଳିତ ରକ୍ତାକ୍ତ ଅବସ୍ଥାରେ ପଡିଥିବା ବେଳେ ଖବର ପାଇ କାକିରିଗୁମା ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କର ମୃତ୍ୟୁ ହୋଇଥିବା କହି କୋରାପୁଟକୁ ବ୍ୟବଚ୍ଛେଦ ପାଇଁ ପଠାଇଲା। ଏ ନେଇ ଗ୍ରାମବାସୀ କହିବା ମୁତାବକ କଣ ପାଇଁ ପରିବାର ଲୋକଙ୍କୁ ପୁଲିସ ନଜଣାଇ ଏପରି କି ଲକ୍ଷ୍ମୀପୁର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ମୃତ ଦେହକୁ ବ୍ୟବଚ୍ଛେଦ ପାଇଁ ନ ପଠାଇ ଦୁର୍ଘଟଣା ସ୍ଥାନରୁ ଉଠାଇ କୋରାପୁଟ ପଠାଇ ଥିଲା ବୋଲି ପ୍ରଶ୍ନ କରିଛନ୍ତି। ଏପରିକି ଏହି ଘଟଣାକୁ ନେଇ ଲୋକେ ପୁଲିସ ଉପରେ ଆକ୍ରମଣ କରିଥବା ବିଶ୍ବସ୍ତ ସୂତ୍ରରୁ ଜଣାପଡିଛି। ଏହି ଘଟଣାକୁ ନେଇ ଦାମନଯୋଡି – କାକିରିଗୁମା ରାସ୍ତାକୁ ଉତ୍ତ୍ୟକ୍ତ ଲୋକମାନେ କିଛି ସମୟ ଅବରୋଧ କରିଥିଲେ।
Comments are closed.