ଏସ୍‌ପିଙ୍କୁ ଭେଟି ନ ପାରିବାରୁ ନିଜ ଦେହରେ ନିଆଁ ଲଗାଇଲେ ବିଜେଡ଼ି ନେତ୍ରୀ

ବ୍ରହ୍ମପୁର: ଏସ୍‌ପିଙ୍କୁ ଭେଟି ନ ପାରିବାରୁ ବିଜେଡ଼ି ନେତ୍ରୀ ମିନାକ୍ଷୀ ମିଶ୍ର ଏସ୍‌ପିଙ୍କ କାର୍ଯ୍ୟାଳୟ ସମ୍ମୁଖରେ ଆତ୍ମାହୁତି ଉଦ୍ୟମ କରିଛନ୍ତି। ତାଙ୍କୁ ଗୁରୁତର ଅବସ୍ଥାରେ ଏମକେସିଜି ମେଡିକାଲରେ ଭର୍ତ୍ତି କରାଯାଇଛି। ତାଙ୍କ ଶରୀରର ୪୦ରୁ ଊର୍ଦ୍ଧ୍ବ ଅଂଶ ପୋଡିଯାଇଥିବା ଜଣାପଡ଼ିଛି।

ସୂଚନା ଅନୁସାରେ, ବ୍ରହ୍ମପୁର ପଣ୍ଡା କଲୋନୀର ବିଜେଡ଼ି ନେତ୍ରୀ ମିନାକ୍ଷୀ ମିଶ୍ର ଆଜି(ବୁଧବାର) ମଧ୍ୟାହ୍ନରେ ନିଜ ଅଭିଯୋଗ ଜଣାଇବାକୁ ବ୍ରହ୍ମପୁର ଏସ୍‌ପିଙ୍କୁ ଦେଖା କରିବାକୁ ଯାଇଥିଲେ। ହେଲେ ଏସ୍‌ପି ବ୍ୟସ୍ତ ଥିବାରୁ ମିନାକ୍ଷୀ ଅତିରିକ୍ତ ଏସ୍‌ପିଙ୍କୁ ଦେଖା କରିଥିଲେ। ହେଲେ ଏଥିରେ ସେ ଅସନ୍ତୁଷ୍ଟ ହୋଇ ଏସ୍‌ପିଙ୍କ କାର୍ଯ୍ୟାଳୟ ସମ୍ମୁଖରେ ନିଜ ଦେହରେ କିରୋସିନି ଢାଳି ନିଆଁ ଲଗାଇଦେଇଥିଲେ। ସେଠାରେ ଉପସ୍ଥିତ ପୁଲିସ କର୍ମଚାରୀ ମିନାକ୍ଷୀଙ୍କୁ ଉଦ୍ଧାର କରି ଏମକେସିଜି ମେଡିକାଲରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ବଡ଼ମେଡିକାଲକୁ ସ୍ଥାନାନ୍ତର କରାଯିବ ବୋଲି ଏସପି ପିନାକ ମିଶ୍ର ନିଜ ପ୍ରତିକ୍ରିୟାରେ କହିଛନ୍ତି।

ସୂଚନାଯୋଗ୍ୟ, କିଛିଦିନ ତଳେ ମିନାକ୍ଷୀ ଓ ତାଙ୍କ ପୁଅ ରାଜାକୁ କିଛି ଦୁର୍ବୃତ୍ତ ଖଣ୍ଡାରେ ଆକ୍ରମଣ କରିଥିଲେ। ଏହି ମାମଲାରେ ପୁଲିସ ୫ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ରାଜାକୁ ମଧ୍ୟ ଗିରଫ କରିଥିଲା। ତେବେ ତାଙ୍କ ପୁଅ ରାଜାକୁ ମିଥ୍ୟା ମାମଲାରେ ଫସାଇ ଦିଆଯାଇଛି ବୋଲି ମିନାକ୍ଷୀ ଅଭିଯୋଗ କରିଥିଲେ। ନ୍ୟାୟ ନ ମିଳିଲେ ଅତ୍ମାହୁତି ଦେବେ ବୋଲି ପୁଲିସକୁ ଚେତାବନୀ ଦେଇଥିଲେ।

ଅପର ପକ୍ଷରେ, ସେ ବିଜେଡ଼ି ନେତ୍ରୀ ହୋଇଥିବାରୁ ଏମକେସିଜିରେ ବ୍ରହ୍ମପୁରର ପୂର୍ବତନ ବିଧାୟକ ଓ ବହୁ ବିଜେଡ଼ି ନେତା ଜମା ହୋଇଛନ୍ତି। ଏସ୍‌ପିଙ୍କ ସମେତ ବ୍ରହ୍ମପୁର ଜିଲାର ପୁଲିସ ଅଧିକାରୀମାନେ ଉପସ୍ଥିତ ଅଛନ୍ତି।

Comments
Loading...