ସାଉଦିଆରବରେ ଫସି ରହିଛନ୍ତି ୧୪ ଓଡିଆ ଶ୍ରମିକ: ଫେରାଇ ଆଣିବାକୁ ପ୍ରଶାସନ ପକ୍ଷରୁ ପ୍ରକ୍ରିୟା ଆରମ୍ଭ

0

ଗଞ୍ଜାମ: ସାଉଦିଆରବରେ ନିର୍ୟାତିତ ଅବସ୍ଥାରେ ରହିଥିବା ଗଞ୍ଜାମ ଜିଲାର ବିଭିନ୍ନ ଅଂଚଳର ୧୪ ଜଣ ଶ୍ରମିକଙ୍କୁ ସୁରକ୍ଷିତ ଭାବେ ଫେରାଇ ଆଣିବା ନିମନ୍ତେ ଗଞ୍ଜାମ ଜିଲା ପ୍ରଶାସନ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି । ଜିଲାର ଖଲିକୋଟ, ବେଲଗୁଣ୍ଠା, ସାନଖେମୁଣ୍ଡି, ଧରାକୋଟ, ବେଗୁନିଆପଡ଼ା, ପୁରୁଷୋତ୍ତମପୁର ବ୍ଲକର ବିଭିନ୍ନ ଗ୍ରାମର୧୪ ଜଣ ଶ୍ରମିକ ସେଠାକୁ କାମ କରିବା ପାଇଁ ଦଲାଲ ମାଧ୍ୟମରେ ଯାଇ ଫସିଯାଇଥିବା ମୋବାଇଲ ଭିଡିଓ ମାଧ୍ୟମରେ ବାର୍ତା ପଠାଇଛନ୍ତି । ସେଠାରେ ସେମାନଙ୍କୁ ଚୁକ୍ତି ମୁତାବକ ଦରମା ଓ ଖାଦ୍ୟ ପ୍ରଦାନ ନକରି ଅଧିକ ଖଟଣି ଦିଆଯାଉଛି ବୋଲି ସେମାନେ ଅଭିଯୋଗ କରିଛନ୍ତି । ତାକୁ ଦୃଷ୍ଟିରେ ରଖି ସେମାନଙ୍କୁ ଉଦ୍ଧାର କରିବା ପାଇଁ ପରିବାରବର୍ଗ ଜିଲାପାଳ ବିଜୟ ଅମୃତ କୁଲାଙ୍ଗେଙ୍କୁ ଭେଟି ଗୁହାରି କରିଥିଲେ । ଜିଲାପାଳ ସମସ୍ତ ବିଷୟ ଜାଣିଲା ପରେ ସେମାନଙ୍କୁ ସେଠାରୁ ଫେରାଇ ଆଣିବା ନିମନ୍ତେ ଉଦ୍ୟମ କରାଯିବ ବୋଲି ପରିବାରବର୍ଗଙ୍କୁ ଆଶ୍ୱାସନା ଦେଇଥିଲେ । ୧୪ ଜଣ ଶ୍ରମିକଙ୍କୁ ନିଜ ଅଞ୍ଚଳକୁ ଫେରାଇ ଆଣିବା ଦିଗରେ ପ୍ରଶାସନିକ ପ୍ରକ୍ରିୟା ଆରମ୍ଭ ହୋଇଛି । ଜିଲାପାଳଙ୍କ ନିର୍ଦ୍ଦେଶ କ୍ରମେ ଛତ୍ରପୁର ଜିଲ୍ଲା ଶ୍ରମ ଅଧିକାରୀ ଶିବ ନାରାୟଣ ସାହୁଙ୍କ ପ୍ରତ୍ୟକ୍ଷ ତତ୍ୱାବଧାନରେ ଅତିରିକ୍ତ ଜିଲା ଶ୍ରମ ଅଧିକାରୀ ରବିନ୍ଦ୍ର ତ୍ରିପାଠୀ ଏବଂ ତାଙ୍କ ଟିମ୍ ସାଉଦିଆରବରେ ଫସିଥିବା ଶ୍ରମିକଙ୍କ ଗ୍ରାମକୁ ଯାଇ ସେମାନଙ୍କ ପରିବାରବର୍ଗ ଓ ଗ୍ରାମବାସୀଙ୍କଠାରୁ ତଥ୍ୟ ସଂଗ୍ରହ କରିଛନ୍ତି । ଏହି ସମସ୍ତ ତଥ୍ୟର ଯାଞ୍ଚ କରାଯାଇ ଦିଲ୍ଲୀସ୍ଥିତ ଭାରତୀୟ ଦୂତାବାସକୁ ପଠାଯାଇଥିବା ଶ୍ରମ ବିଭାଗର ଅଧିକାରୀ ସୂଚନା ଦେଇଛନ୍ତି ।

Comments
Loading...