ଜଣଙ୍କୁ କଚାଡି ମାରିଲା ଯଶୋଦା, ମୃତକଙ୍କ ପରିବାରକୁ ୪ ଲକ୍ଷ ଟଙ୍କା କ୍ଷତିପୂରଣ

0

ଅନୁଗୁଳ: ଅନୁଗୋଳ ଜିଲା ସାତକୋଶିଆ ବ୍ୟାଘ୍ର ସଂରକ୍ଷିତ ଅଭୟାରଣ୍ୟ ସତେ ଯେମିତି ରକ୍ତମୁଖା ହେଇଯାଇଛି । ସୁନ୍ଦରୀ ଅପରେସନ ସଫଳ ହେବାର ମାତ୍ର କିଛି ଦିନ ପରେ ଶାତକୋଶିଆ ଅଭୟାରଣ୍ୟରେ କୁମୁକି ହାତୀ ଯଶୋଦା ଆକ୍ରମଣରେ ଜଣଙ୍କର ମୃତ୍ୟୁ ହେଇଛି। ଭୁବନେଶ୍ୱର ଚନ୍ଦକା ଅଞ୍ଚଳରୁ ବାଘୁଣୀକୁ କାବୁ କରିବାପାଇଁ ଆସିଥିବା କୁମୁକି ହାତୀ ଯଶୋଦା ଆଜି ପୁରୁଣାକୋର୍ଟ ମାଟିଆ ସାହି ଗ୍ରାମର ଜଣେ ଯୁବକଙ୍କୁ କଚାଡି ମାରିଛି ।ମୃତକ ଜଣଙ୍କ ହେଲେ ସ୍ଥାନୀୟ ଅଞ୍ଚଳର ସୁଧୀର ପ୍ରଧାନ । ଗୁରୁବାର ଦିନ ପ୍ରାୟ ୧୨ଟା ବେଳେ ପୁରୁଣାକୋର୍ଟ ରେଞ୍ଜ ଅଫିସ ପରିସରରେ ରହୁଥିବା ଯଶୋଦାକୁ କଦଳୀ ଗଛ ଖାଇବାକୁ ଦେବା ସମୟରେ ସୁଧୀର ପ୍ରଧାନକୁ ଟାଣିନେଇ ହାତୀ ଯଶୋଦା କଚାଡି ମାରିଥିବା ଜଣାପଡିଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ସାମାନ୍ୟ ଉତ୍ତେଜନା ପ୍ରକାଶ ପାଇଛି । କ୍ଷତିପୂରଣ ବାବଦରେ ମୃତକ ପରିବାରକୁ ୪ ଲକ୍ଷ ଟଙ୍କା ଅନୁକମ୍ପା ରାଶି ଘୋଷଣା ହୋଇଥିବା ବେଳେ ତତ୍କାଳ ୪୦ ହଜାର ଟଙ୍କା ସାହାଯ୍ୟ ଦିଆଯାଇଛି । ଏନେଇ ଅନୁଗୋଳ ଡିଏଫଓ ସୂଚନା ଦେଇଛନ୍ତି।

ସୂଚନାଯୋଗ୍ୟ, ସାତକୋଶିଆରେ ଆତଙ୍କ  ବାଘୁଣୀ ‘ସୁନ୍ଦରୀ’ଙ୍କୁ ଟ୍ରାଙ୍କୁଲାଇଜ କରିବା ପାଇଁ ବିଶେଷଜ୍ଞ ଟିମ ବିଫଳ ହେବା ପରେ ଶେଷରେ ଯଶୋଦାର ସହାୟତା ନିଆଯାଇଥିଲା । ଯଶୋଦା ପିଠି ଉପରେ ବସି  ସୁନ୍ଦରୀକୁ ଟ୍ରାଙ୍କୁଲାଇଜ କରିବା ପାଇଁ ଯଶୋଦାକୁ ଚନ୍ଦକାରୁ ସାତକୋଶିଆ ନିଆଯାଇଥିଲା ।

Comments
Loading...