କେସିଆରଙ୍କ ପୁଅ-ବୋହୂଙ୍କ ଆୟ ବଢ଼ିଛି ୨୫୦ ପ୍ରତିଶତ

0

ହାଇଦ୍ରାବାଦ: ତେଲେଙ୍ଗାନାର ପୂର୍ବତନ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କ ପୁଅ କେ ଟି ରାମାରାଓଙ୍କ ଆୟ ପରିମାଣ ଗତ ଚାରିବର୍ଷ ଭିତରେ ପ୍ରାୟ ୨୫୦ ପ୍ରତିଶତ ବଢ଼ିଛି। ସେହିପରି ତାଙ୍କ ବୋହୂଙ୍କ ଆୟରେ ଚାରିବର୍ଷରେ ୨୦ଗୁଣା ବୃଦ୍ଧି ହୋଇଛି। ଆସନ୍ତା ଡିସେମ୍ବର ୭ ତାରିଖରେ ଅନୁଷ୍ଠିତ ହେବାକୁ ଥିବା ତେଲେଙ୍ଗାନା ବିଧାନସଭା ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲ ବେଳେ ଦେଇଥିବା ସତ୍ୟପାଠରୁ ଏହି ତଥ୍ୟ ମିଳିଛି।
କେସିଆର ତେଲେଙ୍ଗାନା ମୁଖ୍ୟମନ୍ତ୍ରୀ ହେବା ପୂର୍ବରୁ ୨୦୧୪ରେ ତାଙ୍କ ପୁଅ କେଟିଆରଙ୍କ ଆୟ ପରିମାଣ ଥିଲା ୨୯ ଲକ୍ଷ ଟଙ୍କା। ଏବେ ତାଙ୍କ ଆୟ ପରିମାଣ ବୃଦ୍ଧି ପାଇ ୭୪ ଲକ୍ଷ ଟଙ୍କାରେ ପହଞ୍ଚିଛି। କେଟିଆରଙ୍କ ପତ୍ନୀ ଶୈମିଲା କାଲଭାକୁନ୍ତଳାଙ୍କ ଆୟ ପରିମାଣ ୨୦୧୪ରେ ୨୧ ଲକ୍ଷ ଟଙ୍କାରୁ ୪ କୋଟି ଟଙ୍କାରେ ପହଞ୍ଚିଛି। କେଟିଆରଙ୍କ ମୋଟ ସମ୍ପତ୍ତି ପରିମାଣ ୪.୯୩ କୋଟି ଟଙ୍କା ଥିବା ବେଳେ ତାଙ୍କ ପତ୍ନୀଙ୍କ ସମ୍ପତ୍ତି ପରିମାଣ ହେଉଛି ୩୬.୬୮ କୋଟି ଟଙ୍କା। କେଟିଆରଙ୍କ ଝିଅ ଆଲେଖ୍ୟାଙ୍କ ନାମରେ ବ୍ୟାଙ୍କରେ ୧୯.୫୦ ଲକ୍ଷ ଟଙ୍କା ଜମା ଅଛି। ତେଲେଙ୍ଗନା ସରକାରରେ ଶିଳ୍ପ, ସୂଚନା ପ୍ରଯୁକ୍ତି ବିଦ୍ୟା, ପୌର ପ୍ରଶାସନ ପରି ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ରହିଥିବା କେଟିଆର ନିଜକୁ କୃଷକ ବୋଲି ସତ୍ୟପାଠରେ ଉଲ୍ଳେଖ କରିଥିବା ବେଳେ ତାଙ୍କ ପତ୍ନୀଙ୍କ ପେସା ହେଉଛି ବ୍ୟବସାୟ। ପତିପତ୍ନୀଙ୍କ ନାମର ବିଭିନ୍ନ ସ୍ଥାନରେ ୧୦ କୋଟି ଟଙ୍କାର ଜମି ଓ ଗୋଟିଏ କାର ରହିଛି।

Leave A Reply