ବରାହ ମୁଣ୍ଡଗଣ୍ଡି ଅଲଗା କଲେ ଦୁର୍ବୁତ୍ତ: ନେଇ ଗଲେ ମୁଣ୍ଡ, ଫୋପାଡ଼ି ଦେଲେ ଗଣ୍ଡି

ଖୁନ୍ତାମାଲ : ଲଇକେରା ବ୍ଳକ ଜାମମାଲ ଗ୍ରାମପଞ୍ଚାୟତର ଠୁରଲୁପାଏନ ଜଙ୍ଗଲରେ ଗୋଟିଏ ବରାହକୁ ମାରି କେହି ଦୁର୍ବୁର୍ତ୍ତ ତା’ର ମୁଣ୍ଡଗଣ୍ଡି ଅଲଗା କରି ଦେଇଛନ୍ତି। ଏହାପରେ ଦୁର୍ବୁତ୍ତମାନେ ବରାହ ମୁଣ୍ଡକୁ ନେଇ ଫେରାର ହୋଇଯାଇଥିଲେ। ଏବେ ଘଟଣାସ୍ଥଳରେ ବରାହ ଗଣ୍ଡି ପଡ଼ିଥିବା ଦେଖିବାକୁ ମିଳିଛି।
ଘଟଣାଟି ୩/୪ ଦିନ ପୂର୍ବରୁ ଘଟିଥିବା ଅନୁମାନ କରାଯାଉଛି। ଏହି ବରହାକୁ ଦୁର୍ବୁତ୍ତମାନେ ବନ୍ଧୁକରେ ମାରିଥିବା ଓ ପରେ ତା’ର ଦାନ୍ତ ଏବଂ ମୁଣ୍ଡକୁ ନେଇଯାଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସ୍ଥାନୀୟ ବନ ସୁରକ୍ଷା ସମିତିର ଏନିମେଟର ମିତ୍ରଭାନୁ ବୁଦୁଲା ବାଗଡ଼ିହି ରେଞ୍ଜ୍‌ର ବନ କର୍ମଚାରୀଙ୍କୁ ଏ ଘଟଣା ସମ୍ପର୍କରେ ଜଣାଇଲେ। ଖବର ପାଇ ରେଞ୍ଜର ବ୍ରଜମୋହନ ପଟ୍ଟନାୟକ ଓ ଫରେଷ୍ଟର ଗିରିଶ କୁମାର ଦୋରା ସଦଳବଳେ ଘଟଣା ସ୍ଥଳରେ ପହଞ୍ଚି ସରଜମିନ ତଦନ୍ତ କରିଛନ୍ତି। ମୃତ ବରାହର ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି। ବ୍ୟବଚ୍ଛେଦ ରିପୋର୍ଟ ଆସିବାପରେ ତାହାକୁ ଆଧାର କରି ଆଇନ ଅନୁଯାୟୀ ତଦନ୍ତ କରାଯିବ ବୋଲି ବନବିଭାଗ ପକ୍ଷରୁ କୁହାଯାଇଛି।
ଅନ୍ୟପଟେ ହାତୀ ଦାନ୍ତ ତସ୍କରି କଲାଭଳି ବର୍ତ୍ତମାନ ବରାହ ଦାନ୍ତକୁ ଏକ ପ୍ରକାର ତସ୍କରି କରାଯାଉଥିବା ଅଭିଯୋଗ ହେଉଛି। ବନ ବିଭାଗ ପକ୍ଷରୁ ଘଟଣାର ଉଚ୍ଚସ୍ତରୀୟ ତଦନ୍ତ କରି ଦୋଷୀ ବିରୁଦ୍ଧରେ ଦୃଢ଼ କାର୍ୟ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହେଉଛି।

Comments
Loading...