ନୂଆଦିଲ୍ଲୀ : ବଲିଉଡ଼ ଅଭିନେତା ସଞ୍ଜୟ ଦତ୍ତ ଖୁବଶୀଘ୍ର ତାଙ୍କ ଅଭିନୀତ ଚଳଚ୍ଚିତ୍ର ‘ଖଳନାୟକ’ର ସିକ୍ୱେଲ୍ ନିର୍ମାଣ କରିବାକୁ ଯାଉଛନ୍ତି। ୧୯୯୩ ମସିହାରେ ପରଦାକୁ ଆସିଥିବା ଏହି ଚଳଚ୍ଚିତ୍ରର ସିକ୍ୱେଲରେ ନାୟକ ଭୂମିକା ପାଇଁ ଟାଇଗର୍ ଶ୍ରଫଙ୍କୁ ଚୟନ କରାଯାଇଥିବା ଜଣାପଡ଼ିଛି। ନିକଟରେ ଲଞ୍ଚ୍ କରିଥିବା ନିଜର ନୂଆ ପ୍ରଡକ୍ସନ ହାଉସ ‘ସଞ୍ଜୟ ଏସ୍ ଦତ୍ତ ପ୍ରଡକ୍ସନ୍ସ’ ଅଧୀନରେ ସଞ୍ଜୟ ଏହି ଚଳଚ୍ଚିତ୍ରଟି ନିର୍ମାଣ କରିବେ। ତାଙ୍କର ଏହି ପ୍ରଡକ୍ସନ ହାଉସର ପ୍ରଥମ ଚଳଚ୍ଚିତ୍ର ହେଉଛି ‘ପ୍ରସ୍ଥାନମ୍’।
‘ଖଳନାୟକ’ର ନିର୍ଦ୍ଦେଶନା ବଲିଉଡ଼ର ପ୍ରସିଦ୍ଧ ନିର୍ଦ୍ଦେଶକ ସୁଭାଷ ଘଇ ଦେଇଥିଲେ। ତେଣୁ ଏହାର ସିକ୍ୱେଲ ନିର୍ମାଣ କରିବା ପାଇଁ ସଞ୍ଜୟଙ୍କୁ ତାଙ୍କ ଠାରୁ ଚଳଚ୍ଚିତ୍ରର ରାଇଟ୍ସ ନେବାକୁ ପଡ଼ିବ। ସଞ୍ଜୟ ଏନେଇ ସୁଭାଷଙ୍କ ସହ ଆଲୋଚନା କରିଥିବା ମଧ୍ୟ ଜଣାପଡ଼ିଛି। ସୂଚନାଯୋଗ୍ୟ, ‘ଖଳନାୟକ’ରେ ସଞ୍ଜୟ ଦତ୍ତଙ୍କ ସହ ମାଧୁରୀ ଦୀକ୍ଷିତ୍ ଓ ଜ୍ୟାକି ଶ୍ରଫ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଥିଲେ।