ଫେରିଲା କେରଳୀ ମହିଳାଙ୍କ ମୃତଦେହ

ନୂଆଦିଲ୍ଲୀ: ପାଲେଷ୍ଟାଇନର କ୍ଷେପଣାସ୍ତ୍ର ମାଡରେ ଇସ୍ରାଏଲରେ ପ୍ରାଣ ହରାଇଥିବା କେରଳୀ ମହିଳା ସୌମ୍ୟା ସନ୍ତୋଷୀଙ୍କ ମୃତଦେହ ଶନିବାର ଭାରତରେ ପହଞ୍ଚିଛି। କେରଳ ଇଡୁକି ଜିଲାର ବାସିନ୍ଦା ସୌମ୍ୟା (୩୦) ଇସ୍ରାଏଲରେ ଘରୋଇ ସହାୟକ ଭାବେ ଦୀର୍ଘ ୭ବର୍ଷ ହେଲା କାର୍ଯ୍ୟ କରିଆସୁଥିଲେ। ସେ ଇସ୍ରାଏଲର ଆସକେଲୋନ ସହରରେ ରହୁଥିଲେ। ଗତ ମଙ୍ଗଳବାର ଇସ୍ରାଏଲ ଉପରେ ପାଲେଷ୍ଟାଇନର ଆତଙ୍କବାଦୀ ସଂଗଠନ ହମାସ୍ ପକ୍ଷରୁ ହୋଇଥିବା କ୍ଷେପଣାସ୍ତ୍ର ମାଡରେ ସୌମ୍ୟାଙ୍କର ମୃତ୍ୟୁ ହୋଇଥିଲା।

ଶନିବାର ସ୍ବତନ୍ତ୍ର ବିମାନ ଯୋଗେ ସୌମ୍ୟାଙ୍କ ମୃତଦେହ ଦିଲ୍ଲୀରେ ପହଞ୍ଚିଥିଲା। ବୈଦେଶିକ ମନ୍ତ୍ରଣାଳୟ ରାଷ୍ଟ୍ରମନ୍ତ୍ରୀ ଭି ମୁରଲୀଧରନ ଓ ଇସ୍ରାଏଲ ଉପ ରାଷ୍ଟ୍ରଦୂତ ରୋନି ୟେଡିଡା କ୍ଲେନ ମୃତଦେହକୁ ଗ୍ରହଣ କରିବା ସହିତ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ସୌମ୍ୟାଙ୍କର ସ୍ବାମୀ ଓ ୯ବର୍ଷର ଏକ ପୁଅ ଅଛନ୍ତି। ଇସ୍ରାଏଲ ସରକାର ସୌମ୍ୟାଙ୍କ ପରିବାରର ଦୟିତ୍ବ ନେବାକୁ ଘୋଷଣା କରିଛନ୍ତି।