ସୁନା ଚୋରା ଚାଲାଣ ମାମଲାରେ କେରଳ ମୁଖ୍ୟମନ୍ତ୍ରୀଙ୍କ ପୂର୍ବତନ ସଚିବଙ୍କୁ ଜେରା

କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ମୁଖ୍ୟ ସଚିବ ଭାବରେ ବରଖାସ୍ତ ହୋଇଥିବା ଆଇଏଏସ୍ ଅଧିକାରୀ ଏମ ଶିବଶଙ୍କର ସୁନା ଚୋରା ଚାଲାଣ ମାମଲାରେ କଷ୍ଟମ୍ସ ଅଧିକାରୀଙ୍କ ନିକଟରେ ହାଜର ହୋଇଛନ୍ତି। ପୂଜାପୁରା ନିକଟସ୍ଥ ତାଙ୍କ ଘରେ କଷ୍ଟମ୍ସ ଅଧିକାରୀଙ୍କ ତିନିଜଣିଆ ଟିମ୍ ତାଙ୍କୁ ମଙ୍ଗଳବାର ନୋଟିସ୍ ପ୍ରଦାନ କରିବାର କିଛି ସମୟ ପରେ ଶିବଶଙ୍କର ପ୍ରାୟ ସନ୍ଧ୍ୟା ୫ଟା ସମୟରେ ସେମାନଙ୍କ ସମ୍ମୁଖରେ ହାଜର ହୋଇଥିଲେ। ଏହି ମାମଲାରେ ତାଙ୍କ ନାମ ପ୍ରକାଶ ପାଇବା ପରେ ଏକ ବର୍ଷ ଛୁଟିରେ ଯାଇଥିବା ଶିବଶଙ୍କରଙ୍କୁ ଦିଆଯାଇଥିବା ନୋଟିସରେ ତାଙ୍କୁ ଏହି ଅନୁସନ୍ଧାନରେ ସହଯୋଗ କରିବାକୁ କୁହାଯାଇଛି ବୋଲି ଜଣାପଡିଛି।

ସୀମା ଶୁଳ୍କ ଅଧିକାରୀ ତାଙ୍କୁ ଡକାଇଥିବା ପ୍ରସଙ୍ଗରେ ସମ୍ପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ କି ନାହିଁ ପ୍ରଶ୍ନରେ ବିଜୟନ କହିଛନ୍ତି ଯେ ମୁଖ୍ୟ ଶାସନ ସଚିବ ଡଃ ବିଶ୍ୱ ମେହେଟ୍ଟାଙ୍କ ନେତୃତ୍ୱରେ ଏକ ପ୍ୟାନେଲ ତାଙ୍କ ବିରୋଧରେ ହୋଇଥିବା ଅଭିଯୋଗର ଯାଞ୍ଚ କରୁଛି ଏବଂ ଯଦି ସେ ଦୋଷୀ ସାବ୍ୟସ୍ତ ହେବେ ତେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେ କହିଛନ୍ତି, ବର୍ତ୍ତମାନ ସୁଦ୍ଧା, ନିଲମ୍ବନ କରିବାର କୌଣସି କାରଣ ନାହିଁ। ତାଙ୍କ ଫୋନ୍ ରେକର୍ଡରୁ ଜଣାପଡିଛି ଯେ ସୁନା ଚୋରା କାରବାର ମାମଲାରେ ଅଭିଯୁକ୍ତ ମହିଳାଙ୍କ ସହ ତାଙ୍କର ସମ୍ପର୍କ ଥିଲା।

Comments
Loading...