କୋଚି: କେରଳରେ ଆସିଥିବା ପ୍ରଳୟଙ୍କରୀ ବନ୍ୟାରେ ମୃତ୍ୟୁ ସଂଖ୍ୟା ୨୨କୁ ବୃଦ୍ଧି ପାଇଛି। ବିଗତ ୫୦ ବର୍ଷ ମଧ୍ୟରେ କେରଳରେ ଏଭଳି ବନ୍ୟା ବିଭୀଷିକା ଦେଖାଦେଇ ନଥିଲା ବୋଲି କୁହାଯାଉଛି। ବିଭିନ୍ନ ସ୍ଥାନରେ ଏନ୍ଡିଆରଏଫ୍ର ୧୦ଟି ଟିମ୍ ସହିତ ଜଳ, ସ୍ଥଳ ଓ ବାୟୁ ସେନାବାହିନୀଙ୍କୁ ଉଦ୍ଧାର କାର୍ଯ୍ୟରେ ମୁତୟନ କରାଯାଇଛି। ପ୍ରାୟ ୨୬ ବର୍ଷ ପରେ ଇଡୁକି ଜଳଭଣ୍ଡାରର ଗେଟ୍ ଖୋଲିଥିବାରୁ ସେହି ଅଞ୍ଚଳରେ ରେଡ କର୍ଣ୍ଣର ନୋଟିସ୍ ଜାରି କରାଯାଇଛି। ଗତ କାଲି ରାତି ସାରା ପ୍ରବଳ ବର୍ଷା ଜାରି ରହିଥିବା ବେଳେ ଆଗାମୀ ୨୪ ଘଣ୍ଟାରେ ମଧ୍ୟ ପ୍ରବଳ ବର୍ଷାର ଆଶଙ୍କା କରାଯାଉଛି।
ଇଡୁକି, ୱେଆନଦ, ଏର୍ଣ୍ଣାକୁଲମ୍, ପଟାନମଟିତ୍ତା ଜିଲାରେ ସମସ୍ତ ସ୍କୁଲ୍ କଲେଜ ବନ୍ଦ ରଖାଯାଇଛି। ବନ୍ୟା ସ୍ଥିତି ଓ ଉଦ୍ଧାର କାର୍ଯ୍ୟ ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେରଳ ମୁଖ୍ୟମନ୍ତ୍ରୀ ପିନାରାୟି ବିଜୟନ୍ଙ୍କ ସହିତ ଆଲୋଚନା କରି ସମସ୍ତ ପ୍ରକାର ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି।
