ଡାକ୍ତରଖାନାକୁ ଡର; ବିଦ୍ୟାଳୟରେ ଖୋଲିଲା ଚିକିତ୍ସା କେନ୍ଦ୍ର

ପାଟଣା : କେନ୍ଦୁଝର ଜିଲ୍ଲା ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଡାକ୍ତରଖାନା ସାମ୍ନା ପାଟଣା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ଏକ ଅସ୍ଥାୟୀ ଜ୍ବର ଚିକିତ୍ସା କେନ୍ଦ୍ର ଖୋଲାଯାଇଛି । କରୋନା କଟକଣା ସମୟରେ ସାଧାରଣ ଜ୍ବର, ଥଣ୍ଡା, କାଶ, ସର୍ଦି ରୋଗୀ ଡାକ୍ତରଖାନା ଆସିବାକୁ ଭୟ କରୁଛନ୍ତି । ବିଶେଷ କରି ଡାକ୍ତରଖାନାକୁ ଆସୁଥିବା ବହୁ ରୋଗୀଙ୍କ ଡରରେ ସାଧାରଣ ଜ୍ବର, ଥଣ୍ଡା ରୋଗୀ ଡାକ୍ତରଖାନାକୁ ଆସୁ ନଥିବାରୁ ଡାକ୍ତରଖାନା ସାମ୍ନାରେ ଏକ ଅସ୍ଥାୟୀ ଜ୍ବର ଚିକିତ୍ସା କେନ୍ଦ୍ର ଖୋଲାଯାଇ ଚିକିତ୍ସା କରାଯାଉଛି ।

ଏହି ଚିକିତ୍ସା କେନ୍ଦ୍ରରେ ଡାକ୍ତର ଲକ୍ଷ୍ମଣ ମହାନ୍ତ, ମହିଳା ସ୍ୱାସ୍ଥ୍ୟକର୍ମୀ ନିବେଦିତା ମହାନ୍ତ, ଗିରିଜା ନାଏକ ସାଧାରଣ ଜ୍ବର ଥଣ୍ଡା ରୋଗୀଙ୍କ ଚିକିତ୍ସା ଦାୟିତ୍ବରେ ଅଛନ୍ତି। ଏଠାରେ ଚିକିତ୍ସା ସହ ମାଗଣା ଔଷଧ ମଧ୍ୟ ଯୋଗାଇ ଦିଆଯିବ । ଏଥିପାଇଁ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ଗୋଟିଏ ଶ୍ରେଣୀ କୋଠରୀରେ ଚିକିତ୍ସା ବ୍ୟବସ୍ଥା ହୋଇଥିବା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ସୁପରିଟେଣ୍ଡେଣ୍ଟ ଡକ୍ଟର ସୁପ୍ରକାଶ ଶତପଥୀଙ୍କ ଠାରୁ ପ୍ରକାଶ ।

Comments
Loading...