କେନ୍ଦ୍ରାପଡ଼ା: ରାଜ୍ୟରେ ଲଗାଣ ବର୍ଷା ଯୋଗୁ କେନ୍ଦ୍ରାପଡ଼ା ଜିଲାରେ ବ୍ୟାପକ କ୍ଷୟକ୍ଷତି ସାଙ୍ଗକୁ ବହୁ ଗ୍ରାମ ଜଳମଗ୍ନ ହୋଇଛି। ଏହି ଜିଲା ଦେଇ ପ୍ରବାହିତ ବିଭିନ୍ନ ନଦୀର ଜଳସ୍ତର ବୃଦ୍ଧି ପାଉଥିବାରେ ବନ୍ୟା ଆଶଙ୍କା ଦେଖାଦେଇଛି। ଲଘୁଚାପ ଜନିତ ଲଗାଣ ବର୍ଷା ପ୍ରଭାବରେ କେନ୍ଦ୍ରାପଡ଼ାରେ ଲୁଣା ନଦୀର ଜଳସ୍ତର ବୃଦ୍ଧି ପାଇବାରେ ଲାଗିଛି। ଏହାର ପ୍ରଭାବରେ କେନ୍ଦ୍ରାପଡ଼ା ଜିଲାର ବିଭିନ୍ନ ଗ୍ରାମରେ ବନ୍ୟାଜଳ ପ୍ରବେଶ କରିଛି। ବର୍ତ୍ତମାନ ପୂବାଂଶରେ ୩୫.୭୦ଫୁଟ, ଦାନପୁରରେ ୩୩.୩୦ଫୁଟ, ବାସୁପୁରରେ ୨୯.୮୦ଫୁଟ, ମର୍ଶାଘାଇ ୨୧. ୯୦ ଫୁଟ ଉଚ୍ଚରେ ଜଳ ପ୍ରବାହିତ ହେଉଛି। ସେହିପରି ଚିତ୍ରୋତ୍ପଳା ନଦୀରେ ମଧ୍ୟ ଜଳସ୍ତର ବୃଦ୍ଧି ପାଉଛି। ଏହା ପାଟକୁରାରେ ୨୨.୫୦ଫୁଟ ଉଚ୍ଚରେ ଜଳ ପ୍ରବାହିତ ହେଉଛି। ବୈତରଣୀ ନଦୀ ଇନ୍ଦ୍ରପୁରଠାରେ ୮.୮୩ମିଟର ଉଚ୍ଚରେ ପ୍ରବାହିତ ହେଉଥିବାବେଳେ ବିରୂପା ନଦୀ ଗୋପାଳପୁରଠାରେ ୧୧.୧୮ ମିଟର ପର୍ଯ୍ୟନ୍ତ ଜଳସ୍ତର ହ୍ରାସ ପାଇଛି। ଲଘୁଚାପ ଜନିତ ବର୍ଷା ଯୋଗୁ ୯ଟି ସ୍ଥାନରେ ଘଳିଆ ପଡ଼ିଥିବାବେଳେ ବିରୁପାରେ ବେଣୀପୁର ଘେରି ନଦୀବନ୍ଧ ଭାଙ୍ଗିଛି ବୋଲି କେନ୍ଦ୍ରାପଡ଼ା ଜଳସମ୍ପଦ ଡିଭିଜନ୍ ପକ୍ଷରୁ ସୂଚନା ଦିଆଯାଇଛି।
Comments are closed.