କାଜାଖସ୍ତାନରେ ସୈନ୍ୟ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଜାରି

ଅଲମାଟି: କେନ୍ଦ୍ର ଏସିଆର ସର୍ବବୃହତ ରାଷ୍ଟ୍ର କାଜାଖସ୍ତାନରେ ଦେଶର ସୈନ୍ୟବାହିନୀ ଓ ବିଦ୍ରୋହୀଙ୍କ ମଧ୍ୟରେ ସଂଘର୍ଷ ଜାରି ରହିଛି । ଏଥିରେ ଏପର୍ଯ୍ୟନ୍ତ ୧୬୦ ଜଣଙ୍କର ପ୍ରାଣହାନି ଘଟିଥିବାବେଳେ ୬ ହଜାର ବିକ୍ଷୋଭକାରୀଙ୍କୁ ଗିରଫ କରାଯାଇସାରିଲାଣି । କେବଲ ଅଲମାଟି ସହରରେ ୧୦୩ ଜଣଙ୍କର ମୃତ୍ୟୁ ଘଟିଥିବା ଖବର ମିଳିଛି । ଦେଶର ରାଷ୍ଟ୍ରପତି କାସିମ ଜୋମାର୍ଟ ତୋକାୟେଭ ଏକ ଜରୁରୀକାଳୀନ ବୈଠକ ଡକାଇ ଦେଶର ସାମ୍ପ୍ରତିକ ପରିସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି । ସରକାରୀ ସୂତ୍ରରୁ କୁହାଯାଇଛି ଯେ ଅଧିକାଂଶ ଅଞ୍ଚଳରେ ପରିସ୍ଥିତିକୁ ନିୟନ୍ତ୍ରଣ କରାଯାଇଛି । ସୂଚନାଯୋଗ୍ୟ ଯେ ଦେଶରେ ଇନ୍ଧନ ମୂଲ୍ୟବୃଦ୍ଧିକୁ କେନ୍ଦ୍ରକରି ପ୍ରାୟ ଏକ ସପ୍ତାହ ହେଲା ଏଭଳି ବିରୋଧାଭାସ, ବିକ୍ଷୋଭ ଏବଂ ସଂଘର୍ଷ ଲାଗିରହିଛି । ବିକ୍ଷୋଭକାରୀମାନେ ପ୍ରାୟ ୧୦୦ରୁ ଅଧିକ ବ୍ୟବସାୟ ପ୍ରତିଷ୍ଠାନ ଏବଂ ବ୍ୟାଙ୍କ ଉପରେ ଆକ୍ରମଣ କରିବା ସହିତ ଲୁଟପାଟ କରିଛନ୍ତି । ସେମାନଙ୍କ ଆକ୍ରମଣରେ ୪ଶହରୁ ଅଧିକ ଯାନବାହନ କ୍ଷତିଗ୍ରସ୍ତ ହୋଇଛି । ଇତିମଧ୍ୟରେ ଦେଶର ପୂର୍ବତନ ନିରାପତ୍ତା ମୁଖ୍ୟଙ୍କୁ ଗିରଫ କରାଯାଇଥିବା ସରକାରୀ ସୂତ୍ରରୁ କୁହାଯାଇଛି । ସେ ବିକ୍ଷୋଭକାରୀଙ୍କୁ ସମର୍ଥନ କରୁଥିବା ସନ୍ଦେହରେ ପୁଲିସ ତାଙ୍କୁ ଗିରଫ କରିଛି । ଇତିମଧ୍ୟରେ କାଜାଖସ୍ତାନ ସରକାରଙ୍କ ଅନୁରୋଧକ୍ରମେ ରୁଷ ନେତୃତ୍ୱାଧୀନ କଲେକ୍ଟିଭ ସିକ୍ୟୁରିଟି ଟ୍ରିଟି ଅର୍ଗାନାଇଜେସନ (ସିଏସଟିଓ) ପକ୍ଷରୁ ସେଠାକୁ ସାମରିକ ସହାୟତା ପଠାଯାଇଛି । ଏହି ସୈନ୍ୟମାନେ କାଜାଖସ୍ତାନର ଗୁରୁତ୍ୱପୂର୍ଣ୍ଣ ସ୍ଥାନଗୁଡିକରେ ମୁତୟନ ହୋଇଛନ୍ତି ।