ଶ୍ରୀନଗର: ନୋଇଡ଼ାରୁ ଗତ ସପ୍ତାହରେ ନିଖୋଜ ହୋଇଯାଇଥିବା କାଶ୍ମୀର ଛାତ୍ର ଆତଙ୍କବାଦୀ ସଂଗଠନ ଆଇଏସ୍ଆଇଏସ୍ରେ ଯୋଗ ଦେଇଛନ୍ତି। ସୋସିଆଲ୍ ମିଡିଆରେ ତାଙ୍କ ଫଟୋ ଭାଇରାଲ୍ ହେବା ପରେ ଏହା ଜଣାପଡ଼ିଛି। କିନ୍ତୁ ପୁଲିସ ପକ୍ଷରୁ ଏ ସମ୍ପର୍କରେ ବିଧିବଦ୍ଧ ଭାବେ ସୂଚନା ଦିଆଯାଇନାହିଁ।
ଏ ବି ସୋଫି ନାମକ କାଶ୍ମୀରର ଏହି ଛାତ୍ରଜଣକ ନୋଇଡାର ଶାରଦା ବିଶ୍ୱବିଦ୍ୟାଳୟରେ ପଢ଼ୁଥିଲେ। ଗତ ୨୮ ତାରିଖରେ ସେ ହଷ୍ଟେଲ୍ କର୍ତ୍ତୃପକ୍ଷଙ୍କ ଅନୁମତି ନେଇ ଦିଲ୍ଲୀ ଯାଇ ଆଉ ଫେରି ନଥିଲେ। ତାଙ୍କ ସହିତ ଯୋଗାଯୋଗ ସମ୍ଭବ ନ ହେବା ପରେ ଗ୍ରେଟର ନୋଇଡା ଥାନାରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଏତଲା ଦେଇଥିଲେ। ଶ୍ରୀନଗର ଥାନାରେ ମଧ୍ୟ ଏକ ଏତଲା ଦାଏର କରାଯାଇଥିଲା। ପୁଲିସ ତାଙ୍କ ଫୋନ୍କୁ ଟ୍ରାକ କରିଥିଲା। ଶେଷ ଥର ପାଇଁ ସୋଫି ତାଙ୍କ ବାପାଙ୍କ ସହିତ ଅକ୍ଟୋବର ୨୯ ତାରିଖ ଅପରାହ୍ଣ ୪.୩୦ରେ ଶ୍ରୀନଗରରୁ କଥା ହୋଇଥିଲେ। ଏହାପରେ ତାଙ୍କ ଫୋନ୍ ବନ୍ଦ ହୋଇଯାଇଥିଲା। ଦିଲ୍ଲୀ ଇଣ୍ଟରନ୍ୟାଶ୍ନାଲ୍ ଏୟାରପୋର୍ଟରୁ ସୋଫି ଫେବୃଆରୀ ୨୮ରେ ଫୁଲୱାମା ଯାଇଥିବା ପୁଲିସକୁ ସୂଚନା ମିଳିଛି। ଉତ୍ତରପ୍ରଦେଶର ଆଣ୍ଟି ଟେରରିଷ୍ଟ ସ୍କ୍ୱାଡ୍ ଘଟଣାର ତଦନ୍ତ ଆରମ୍ଭ କରିଛି।
