ବେଙ୍ଗାଲୁରୁ : କର୍ଣ୍ଣାଟକ ରାମନଗର ବିଧାନସଭା ଆସନରେ ହେବାକୁ ଯାଉଥିବା ଉପନିର୍ବାଚନରେ ମୁଖ୍ୟମନ୍ତ୍ରୀ ଏଚଡି କୁମାରସ୍ୱାମୀଙ୍କ ପତ୍ନୀ ଅନୀତା କୁମାରସ୍ୱାମୀ ପ୍ରାର୍ଥୀ ହେବେ। ରବିବାର ଏହି ଉପନିର୍ବାଚନ ଲାଗି ଅନୀତାଙ୍କୁ ପ୍ରାର୍ଥୀ ଘୋଷଣା କରାଯାଇଛି। ଅନୀତା ଜେଡିଏସ୍ ଟିକଟରେ ନିର୍ବାଚନ ଲଢିବେ। ସେହିପରି ଶିମୋଗା ସଂସଦୀୟ ଆସନ ଉପନିର୍ବାଚନ ଲାଗି ଜେଡିଏସ୍ ପୂର୍ବତନ ମୁଖ୍ୟମନ୍ତ୍ରୀ ଏସ୍ ବାଙ୍ଗରାପ୍ପାଙ୍କ ପୁଅ ମଧୁ ବାଙ୍ଗରାପ୍ପାଙ୍କୁ ପ୍ରାର୍ଥୀ କରିଛି। ତେବେ ମାଣ୍ଡ୍ୟା ଲୋକସଭା ଆସନ ଉପନିର୍ବାଚନ ପାଇଁ ଜେଡିଏସ୍ ଏହାର ପ୍ରାର୍ଥୀ ଘୋଷଣା କରିନାହିଁ। ପରବର୍ତ୍ତୀ ସମୟରେ ଏହି ପ୍ରାର୍ଥୀ ଘୋଷଣା ହେବ। ସେହିପରି ସହଯୋଗୀ କଂଗ୍ରେସ ଜାମଖଣ୍ଡି ବିଧାନସଭା ଆସନ ଉପନିର୍ବାଚନ ଲାଗି ଆନନ୍ଦ ନ୍ୟାମଗୌଡାଙ୍କୁ ପ୍ରାର୍ଥୀ କରିଛି। ଆନନ୍ଦ ହେଉଛନ୍ତି ସିଧୁ ନ୍ୟାମଗୌଡାଙ୍କ ପୁଅ ଯିଏ ମେ ୨୮ରେ ସଡକ ଦୁର୍ଘଟଣାରେ ପ୍ରାଣ ହରାଇଥିଲେ। କଂଗ୍ରେସ ବେଲାରି ଲୋକସଭା ଆସନ ଉପନିର୍ବାଚନ ଲାଗି ପ୍ରାର୍ଥୀ ଘୋଷଣା କରିନାହିଁ। ନଭେମ୍ବର ୩ରେ କର୍ଣ୍ଣାଟକର ୨ଟି ବିଧାନସଭା ଓ ୩ଟି ଲୋକସଭା ଆସନ ପାଇଁ ଉପନିର୍ବାଚନ ହେବ। ନଭେମ୍ବର ୬ରେ ଏହାର ଭୋଟ ଗଣତି ହେବ।
