କର୍ଣ୍ଣାଟକରେ ନୂତନ ସରକାର ଗଠନ ସଙ୍କେତ!

0

ବେଙ୍ଗାଲୁରୁ: ଆଗାମୀ ଲୋକସଭା ନିର୍ବାଚନରେ ରାଜନୈତିକ ସଫଳତା ହାସଲ ନିମନ୍ତେ ବିଜେପି କର୍ଣ୍ଣାଟକ ରାଜ୍ୟ ରାଜନୀତିର ସ୍ଥିତି ପରିବର୍ତ୍ତନ କରିବାର ଉଦ୍ୟମ ଚଳାଇଛି। ଏଥିକ୍ରମେ ମକର ସଂକ୍ରାନ୍ତି ପରେ ରାଜ୍ୟରେ ଜେଡି(ଏସ୍‌)-କଂଗ୍ରେସ ମେଣ୍ଟ ସରକାରକୁ କ୍ଷମତାଚ୍ୟୁତ କରି ବିଜେପି ସରକାର ଗଠନ କରିବାର ସଙ୍କେତ ଦେଇଛି। ‘ଅପରେସନ କମଳ’ କାର୍ଯ୍ୟକାରୀ କରି ବିଜେପି ଇତିମଧ୍ୟରେ କଂଗ୍ରେସର ୩ ଜଣ ବିଧାୟକଙ୍କ ସମର୍ଥନ ହାସଲ କରିଥିବା ଜଣାପଡିଛି। ବିଜେପିର ଜଣେ ବରିଷ୍ଠ ବିଧାୟକଙ୍କ ସୂଚନା ମୁତାବକ ଯଦି ଜେଡିଏସ୍‌-କଂଗ୍ରେସ ମିଳିତ ଭାବେ ଲୋକସଭା ନିର୍ବାଚନ ଲଢନ୍ତି ତା’ହେଲେ ବିଜେପି ପାଇଁ ସମସ୍ୟା ସୃଷ୍ଟି ହୋଇପାରେ ବୋଲି ଦଳୀୟ ହାଇକମାଣ୍ଡ ଆକଳନ କରିଛନ୍ତି। କେନ୍ଦ୍ରରେ ସରକାର ଗଠନ ଲାଗି କର୍ଣ୍ଣାଟକରେ ଅଧିକରୁ ଅଧିକ ସଂଖ୍ୟକ ଆସନରେ ବିଜୟୀ ହେବା ଆବଶ୍ୟକ। ରାଜ୍ୟରେ ବିଜେପି ସରକାର ଗଠନ ସ୍ଥିତିରେ ହିଁ ଦଳକୁ ବିପୁଳ ସଫଳତା ମିଳିପାରିବ। ଅନ୍ୟପଟେ କ୍ଷମତା ହରାଇବା ପରେ ଜେଡିଏସ୍‌ ଏକାକୀ ଲୋକସଭା ନିର୍ବାଚନ ମୈଦାନକୁ ଓହ୍ଲାଇବାର ସମ୍ଭାବନା ରହିଛି। ଏଭଳିସ୍ଥିତିରେ କଂଗ୍ରେସ ନୈତିକତା ହରାଇବ। ଯଦ୍ଦ୍ବାରା ବିଜେପିର ବିଜୟପଥ ସୁଗମ ହେବ। ଏଣୁ ଲୋକସଭା ନିର୍ବାଚନ ପୂର୍ବରୁ ଦଳୀୟ ପ୍ରମୁଖ ନେତାମାନେ ରାଜ୍ୟରେ ସରକାର ଗଠନ ଲାଗି ଅନ୍ତିମ ପ୍ରଚେଷ୍ଠା ଚଳାଇଛନ୍ତି ବୋଲି ସମ୍ପୃକ୍ତ ବିଧାୟକ କହିଛନ୍ତି।
କଂଗ୍ରେସ ନେତା ତଥା କର୍ଣ୍ଣାଟକର ମନ୍ତ୍ରୀ ଡି.କେ. ଶିବକୁମାରଙ୍କ ଅଭିଯୋଗ ବିଜେପିର ସରକାର ଗଠନ ସମ୍ଭାବନା ସମ୍ବନ୍ଧୀୟ ଖବରକୁ ଅଧିକ ଦୃଢୀଭୂତ କରୁଛି। ୩ ଜଣ କଂଗ୍ରେସ ବିଧାୟକଙ୍କୁ ବିଜେପି ଫୁସୁଲାଇ ମୁମ୍ବଇ ନେଇଯାଇଛି। ସମ୍ପୃକ୍ତ ବିଧାୟକମାନେ ଏବେ କେଉଁଠି ତାହା କଂଗ୍ରେସ ନେତାମାନଙ୍କୁ ଜଣାନାହିଁ ବୋଲି ରବିବାର ଶିବଶଙ୍କର କହିଛନ୍ତି। ରାଜ୍ୟରେ ଜେଡିଏସ୍‌-କଂଗ୍ରେସ ସରକାର ଗଠନ ହେବା ପରଠାରୁ ବିଜେପି କଂଗ୍ରେସ ନେତାଙ୍କ ସମର୍ଥନ ହାସଲ ଉଦ୍ୟମ ଜାରି ରଖିଥିବା ବେଳେ ଗତ ଏକ ବର୍ଷ ମଧ୍ୟରେ ଏଭଳି ୬ଟି ଉଦ୍ୟମ ପଣ୍ଡ କରାଯାଇଛି। ବିଶେଷକରି କ୍ୟାବିନେଟରୁ ବାଦ ପଡିଥିବା କଂଗ୍ରେସ ବିଧାୟକ ରମେଶ ଝାରଖିଲୋଇଙ୍କ ଜରିଆରେ ବିଜେପି ନିଜର ‘ଅପରେସନ କମଳ’ ସଫଳ କରିବାର ଉଦ୍ୟମ ଜାରି ରଖିଥିବା କଂଗ୍ରେସ ନେତା କହିଛନ୍ତି।
ଝାରଖିଲୋଇ ଅତିକମରେ ୧୦ ଜଣ କଂଗ୍ରେସ ବିଧାୟକଙ୍କ ସମର୍ଥନ ହାସଲ କରିବାକୁ ଉଦ୍ୟମ କରି କେବଳ ୨ ଜଣଙ୍କୁ ନିଜ ସପକ୍ଷରେ ନେବାରେ ସଫଳ ହୋଇଛନ୍ତି। ଗୁଲବର୍ଗ ବିଧାୟକ ଉମେଶ ଯାଦବ ମଧ୍ୟ ବିରୋଧୀ ଶିବିରରେ ସାମିଲ ହେବାର ମସୁଧା ଚଳାଇଥିବା କୁହାଯାଉଛି। କଂଗ୍ରେସ-ଜେଡିଏସ୍‌ ସରକାରକୁ କ୍ଷମତାଚ୍ୟୁତ କରିବାକୁ ବିଜେପି ଉଦ୍ୟମ କରୁଛି ବୋଲି ଶିବକୁମାର ମଧ୍ୟ କହିଛନ୍ତି। ବିଜେପିର ଦଳର ରାଜ୍ୟ ସଭାପତି ବି.ଏସ୍‌. ୟେଦୁରପ୍ପା ଏହି ଖବରକୁ ଅସ୍ବୀକାର କରିଛନ୍ତି। ଯେଦୁରପ୍ପା କହିଛନ୍ତି ଯେ କଂଗ୍ରେସ-ଜେଡିଏସ ଘୋଡାବେପାର ଚଳାଇ ବିଜେପି ବିଧାୟକଙ୍କୁ ନିଜ ସପକ୍ଷକୁ ନେବାକୁ ଚେଷ୍ଟା କରୁଛନ୍ତି। ତେଣୁ ଆଗାମୀ ଦିନରେ ବିଜେପି ବିଧାୟକମାନେ ଦିଲ୍ଲୀରେ ଏକଜୁଟ୍ ହେବେ। ୨୨୪ ଆସନ ବିଶିଷ୍ଟ କର୍ଣ୍ଣାଟକ ବିଧାନସଭାରେ କଂଗ୍ରେସର ୮୦, ଜେଡିଏସ୍‌ର ୩୭, ବିଏସ୍‌ପି ୧ ଏବଂ ୨ ଜଣ ସ୍ବାଧୀନ ବିଧାୟକଙ୍କୁ ନେଇ ରାଜ୍ୟରେ ମେଣ୍ଟ ସରକାର ରହିଛି। ବିଜେପିର ୧୦୪ ବିଧାୟକ ଅଛନ୍ତି। ତେବେ କଂଗ୍ରେସର ବିଧାୟକ ତିନି ଜଣ ବିଧାୟକ ମୁମ୍ବଇର ଏକ ହୋଟେଲରେ ବିଜେପି ନେତାଙ୍କ ସହିତ ଅବସ୍ଥାନ କରିଥିବା ନେଇ ଶିବକୁମାରଙ୍କ ଅଭିଯୋଗକୁ ଅସ୍ବୀକାର କରିଛନ୍ତି କୁମାରସ୍ବାମୀ। ସେ କହିଛନ୍ତି, ଉକ୍ତ ବିଧାୟକମାନେ ତାଙ୍କୁ ଅବଗତ କରିବା ପରେ ମୁମ୍ବଇ ଅଭିମୁଖେ ଯାତ୍ରା କରିଥିଲେ। ସେମାନଙ୍କ ସହିତ ତାଙ୍କର ନିରନ୍ତର ଯୋଗାଯୋଗ ହୋଇଛି। ତାଙ୍କ ସରକାର ପ୍ରତି କୌଣସି ବିପଦ ନ ଥିବା କୁମାରସ୍ବାମୀ ଦର୍ଶାଇଛନ୍ତି।

Leave A Reply