ଭବାନୀପାଟଣା : କଳାହାଣ୍ଡି ଜିଲାର କର୍ଲାପାଟ ଅଭୟାରଣ୍ୟରେ ପୁଣି ଏକ ମାଈ ହାତୀର ମୃତ୍ୟୁ ଘଟିଛି। ଏହାକୁ ମିଶାଇ ଗତ ୧୩ ଦିନରେ କଳାହାଣ୍ଡି ଜିଲାରେ ୫ଟି ହାତୀଙ୍କ ମୃତ୍ୟୁ ଘଟିଲାଣି। ଏହି ଘଟଣା ଅଭୟାରଣ୍ୟରେ ବନ୍ୟଜନ୍ତୁଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଫେବୃୟାରୀ ୧ ତାରିଖ ଦିନ କର୍ଲାପାଟ ଅଭୟାରଣ୍ୟରେ ତେନ୍ତୁଳି ପତର ନିକଟରେ ପ୍ରଥମ ମାଈହାତୀର ମୃତ୍ୟୁ ହୋଇଥିଲା। ଠିକ୍ ତାର ୮ ଦିନ ପରେ ଗତ ୮ ତାରିଖ କର୍ଲାପାଟ ଘୁଷୁରିଗୁଡ଼ି ନିକଟରେ ଦ୍ୱିତୀୟ ମାଈ ହାତୀର ମୃତ୍ୟୁ ଘଟିଥିଲା। ୧୦ ତାରିଖରେ ତୃତୀୟ ମାଈ ହାତୀର ମୃତଦେହ ସେହି ଘୁଘୁରିଗୁଡ଼ି ନିକଟରୁ ଉଦ୍ଧାର କରାଯାଇଥିଲା। ଏହାର ଗୋଟିଏ ଦିନ ପରେ ଅର୍ଥାତ୍ ୧୧ ତାରିଖ ଦିନ ଚତୁର୍ଥ ହାତୀର ମୃତଦେହ ସେହି ଘୁସୁରିଗୁଡ଼ି ନିକଟରେ ପଡ଼ିଥିବା ବେଳେ ପୁଣି ଗତ ୧୨ ତାରିଖ ରାତିରେ ଆଉ ଏକ ମାଈହାତୀ ଅର୍ଥାତ୍ ୫ମ ହାତୀର ମୃତ୍ୟୁ ହୋଇଥିବା ଜଙ୍ଗଲ ବିଭାଗ ସୂତ୍ରରୁ ଜଣାପଡ଼ିଛି।
ଗୁରୁତ୍ବପୂର୍ଣ୍ଣ ବିଷୟ ହେଲା ମୃତ ୫ଟି ଯାକ ମାଈ ହାତୀ। ଦକ୍ଷିଣ ବନଖଣ୍ଡ ଡିଏଫ୍ଓ ଟି.ଅଶୋକ କୁମାରଙ୍କ ଅନୁରୋଧକ୍ରମେ ଭୁବନେଶ୍ୱରସ୍ଥିତ ଓୟୁଏଟିରୁ ୨ ଜଣ ବିଶେଷଜ୍ଞ ଡା. ନିରଞ୍ଜନ ସାହୁ ଓ ଡା. ସୁଅଣକୁମାର ପଣ୍ଡା କଳାହାଣ୍ଡି ପ୍ରାଣୀବିଭାଗ ଓ ଜଙ୍ଗଲ ବିଭାଗ ଅଧିକାରୀଙ୍କ ସହ କର୍ଲାପାଟ ପହଞ୍ଚିଥିଲେ ା ହାତୀଗୁଡ଼ିକର ମୃତ୍ୟୁର କାରଣ ସମ୍ପର୍କରେ ତଦନ୍ତ କରିବା ପରେ ମୃତ୍ୟୁର କାରଣ ହାମ୍ରେଜ୍ ସେଫ୍ଟିସେମିଆ ବୋଲି ଅନୁମାନ କରିଛନ୍ତି। ସେଥିପାଇଁ ବିଭିନ୍ନ ନାଳର ପାଣି ପରୀକ୍ଷା ପାଇଁ ନିଆଯାଇଛି। ରିପୋର୍ଟ ଆସିବା ପରେ ମୃତ୍ୟୁର ସଠିକ କାରଣ ଜଣାପଡ଼ିବ। ସୂଚନାଯୋଗ୍ୟ, କର୍ଲାପାଟ ଅଭୟାରଣ୍ୟରେ ବର୍ତ୍ତମାନ ସୁଦ୍ଧା ହାତୀ ବ୍ୟତୀତ ଅନ୍ୟ କୌଣସି ବନ୍ୟପ୍ରାଣୀର ମୃତ୍ୟୁ ହେବା ଖବର ମିଳି ନାହିଁ।
Comments are closed.