କଙ୍ଗନା ରଣାୱତଙ୍କ ଆପତ୍ତିଜନକ ମନ୍ତବ୍ୟ, ମୁମ୍ବଇ ମୋତେ ପିଓକେ ଭଳି ଅନୁଭୂତ ହେଉଛି

ମୁମ୍ବଇ: ନିଜର ଟୁଇଟ୍ ପାଇଁ ଚର୍ଚ୍ଚାରେ ରହିଥିବା ବଲିଉଡ ଅଭିନେତ୍ରୀ କଙ୍ଗନା ରଣାୱତଙ୍କ ମୁମ୍ବଇ ପୁଲିସ ବିରୋଧରେ ବଡ ଅଭିଯୋଗ ଆଣିଛନ୍ତି। କଙ୍ଗନା ଟୁଇଟ୍ କରିଛନ୍ତି ଯେ ସେ ବଲିଉଡର ମାଫିଆଙ୍କ ତୁଳନାରେ ମୁମ୍ବଇ ପୁଲିସକୁ ଅଧିକ ଭୟ କରୁଛନ୍ତି। ଏପରିକି ମୁମ୍ବଇ ପୁଲିସ ତାଙ୍କ ବିରୋଧରେ ଅପରାଧକୁ ପ୍ରୋତ୍ସାହନ ଦେଉଛନ୍ତି। ଏପରିକି ମୁମ୍ବଇ ତାଙ୍କୁ ପାକିସ୍ତାନ ଅଧିକୃତ କାଶ୍ମୀର (ପିଓକେ) ଭଳି ଅନୁଭୂତ ହେଉଛି। କଙ୍ଗନାଙ୍କ ଏପରି ଟୁଇଟ୍ ପରେ ଶିବସେନା ନେତା ସଞ୍ଜୟ ରାଉତ କହିଛନ୍ତି ଯେ ଅଭିନେତ୍ରୀ କଙ୍ଗନା ଯଦି ମୁମ୍ବଇକୁ ଏତେ ଭୟ କରୁଛନ୍ତି ତେବେ ଏଠାକୁ ଆଉ ଆସନ୍ତୁ ନାହିଁ। କଙ୍ଗନାଙ୍କ ଏପରି ମନ୍ତବ୍ୟ ଅତ୍ୟନ୍ତ ନିନ୍ଦନୀୟ। ସ୍ବରାଷ୍ଟ୍ର ମନ୍ତ୍ରଣାଳୟ ଏହା ଉପରେ କାର୍ଯ୍ୟାନୁଷ୍ଠାନ ନେବା ଦରକାର। ସଞ୍ଜୟଙ୍କ ଏପରି ମନ୍ତବ୍ୟ ପରେ କଙ୍ଗନା ତାଙ୍କର ପ୍ରତିକ୍ରିୟାରେ କହିଛନ୍ତି ଯେ ସଞ୍ଜୟ ତାଙ୍କୁ ଖୋଲାଖୋଲି ଧମକ ଦେଉଛନ୍ତି। ମୁମ୍ବଇ ସମ୍ପର୍କରେ କଙ୍ଗନାଙ୍କ ଟୁଇଟ୍‌କୁ ବଲିଉଡର ଅନେକ କଳାକାର ନାସପନ୍ଦ କରିଛନ୍ତି। କଙ୍ଗନା ଏବେ ନିଜ ପରିବାର ସହିତ ମନାଲିରେ ରହୁଛନ୍ତି। ଏହା ପୂର୍ବରୁ କଙ୍ଗନା ଅଭିଯୋଗ କରିଥିଲେ ଯେ ବଲିଉଡର ଆଗଧାଡିର କଳାକାରମାନେ ଡ୍ରଗ୍ସରେ ଅଭ୍ୟସ୍ତ।

Comments
Loading...