ଫୁଲବାଣୀ : ଚଳିତ ବର୍ଷର ଅସହ୍ୟ ଶୀତ ଆଜି ସମଗ୍ର କନ୍ଧମାଳରେ ଅନୁଭୂତ ହୋଇଛି। ଚାରିପାଞ୍ଚ ଦିନ ତାପମାତ୍ରା ଅପେକ୍ଷାକୃତ ଅଧିକ ରହିବାରୁ ଶୀତର ପ୍ରକୋପ ହ୍ରାସ ପାଇଥଲା। କିନ୍ତୁ ଆଜି ଫୁଲବାଣୀରେ ତାପମାତ୍ରା ୮.୫ ଡିଗ୍ରୀ ସେଲସିୟସ ରେକର୍ଡ କରାଯାଇଛି। ଯାହା ରାଜ୍ୟର ସର୍ବନିମ୍ନ ତାପମାତ୍ରା। ଓଡିଶାର କାଶ୍ମୀର ଦାରିଙ୍ଗବାଡିରେ ତାପମାତ୍ରା ମଧ୍ୟ ହ୍ରାସ ପାଇଛି। ସେଠାରେ ତାପମାତ୍ରା ୧୧ ଡିଗ୍ରୀ ସେଲସିୟସ ରେକର୍ଡ କରାଯାଇଛି। ଗୋଟିଏ ଦିନରେ ଫୁଲବାଣୀର ତାପମାତ୍ରା ଦୁଇ ଡିଗ୍ରୀ ସେଲସିୟସ୍ ହ୍ରାସ ପାଇଛି।
ଫୁଲବାଣୀରେ ୨୦ ତାରିଖରେ ତାପମାତ୍ରା ୧୧ ଡିଗ୍ରୀ ଥିବା ବେଳେ ୨୧ ତାରିଖରେ ୧୩ ଡିଗ୍ରୀ,୨୨ ତାରିଖରେ ୧୦ ଡିଗ୍ରୀ ଏବଂ ୨୩ ତାରିଖରେ ୧୦.୫ ଡିଗ୍ରୀ ସେଲସିୟସ୍ ରହିଥିଲା। ୨୪ ତାରିଖରେ ହ୍ରାସ ପାଇ ୮.୫ ଡିଗ୍ରୀ ସେଲସିୟସରେ ପହଞ୍ଚିଥିବା ଜିଲାପାଳଙ୍କ କାର୍ଯ୍ୟାଳୟର ପାଣିପାଗ ପର୍ଯ୍ୟବେକ୍ଷକ ଆଶୀଷ ବେହେରା ସୂଚନା ଦେଇଛନ୍ତି। ତାପମାତ୍ରା ଲଲଗାତାର ହ୍ରାସ ପାଇବ ବୋଲି କହିଛନ୍ତି ଆଜି ଇନସ୍ପେକସନରେ ଆସିଥିବା ଭୁବନେଶ୍ୱର ପାଣିପାଗ କେନ୍ଦ୍ର କର୍ମଚାରୀ ପ୍ରଦୀପ କୁମାର ପାତ୍ର। ଜିଲାର ବେଲଘର, ତୁମୁଡିବନ୍ଧ, ଲଙ୍କାଗଡ, ଝିରିପାଣି ଓ କୋଟଗଡ ସମେତ ଅନ୍ୟ ଆଭ୍ୟନ୍ତରିଣ ଗ୍ରାମରେ ପ୍ରବଳ ଥଣ୍ଡା ଅନୁଭୂତ ହୋଇଛି।
