‘କାଳିଆ’ ଯୋଜନାରେ ବ୍ୟାପକ ଅନିୟମିତତା ପ୍ରସଙ୍ଗ, ଅଡିଟ୍ ସଂପୂର୍ଣ୍ଣ ପାଇଁ ହାଇକୋର୍ଟରେ ମାମଲା

କଟକ : ‘କାଳିଆ’ ଯୋଜନାରେ ବ୍ୟାପକ ଅନିୟମିତତା କରାଯାଇଥିଲା। ଏହି ଯୋଜନାରେ କୋଟି କୋଟି ଟଙ୍କା ଅଯୋଗ୍ୟ ହିତାଧିକାରୀଙ୍କୁ ପ୍ରଦାନ କରାଯାଇଥିଲା। ଏଥି ସହିତ ଯୋଜନା କାର୍ଯ୍ୟକାରୀ ବେଳେ ବିଭିନ୍ନ ବାବଦରେ ସରକାରଙ୍କ ବିଭିନ୍ନ ବିଭାଗ କୋଟି କୋଟି ଟଙ୍କା ଖର୍ଚ୍ଚ କରିଥିଲେ। କାଳିଆ ଯୋଜନା ଖର୍ଚ୍ଚର ଅଡିଟ ପାଇଁ ୨୦୧୯ରେ ପ୍ରକ୍ରିୟା ଆରମ୍ଭ କରାଯାଇଥିଲା। କିନ୍ତୁ ଅଡିଟ ଅଧାରୁ ଅଟକି ଥିଲା। ଏହି ଅଡିଟ୍ ସଂପୂର୍ଣ୍ଣ କରିବା ପାଇଁ ପ୍ରିନ୍ସିପାଲ ଆକାଉଣ୍ଟାଣ୍ଟ ଜେନେରାଲ (ଇକୋନୋମିକ ଆଣ୍ଡ ରେଭିନ୍ୟୁ ସେକ୍ଟର ଅଡିଟ୍)ଙ୍କୁ ନିର୍ଦ୍ଦେଶ ଦିଆଯାଉ ଦର୍ଶାଇ ହାଇକୋର୍ଟରେ ବଲ୍ଲଭ ଚରଣ ସାହୁ ମାମଲା ରୁଜୁ କରିଥିଲେ। ଏହି ମାମଲାରେ ଥିବା ପ୍ରସଂଗ ଜନସ୍ବାର୍ଥ ସଂପର୍କିତ ହୋଇଥିବା ଦୃଷ୍ଟିରୁ ଉପଯୁକ୍ତ ଖଣ୍ଡପୀଠରେ ଆବେଦନର ଶୁଣାଣି ପାଇଁ ଜଷ୍ଟିସ ସଂଜୀବ କୁମାର ପାଣିଗ୍ରାହୀ ନିର୍ଦ୍ଦେଶ ଦେଇଛନ୍ତି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଅରବିନ୍ଦ ମହାନ୍ତି ମାମଲା ପରିଚାଳନା କରୁଛନ୍ତି।

ମାମଲାର ବିବରଣୀରୁ ପ୍ରକାଶ ଯେ କୃଷକଙ୍କ ପାଇଁ ସରକାର କାଳିଆ ଯୋଜନା ଆରମ୍ଭ କରିବା ନେଇ ୨୦୧୮ରେ ଘୋଷଣା କରିଥିଲେ। କାଳିଆ ଯୋଜନା ପାଇଁ ରାଜ୍ୟର କଣ୍ଟିନଜେନ୍ସି ଫଣ୍ଡରୁ ଅର୍ଥ ଖର୍ଚ୍ଚ କରାଯାଇଥିଲା। ପ୍ରାଥମିକ ପର୍ଯ୍ୟାୟରେ କାଳିଆ ଯୋଜନାରେ ୫୧ ଲକ୍ଷ ୫ ହଜାର ୨୯୦ ଜଣ ହିତାଧିକାରୀଙ୍କୁ ୫ ହଜାର ଟଙ୍କା ଲେଖାଏ ପ୍ରଦାନ ପାଇଁ ଚୟନ କରାଯାଇଥିଲା। ଏଥିରୁ ୫ ଲକ୍ଷ ୭ ହଜାର ୮୧୮ ଜଣ ହିତାଧିକାରୀ ଅଯୋଗ୍ୟ ବୋଲି ସ୍ପଷ୍ଟ ହୋଇଥିଲା। ଏପରି ହିତାଧିକାରୀଙ୍କୁ ୨୫୩ କୋଟି ୯୦ ଲକ୍ଷ ୯୦ ହଜାର ଟଙ୍କା ପ୍ରଦାନ କରାଯାଇଥିଲା ବୋଲି ଆବେଦନକାରୀ ଦର୍ଶାଇଛନ୍ତି। ଏଥି ସହିତ କାଳିଆ ଯୋଜନା‌ର ପ୍ରଚାର ପ୍ରସାର ପାଇଁ କୋଟି କୋଟି ଟଙ୍କା ବିଭିନ୍ନ ପ୍ରକାରର ବିଜ୍ଞାପନରେ ଖର୍ଚ୍ଚ କରାଯାଇଥିଲା। କାଳିଆ ଖର୍ଚ୍ଚର ଅଡିଟ୍ ପାଇଁ ପ୍ରିନ୍ସିପାଲ ଆକାଉଣ୍ଟାଣ୍ଟ ଜେନେରାଲ ୨୦୧୯ରେ ନିର୍ଦ୍ଦେଶ ଦେବା ପରେ ଅଡିଟ ଆରମ୍ଭ ହୋଇଥିଲା। କିନ୍ତୁ କେଉଁ ପରିସ୍ଥିତିରେ ଅଡିଟ ଅଟକି ଥିଲା ତାହା ଅସ୍ପଷ୍ଟ। କେତେକ ବିଭାଗ ଅଡିଟରଙ୍କୁ ତଥ୍ୟ ଦେଇ ନଥିଲେ ବୋଲି ଅଭିଯୋଗ ହୋଇଥିଲା। ଏଭଳି ସ୍ଥିତିରେ ଅଡିଟ ହେଲେ କାଳିଆ ଯୋଜନାରେ କେତେ ଆର୍ଥିକ ଅନିୟମିତତା ହୋଇଛି ସ୍ପଷ୍ଟ ହେବ ବୋଲି ଆବେଦନକାରୀ ଦର୍ଶାଇବା ସହିତ ସ୍ବତନ୍ତ୍ର ଅଡିଟ୍ ସଂପୂର୍ଣ୍ଣ କରିବାକୁ ନିର୍ଦ୍ଦେଶ ଦିଆଯାଉ ବୋଲି ପ୍ରାର୍ଥନା କରିଛନ୍ତି।