କଲମପୂର ବ୍ଲକ ମଣ୍ଡଳ ସ୍ଥିତ ପରୀ ଏଗ୍ରୋ ସେଲ୍ସ ଉପରେ କୃଷିବିଭାଗର ଚଢ଼ାଉ

କଲମପୂର: କଲମପୂର ବ୍ଲକ ଅନ୍ତର୍ଗତ ମଣ୍ଡଳ ଠାରେ ଥିବା ପରୀ ଏଗ୍ରୋ ସେଲ୍ସ ଉପରେ କଲମପୁର ବ୍ଲକ କୃଷି ବିଭାଗ ତରଫରୁ ଚଢ଼ାଉ କରାଯାଇଛି। ବେନିୟମ ଭାବେ କିଛି କୃଷି ଉପଯୋଗୀ କୀଟନାଶକ ବିକ୍ରୟ କରୁଥିବା ନେଇ ଅଭିଯୋଗ ହେଇଥିଲା। ଏହି ଅଭିଯୋଗକୁ ଭିତ୍ତି କରି କଲମପୂର ବ୍ଲକ ସହକାରୀ କୃଷି ଅଧିକାରୀ ସୁଜାତା ଛତ୍ରିଆଙ୍କ ନେତୃତ୍ବରେ ଏହି ଚଢାଉ କରାଯାଇଛି। ଚଢ଼ାଉ ସମୟରେ ସିଜେଣ୍ଟା ଏଗ୍ରୋ ପ୍ରଡକ୍ଟସ୍ କମ୍ପାନୀର କିଛି କୀଟନାଶକ ଉପଲବ୍ଧ ଥିଲା। ଏହି କମ୍ପାନୀର ସାମଗ୍ରୀ ବିକ୍ରୀ କରୁଥିବା ନେଇ କୌଣସି କାଗଜାତ ଦେଖାଇ ପାରିନଥିଲେ। ଯାହା ବେନିୟମ ଅଟେ। ଏହି ସମସ୍ତ ସାମଗ୍ରୀ ସେ ଜୟପାଟଣା ସ୍ଥିତ ଆର୍. କେ ଏଗ୍ରୋରୂ ଆଣି ବିକ୍ରୀ କରୁଥିବା ସୁଚନା ଦେଇଥିଲେ। କିନ୍ତୁ ଉଭୟ ଆର୍.କେ ଏଗ୍ରୋ ଅଥବା ପରୀ ଏଗ୍ରୋ ସେଲ୍ସ ସିଞ୍ଜେଣ୍ଟା ଏଗ୍ରୋ ପ୍ରଡକ୍ଟସ୍ କମ୍ପାନୀର ଅଧିକୃତ ବିକ୍ରେତା ନୁହନ୍ତି ଓ ବେନିୟମ ଭାବେ ଏ ସମସ୍ତ ସାମଗ୍ରୀ ବିକ୍ରୀ କରୁଛନ୍ତି ବୋଲି ସିଞ୍ଜେଣ୍ଟା ଏଗ୍ରୋ ପ୍ରଡକ୍ଟସ୍ ର କ୍ଷେତ୍ର ଅଧିକାରୀ ରବୀନ୍ଦ୍ର ରାଉତ ସୁଚନା ଦେଇଛନ୍ତି।

ଇନ୍ଦ୍ରାବତୀ ଜଳସେଚନ ପ୍ରକଳ୍ପ କାର୍ଯ୍ୟକାରୀ ହେବା ପରେ ଗତ ୨୨ ବର୍ଷ ଧରି କଲମପୁର ଅଞ୍ଚଳରେ ଦୁଇ ଫସଲୀ ଚାଷ କରାଯାଉଛି। ଯେଉଁଥିପାଇଁ କଲମପୁର ଅଞ୍ଚଳରେ ଅନେକ ନାମୀ ବେନାମୀ କମ୍ପାନୀ ମାନେ ସେମାନଙ୍କ ପସରା ମେଲି ଦେଇଛନ୍ତି। ଅନେକ ସମୟରେ ବେନାମୀ କମ୍ପାନୀର ଭେଜାଲ ସାମଗ୍ରୀ ଖରିଦ୍ କରି ଚାଷୀ ଶୋଷଣର ଶିକାର ହେଉଥିବା ବେଳେ ସରକାର କୋଟିକୋଟି ଟଙ୍କାର ରାଜସ୍ୱ ହରାଉଛନ୍ତି। ଏହି ଚଢାଉ ସମୟରେ କୃଷି ବିଭାଗର କର୍ମଚାରୀ ଓ ସିଞ୍ଜେଣ୍ଟା ଏଗ୍ରୋ ପ୍ରଡକ୍ଟସ୍ କମ୍ପାନୀର କର୍ମକର୍ତ୍ତାମାନେ ଉପସ୍ଥିତ ଥିଲେ।

Comments are closed.