ରଶି ଦ୍ୱାରା ଟଙ୍ଗା ହେଇଥିବା ଅବସ୍ଥାରେ ମିଳିଲା ଦାଦନ ଶ୍ରମିକଙ୍କ ମୃତଦେହ, ହତ୍ୟା ନା ଆତ୍ମହତ୍ୟା କାରଣ ଅସ୍ପଷ୍ଟ

କଲମପୁର: କଳାହାଣ୍ଡିରେ ଦାଦନ ସମସ୍ୟା ସମାଧାନ ପରିବର୍ତ୍ତେ ଦିନକୁ ଦିନ ଜଟିଳ ହେବାରେ ଲାଗିଛି। କେତେବେଳେ ଦାଦନ ଖଟିବାକୁ ଯାଇ କଳାହାଣ୍ଡିରର ଶ୍ରମିକ ହାତ ଗୋଡ କଟା ହେଇ ଫେରୁଛି ତ କେତେବେଳେ ନିଖୋଜ ହେଇଯାଉଛି। ପୁଣି କେତେବେଳେ ଶ୍ରମିକଙ୍କ ମୃତଦେହ ଫେରୁଛି। ଏବେ ପୁଣି ଜଣେ ଯୁବ ଶ୍ରମିକଙ୍କ ମୃତ ଦେହ ଫେରୁଥିବା ଘଟଣା କଲମପୁର ଅଞ୍ଚଳରେ ଆଲୋଡନ ସୃଷ୍ଟି କରିଛି।
ପ୍ରାପ୍ତ ସୂଚନା ଅନୁସାରେ କଲମପୁର ବ୍ଲକ ଅଧିନସ୍ଥ ମିନଗୁର ପଞ୍ଚାୟତ ଅନ୍ତର୍ଗତ ଭଇଁରୀ ଗ୍ରାମର ୰ପ୍ରଭୁଲାଲ ଛତ୍ରିଆଙ୍କ ୨୨ ବର୍ଷିୟ ପୁଅ ପ୍ରଦ୍ୟୁମ୍ନ ଘରେ ଥିବା ବୃଦ୍ଧା ମାଁ ଓ ଭଉଣୀଙ୍କ ଚଳିବା ପାଇଁ ସୁଦୂର ହାଇଦ୍ରାବାଦକୁ ଯାଇ ମେଘା ଇଞ୍ଜିନିୟରିଂ ପ୍ରାଇଭେଟ ଲିମିଟେଡରେ କାମ କରୁଥିଲା। କିନ୍ତୁ ଗତ ଶନିବାର ରାତିରେ ସେ ଶୋଇଥିବା ଏକ କୋଠରୀରେ ରଶି ଦ୍ୱାରା ଟଙ୍ଗା ହେଇଥିବା ଅବସ୍ଥାରେ ତାର ମୃତଦେହ ମିଳିଥିଲା। ସାଙ୍ଗରେ ଥିବା କିଛି ଶ୍ରମିକ କମ୍ପାନୀ କର୍ତ୍ତୃପକ୍ଷଙ୍କ ସମେତ ପୁଲିସକୁ ସୂଚନା ଦେଇଥିଲେ। ପୁଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ସ୍ଥାନୀୟ ଚିକିତ୍ସାଳୟକୁ ପଠାଇଥିଲେ।

 

କେଉଁ ପରିସ୍ଥିତିରେ ପ୍ରଦ୍ୟୁମ୍ନଙ୍କ ମୃତ୍ୟୁ ହୋଇଛି, ସେ ଆତ୍ମହତ୍ୟା କରିଛି ନା ତାଙ୍କୁ ହତ୍ୟା କରାଯାଇ ଆତ୍ମହତ୍ୟାର ରୂପ ଦିଆଯାଉଛି ତାହା ତଦନ୍ତ ସାପେକ୍ଷ। ତାଙ୍କୁ କେହି ଦୁର୍ବୁତ ହତ୍ୟାକରି ଆତ୍ମହତ୍ୟାର ରୂପ ଦେବା ପାଇଁ ଏଭଳି କରିଥାଇପାରେ ବୋଲି ପରିବାର ତରଫରୁ ଅଭିଯୋଗ କରାଯାଉଛି। କମ୍ପାନୀ ତରଫରୁ ଏକ ଆମ୍ବୁଲେନ୍ସ ଯୋଗେ ମୃତକର ଶବକୁ ଗାଁକୁ ଅଣାଯାଉଥିବା ସୂଚନା ମିଳିଛି।

Comments are closed.