ଶୁଣିଲାନି ପ୍ରଶାସନ : ନିଜସ୍ବ ଉଦ୍ୟମରେ ୫ କିମି ରାସ୍ତା ନିର୍ମାଣ କରୁଛନ୍ତି ଟୁରିସେମେଲ ଗ୍ରାମବାସୀ

କଳାହାଣ୍ଡି : ହାତରେ ଖଣତି ଓ କୋଦାଳ , ମୁଣ୍ଡରେ ଝୋଡି ଧରି ସକାଳୁ ସକାଳୁ ଶହ ଶହ ମହିଳା ପୁରୁଷ ବାହାରିଛନ୍ତି ଶ୍ରମ ଦାନ କରି । କାରଣ ଦୀର୍ଘ ଦିନ ହେଲା ପ୍ରଶାସନ ଶୁଣିଲା ନାହିଁ । ତେଣୁ ପ୍ରଶାସନକୁ ଅପେକ୍ଷା ନ କରି ଗ୍ରାମବାସୀ ୫ କିମି ରାସ୍ତା ନିର୍ମାଣ ପାଇଁ ନିଷ୍ପତ୍ତି ନେଇଛନ୍ତି। ଏ ହେଲା କଳାହାଣ୍ଡି ଜିଲା ଆଦିବାସୀ ଅଧୁଷିତ ମାଓପ୍ରବଣ ଲାଞ୍ଜିଗଡ଼ ବ୍ଲକ ମାଲିଜୁବାଙ୍ଗ ପଞ୍ଚାୟତ ଟୁରିସେମେଲ ଗାଁ । ଗାଁରେ ପ୍ରାୟ ୫୦ ଘର ଓ ୨୫୦ ଜନସଂଖ୍ୟା। ହେଲେ ଗାଁକୁ ରାସ୍ତା ନାହିଁ। ଫଳରେ ଗ୍ରାମବାସୀ ଦୀର୍ଘ ଦିନ ହେଲା ନିର୍ବାଚିତ ପ୍ରତିନିଧି ଠାରୁ ଜିଲ୍ଲା ପ୍ରଶାସନକୁ ଗୁହାରୀ କରି ସଫଳ ନ ହେବାରୁ ନିଜେ ରାସ୍ତା ନିର୍ମାଣ ପାଇଁ ନିଷ୍ପତ୍ତି ନେଇ ଆରମ୍ଭ କରିଛନ୍ତି ରାସ୍ତାକାମ। ପରିବାରରୁ ଜଣେ ସଦସ୍ୟ ଦୈନିକ ଶ୍ରମଦାନ କରି ପ୍ରାୟ ୫ କିମି ପାହାଡ କାଟି ରାସ୍ତା ନିର୍ମାଣ କରିବେ ଏବଂ ପୁଇଗୁଡା ଗ୍ରାମ ପର୍ଯ୍ୟନ୍ତ ରାସ୍ତା ସଂଯୋଗ କରିବେ ବୋଲି ନିଷ୍ପତ୍ତି ନେଇଛନ୍ତି।

ଗ୍ରାମବାସୀ ମଧ୍ୟରୁ ଏହି ଶ୍ରମଦାନରେ ଭାଗ ନେଉ ନ ଥିବା ପରିବାରକୁ ଦୈନିକ ୧୦୦ ଟଙ୍କା ଜୋରିମାନା ବ୍ୟବସ୍ଥା କରିଛନ୍ତି ଏବଂ ଆଶା ରଖିଛନ୍ତି ୩ ମାସ ମଧ୍ୟରେ ଏହି ରାସ୍ତା ସମ୍ପୂର୍ଣ୍ଣ କରିବେ ବୋଲି। ଏହି ରାସ୍ତା ନିର୍ମାଣ ହେଲେ ରୋଗୀଙ୍କୁ ଆଉ ଭାରରେ ବୋହିବାକୁ ପଡିବ ନାହିଁ ନା ପାଠ ପଢା ପାଇଁ ଛାତ୍ରଛାତ୍ରୀ ରାସ୍ତା ନ ଥବାରୁ ବଞ୍ଚିତ ରହିବେ ନାହିଁ। ଗ୍ରାମବାସୀଙ୍କ ଏଭଳି ଶ୍ରମଦାନରେ ରାସ୍ତା ନର୍ମାଣ ଅନ୍ୟ ଅଞ୍ଚଳମାନଙ୍କ ପାଇଁ ପ୍ରେରଣା ସାଜିଛି। ସ୍ବାଧୀନତା ଦିର୍ଘ ବର୍ଷ ପରେବି ଲାଞ୍ଜିଗଡ ଅଞ୍ଚଳବାସୀ ବିକାଶର ଆଲୋକ ଆଜି ପର୍ଯ୍ୟନ୍ତ ଦେଖିପାରି ନାହାନ୍ତି । ଶେଷରେ ଗ୍ରାମବାସୀ ଦେଢ ମାସରୁ ଅଧିକ ହେବ ରାସ୍ତା ନିର୍ମାଣ କାର୍ଯ୍ୟରେ ଲାଗିପଡିବା ସହ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି ।