ଭୁବନେଶ୍ୱର : ରାଜ୍ୟ ବିଜେପିରେ କେହି ଚେହେରା ନାହାନ୍ତି ବୋଲି ଯେଉଁ ଚର୍ଚ୍ଚା ଦୀର୍ଘଦିନ ଧରି ଚାଲି ଆସିଥିଲା ସେଥିରେ ମଙ୍ଗଳବାର ଭଟ୍ଟା ପଡିଛି। ରାଜ୍ୟ ବିଜେପିର ଚେହେରା ଧର୍ମେନ୍ଦ୍ର ପ୍ରଧାନ ଓ ସେ ଦଳର ଆଗାମୀ ମୁଖ୍ୟମନ୍ତ୍ରୀ ପ୍ରାର୍ଥୀ ବୋଲି କେନ୍ଦ୍ରମନ୍ତ୍ରୀ ଜୁଏଲ ଓରାମ କହିଛନ୍ତି। ରାଜ୍ୟରେ ସୁଶାସନ ଫେରାଇ ଆଣିବାପାଇଁ ଆମକୁ ସଙ୍ଗଠନ ହେବାକୁ ପଡିବ। ଧର୍ମେନ୍ଦ୍ରଙ୍କ ନେତୃତ୍ୱରେ ଦଳ ନିର୍ବାଚନ ଲଢ଼ିବ ବୋଲି ଶ୍ରୀ ଓରାମ କହିଛନ୍ତି। ଦୀର୍ଘଦିନ ପରେ ଶ୍ରୀ ଓରାମ ଏହିଭଳି ବକ୍ତବ୍ୟ କାହିଁକି ଦେଲେ ସେନେଇ ରାଜନୈତିକ ମହଲରେ ଚର୍ଚ୍ଚା ଧରିଛି। ଗୋଟିଏ ପଟେ ଅବସରପ୍ରାପ୍ତ ପ୍ରଶାସକ ଅପରାଜିତା ଷଡ଼ଙ୍ଗୀ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ନେତୃତ୍ୱକୁ ମାନି ଆଜି ବିଧିବଦ୍ଧ ଭାବେ ଦଳରେ ସାମିଲ ହୋଇଛନ୍ତି। ଅନ୍ୟପଟେ କେନ୍ଦ୍ରମନ୍ତ୍ରୀ ଶ୍ରୀ ଓରାମଙ୍କ ଏହି ମନ୍ତବ୍ୟ ପଛରେ କି ରହସ୍ୟ ରହିଛି ସେନେଇ ଚର୍ଚ୍ଚା ଆରମ୍ଭ ହୋଇଛି। ଯେଉଁ ଦଳ ଏପର୍ଯ୍ୟନ୍ତ କହି ଆସୁଛି ଯେ ଦଳର ମୁଖିଆ କିଏ ହେବ ତାହା କେହି କହିପାରିବେ ନାହିଁ ଏବଂ ମୁଖ୍ୟମନ୍ତ୍ରୀ ପ୍ରାର୍ଥୀ ଦଳର ନିଷ୍ପତ୍ତି ଉପରେ ନିର୍ଭର କରୁଛି, ସେହି ଦଳର ଜଣେ ବରିଷ୍ଠ ନେତାଙ୍କ ଏଭଳି ବୟାନକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
