ଯୋଡା: ଯୋଡା କିଡ୍ଜୀ ବିଦ୍ୟାଳୟ ସମ୍ମୁଖରେ ଗତ ରବିବାର ଅପରାହ୍ନ ପ୍ରାୟ ୩.୪୫ ସମୟରେ ଏକ ଅଜଣା ବଲେରୋ ଧକ୍କାରେ ଯୋଡା ଥାନା ଅନ୍ତର୍ଗତ ମୁଖାର୍ଜୀ ହଟିଂର କୁନିଲତା ମଲ୍ଲିକ ଗମ୍ଭୀର ରୂପେ ଆହତ ହୋଇଥିଲେ। ଅତ୍ୟନ୍ତ ଗୁରୁତର ଅବସ୍ଥାରେ ଆହତଙ୍କୁ ପ୍ରଥମେ ଯୋଡା କେନ୍ଦ୍ରୀୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ସେଠାରେ ଆହତଙ୍କ ଅବସ୍ଥା ଅତ୍ୟନ୍ତ ସଙ୍କଟାପର୍ଣ୍ଣ ଥିବାରୁ କୁନିଲତାଙ୍କୁ ତୁରନ୍ତ କଟକ ବଡ ମେଡିକାଲ ସ୍ଥାନାନ୍ତରଣ କରାଯାଇଥିଲା। ତେବେ ସେଠାରେ ମଧ୍ୟ କୁନିଲତାଙ୍କ ସ୍ୱାସ୍ଥ୍ୟାବସ୍ଥା ଖରାପ ଆଡକୁ ଯାଉଥିବାରୁ ଗତକାଲି କୁନିଲତାଙ୍କୁ ବଡମେଡିକାଲ ଆଇସିୟୁ ୱାର୍ଡରେ ଭର୍ତ୍ତି କରାଯାଇ ଚିକିତ୍ସା କରାଯାଉଥିବାର ସୂଚନା ମିଳିଛି। ତେବେ କୁନିଲତା କୋମା ସ୍ଥିତିରେ ଥିବା ଖବର ପ୍ରଚାରିତ ହେବା ମାତ୍ରେ ଶୁକ୍ରବାର ପୂର୍ବାହ୍ନ ୭ଟାରେ ମୁଖାର୍ଜୀ ହଟିଂର ଶତାଧିକ ଅଧିବାସୀ ଯୋଡା ବସ୍ଷ୍ଟାଣ୍ଡରୁ କଳାପାହାଡକୁ ସଂଯୋଗ କରୁଥିବା ରାସ୍ତାର ତାରିଣୀ ଛକ ନିକଟରେ ରାସ୍ତାରେ ଟାୟାର ଜାଳି ରାସ୍ତା ଅବରୋଧ କରିଥିଲେ। ଅଜଣା ବଲେରୋ ଚିହ୍ନଟ ସମେତ ଅସହାୟ ବିଧବା ମହିଳା କୁନିଲତାର ଚିକିତ୍ସା ଖର୍ଚ୍ଚ ଦାବିରେ ସ୍ଥାନୀୟ ବାସୀନ୍ଦା ଏହି ଆନ୍ଦୋଳନ ଚଳାଇଥିବା ପ୍ରକାଶ।
ଖବର ପାଇ ଯୋଡା ଆଇଆଇସି ମନୋଜ କୁମାର ରାଉତ୍ ଘଟଣା ସ୍ଥଳରେ ପହଞ୍ଚି କୁନିଲତାଙ୍କ ଚିକିତ୍ସା ନିମନ୍ତେ ୫୦୦୦୦ ଟଙ୍କା ସହାୟତା ରାଶି ଘୋଷଣା କରିବା ସହ ଖୁବ୍ଶୀଘ୍ର ଅଜଣା ବଲେରୋଟିର ଠାବ୍ ନିମନ୍ତେ ପ୍ରତିଶ୍ରୁତି ପ୍ରଦାନ କରିବା ପରେ ଦୁଇ ଘଣ୍ଟା ଧରି ଚାଲିଥିବା ରାସ୍ତାରୋକ୍ ଆନ୍ଦୋଳନ ପ୍ରତ୍ୟାହୃତ ହୋଇଥିବା ଖବର ମିଳିଛି। ସୂଚନା ଯୋଗ୍ୟ, କୁନିଲତାଙ୍କ ସ୍ୱାମୀ ରତିକାନ୍ତ ମଲ୍ଲିକ ଆଠ ବର୍ଷ ତଳେ ଇହଲୀଳା ସମ୍ବରଣ କରିଛନ୍ତି। ତେବେ କୁନିଲତା ଅନ୍ୟ ଘରେ ପାଇଟି କରି ସ୍ୱାମୀଙ୍କ ଅନ୍ତେ ତିନୋଟି ନାବାଳକ ପିଲାଙ୍କର କଷ୍ଟେମଷ୍ଟେ ଭରଣ ପୋଷଣ କରୁଥିବା ସମୟରେ ସ୍ୱାମୀଙ୍କ ଅମଳରେ ତିଆରି ହୋଇଥିବା ଏକ ଜରାଜୀର୍ଣ୍ଣ ଘରେ ରୁହନ୍ତି।
Comments are closed.