ଆଇଜଲ: ମିଜୋରାମ ବାସିନ୍ଦା ଜିଓନା ଚାନା। ବିଶ୍ୱର ଅନ୍ୟତବ ସର୍ବବୃହତ ପରିବାର ସୃଷ୍ଟି କରିଥିବା ବ୍ୟକ୍ତିଙ୍କ ମଧ୍ୟରେ ଅନ୍ୟତମ। ତାଙ୍କର ୩୮ ଜଣ ପତ୍ନୀ, ୮୯ ଜଣ ପୁଅ ଝିଅ ଏବଂ ୩୩ ଜଣ ନାତି ନାତୁଣୀ ଏବଂ କିଛି ଅଣ ନାତି ନାତୁଣୀ ମଧ୍ୟ ଅଛନ୍ତି। ତଥାପି ପରିବାର ସଂଖ୍ୟା ବୃଦ୍ଧି କରିବା ନିଶାରୁ ସେ ଓହରି ନଥିଲେ। ଦୁର୍ଭାଗ୍ୟକୁ ୭୬ ବର୍ଷ ବୟସରେ ରବିବାର ଦିନ ତାଙ୍କର ପରଲୋକ ଘଟିଛି। ମିଜୋରାମ ମୁଖ୍ୟମନ୍ତ୍ରୀ ଜୋରାମଥାଙ୍ଗା ଟ୍ୱିଟ୍ କରି ଜିଓନାଙ୍କ ମୃତ୍ୟୁଖବର ଜଣାଇଛନ୍ତି।
ଜିଓନା ଥିଲେ ମିଜୋରାମ ରାଜଧାନୀ ଆଇଜଲଠାରୁ ୧୦୦ କିଲୋମିଟର ଦକ୍ଷିଣକୁ ଅବସ୍ଥିତ ବାକତ୍ୱାଙ୍ଗ ଗ୍ରାମର ବାସିନ୍ଦା। ୧୯୪୫ ଜୁଲାଇ ୨୧ରେ ତାଙ୍କର ଜନ୍ମ ହୋଇଥିଲା। ୧୭ ବର୍ଷ ବୟସରେ ସେ ପ୍ରଥମ ପତ୍ନୀ ଜାଥିଆଙ୍ଗିଙ୍କୁ ବିବାହ କରିଥିଲେ, ଯିଏ ଜିଓନାଙ୍କ ଠାରୁ ବୟସରେ ତିନିବର୍ଷ ବଡ ଥିଲେ। ପରେ ସେ ଜଣକ ପରେ ଜଣକୁ ବିବାହ କରିଚାଲିଲେ ଏବଂ ତାଙ୍କ ପରିବାର ସଂଖ୍ୟା ବଢିଚାଲିଲା। ପରିବାରର ସମସ୍ତ ସଦସ୍ୟଙ୍କୁ ଏକତ୍ର ଗୋଟିଏ ସ୍ଥାନରେ ରଖିବାକୁ ସେ ଏକ ଚାରିମହଲା କୋଠା ମଧ୍ୟ ତିଆରି କରିଥିଲେ। ତାଙ୍କ ଘରର ନାମ ‘ଛୁଆନ୍ ଥାର ରନ୍’, ଅର୍ଥାତ ନୂଆ ପିଢିଙ୍କ ଘର ଏବଂ ଏହା ମିଜୋରାମର ପାର୍ବତ୍ୟାଞ୍ଚଳ ବାକତ୍ୱାଙ୍ଗ ଗ୍ରାମରେ ଅବସ୍ଥିତ। ଜିଓନା ଯେଉଁ ଧାର୍ମିକ ସମୁଦାୟର ଥିଲେ ଉକ୍ତ ସମୁଦାୟର ଆଉ ପ୍ରାୟ ୪୦୦ ଲୋକ ଅଛନ୍ତି। ଏକଦା ଜିଓନା କହିଥିଲେ, ସେ ତାଙ୍କ ଧାର୍ମିକ ସମୁଦାୟ ଲୋକସଂଖ୍ୟା ବୃଦ୍ଧି କରିବାକୁ ଜଣକ ପରେ ଜଣକୁ ବିବାହ କରିଚାଲିବେ ଏବଂ ଦରକାର ପଡିଲେ ଆମେରିକା ଯାଇ ମଧ୍ୟ ବିବାହ କରିବେ। ସାମ୍ବାଦିକଙ୍କ ନିକଟରେ ପ୍ରକାଶ କରି ତାଙ୍କର ଜଣେ ପୁଅ କହିଥିଲେ, ଚାନାଙ୍କ ଜେଜେ ବାପା ମଧ୍ୟ ଏକାଧିକ ଯୁବତୀଙ୍କୁ ବିବାହ କରିଥିଲେ। ସେ ତାଙ୍କ ଗ୍ରାମର ଦରିଦ୍ର ମହିଳାମାନଙ୍କୁ ବିବାହ କରୁଥିଲେ, କାରଣ ସେମାନଙ୍କୁ ସେ ଦୁଇ ଓଳି ପେଟପୁରା ଖାଇବାକୁ ଦେଇପାରିବେ।
Comments are closed.