ଝାରସୁଗୁଡ଼ା : ଝାରସୁଗୁଡ଼ା ବନ ଉନ୍ନୟନ ନିଗମ(ଓଏଫଡିସି)ର ସବ-ଡିଭିଜନାଲ ମ୍ୟାନେଜର ବାସୁଦେବ ପାଲଙ୍କର ଆକସ୍ମିକ ମୃତ୍ୟୁ ଘଟଣାରେ ପରିବାର ଲୋକଙ୍କ ଅଭିଯୋଗ କ୍ରମେ ଉପରିସ୍ଥ ଅଧିକାରୀଙ୍କ ନାମରେ ହତ୍ୟା ମାମଲା ରୁଜୁ କରାଯାଇଛି । ଟାଉନ ଥାନା କେସ୍ ନମ୍ବର ୮୬୩/୨୦ରେ ଆଇପିସି ଧାରା ୩୦୨ ଆଧାରରେ ଏକ ମାମଲା ରୁଜୁ କରାଯାଇଛି । ଝାରସୁଗୁଡ଼ା ଅତିରିକ୍ତ ଏସପି ନୃପରାଜ ଡନସେନା କହିଛନ୍ତି ହତ୍ୟା ମାମଲା ରୁଜୁ ହୋଇଛି । ମାମଲା ତଦନ୍ତାଧୀନ ଅଛି, ସବିଶେଷ ତଦନ୍ତ ପରେ ଅଭିଯୋଗର ସତ୍ୟତା ଜଣାପଡ଼ିବ ବୋଲି କହିଛନ୍ତି । ଅନ୍ୟପକ୍ଷରେ ମୃତକ ବାସୁଦେବଙ୍କ ପରିବାର ଲୋକେ ଶବ ବ୍ୟବଚ୍ଛେଦ ପାଇଁ ଅନୁମତି ନ ଦେବାରୁ ସଦର ଡାକ୍ତରଖାନା ପରିସରରେ ଦୀର୍ଘ ୨୪ଘଣ୍ଟା ଧରି ଶବ ପଡ଼ି ରହିଥିଲା । ବନ ବିଭାଗର ଉପରିସ୍ଥ ଅଧିକାରୀ ନ ଆସିବା ଯାଏ ଶବ ଛାଡ଼ିବେ ନାହିଁ ବୋଲି ତାଙ୍କ ଝିଅମାନେ ଜିଦ୍ ଧରି ବସିଥିଲେ । ଶେଷରେ ଆଜି ଅପରାହ୍ନରେ ପୁଲିସ ଅଧିକାରୀମାନେ ବହୁତ ବୁଝାଶୁଝା କରିବା ପରେ ଶବ ଛାଡ଼ିଥିଲେ । ଅନ୍ୟପକ୍ଷରେ ବାପାଙ୍କ ମୃତ୍ୟୁରେ ମ୍ରିୟମାଣ ହୋଇ ଫିନାଇଲ ପି’ ଦେଇଥିବା ସାନ ଝିଅ ଲକ୍ଷ୍ମୀପ୍ରିୟାଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଥିବା ଜଣାଯାଇଛି ।
ପରିବାର ଲୋକେ ଥାନାରେ ଦେଇଥିବା ଏତଲା ଅନୁସାେର ଓଏଫଡିସିରେ ସବ୍ ଡିଭିଜନାଲ ମାଜିଷ୍ଟ୍ରେଟ ଥିବା ବାସୁଦେବଙ୍କୁ ଡିଭିଜନାଲ ମ୍ୟାନେଜର ଅମିୟ କୁମାର ପଟ୍ଟନାୟକ ଅତ୍ୟଧିକ କାର୍ଯ୍ୟଭାର ଦେବା ସହ ନାନା ପ୍ରକାର ମାନସିକ ନିର୍ଯାତନା ଦେଇ ଆସୁଥିଲେ । ସୋମବାର ମଧ୍ୟରାତ୍ରି ଯାଏଁ କାମ କରିବା ପରେ ମଙ୍ଗଳବାର ଭୋର ୪ଟାରୁ ୮ଟା ଯାଏ ଅଫିସରେ କାମ କରିଥିଲେ । ଏହାସତ୍ତ୍ବେ ପୂର୍ବାହ୍ନ ସାଢ଼େ ୧୦ଟାରେ ଅଫିସକୁ ଯିବା ପରେ ଶ୍ରୀ ପଟ୍ଟନାୟକ ନିଜ ବାସଭବନକୁ ବାସୁଦେବଙ୍କୁ ଡକାଇ ଗାଳିଗୁଲଜ କରିବାରୁ ବାସୁଦେବ ସେଠାରେ ଅଚେତ ହୋଇଯାଇଥିଲେ । ସହକର୍ମୀମାନେ ଡାକ୍ତରଖାନା ନେଇଥିଲେ ହେଁ ଡାକ୍ତରମାନେ ମୃତ ଘୋଷଣା କରିଥିଲେ । ଏମିତିରେ ଡିଏମ୍ ଅମୀୟ ପଟ୍ଟନାୟକଙ୍କ ମାନସିକ ନିର୍ଯାତନା ଫଳରେ ବାପାଙ୍କ ମୃତ୍ୟୁ ହୋଇଥିବା ତାଙ୍କ ଝିଅ ତନୁଜା ଏଫଆଇଆରରେ ଉଲ୍ଲେଖ କରିଛନ୍ତି । ତେବେ ଉପରିସ୍ଥ ଅଧିକାରୀ ଶ୍ରୀ ପଟ୍ଟନାୟକ ଫେରାର୍ ମାରିଥିବା ଜଣାଯାଇଛି ।
Comments are closed.