ପୁଲିସର ଧିମା ତଦନ୍ତରେ ଅସନ୍ତୋଷ ବ୍ୟକ୍ତ କଲେ ଝରାଫୁଲଙ୍କ ବାପା ରମାକାନ୍ତ

ଝରାଫୁଲଙ୍କ ଗାଁରେ କୁଆଖିଆ ପୁଲିସ

ରସୁଲପୁର : ଝରାଫୁଲ ନାୟକ ମୃତ୍ୟୁ ଘଟଣା ଏହା ମଧ୍ୟରେ ୧୮ଦିନ ବିତିଯାଇଥିଲେ ମଧ୍ୟ ଏହି ଘଟଣାର ତଦନ୍ତ କରୁଥିବା କୁଆଖିଆ ଥାନା ପୁଲିସ ଗିରଫ କରିଥିବା ମୁଖ୍ୟ ଅଭିଯୁକ୍ତ ରାକେଶର ସହଯୋଗୀ ଅଭିଯୁକ୍ତ ଶକ୍ତିଶେଖର ସ୍ୱାଇଁକୁ ଗିରଫ କରିପାରିନାହିଁ। ଝରାଫୁଲର ମୋବାଇଲଟି ଏଯାବତ ଉଦ୍ଧାର ହୋଇନି। ଏ ସମ୍ପର୍କରେ ମନସ୍ତାପରେ ରହିଛନ୍ତି ଝରାଫୁଲର ବାପା ରମାକାନ୍ତ। ଭୁବନେଶ୍ୱରରେ କଟାମୁଣ୍ଡ ଘଟଣାରେ ମୃତ ମହିଳାଙ୍କ ପରିଚୟ ଜାଣିବା ସକାଶେ ଫଟୋ ଛାପିବା ସହ ଘଟଣାର ତଥ୍ୟ ପ୍ରଦାନକାରୀଙ୍କୁ ୫୦ ହଜାର ଟଙ୍କା ଅର୍ଥ ପୁରସ୍କାର ଘୋଷଣା କରାଯାଇଛି। ଝରାଫୁଲର ମୃତ୍ୟୁ ଘଟଣାରେ ସମ୍ପୃକ୍ତି ଥାଇ ଦୀର୍ଘଦିନ ହେଲା ଫେରାରଥିବା ଶକ୍ତିଶେଖରର ଫଟୋ ସାର୍ବଜନୀନ କରା ନଯିବା ପରିତାପର ବିଷୟ ବୋଲି ସେ କହିଛନ୍ତି। ଆବଶ୍ୟକ ପଡିଲେ ତାଙ୍କର କିଛି ଜମି ବିକ୍ରିକରି ପୁରସ୍କାର ବାବଦକୁ ୧ଲକ୍ଷ ଟଙ୍କା ପର୍ଯ୍ୟନ୍ତ ଅର୍ଥରାଶି ପ୍ରଦାନ କରିବାକୁ ସେ ପ୍ରସ୍ତୁତ ଥିବା କହିଛନ୍ତି। ଆଜି ଅପରାହ୍ନରେ ଘଟଣାର ତଦନ୍ତକାରୀ ଅଫିସର ଯାଜପୁର ଏସଡିପିଓ ଚିନ୍ମୟକୁମାର ନାୟକଙ୍କ ନେତୃତ୍ୱରେ କେତେକ ପୁଲିସ ଅଫିସର ଝରାଫୁଲର ଗାଁ ଯଶିପୁର ଥାନା ଅନ୍ତର୍ଗତ ବୃନ୍ଦେଇପସି ଗ୍ରାମରେ ପହଞ୍ଚି ଝରାଫୁଲର ବାପା ଓ ପରିବାର ସହ ଆଲୋଚନାକରି କେତେକ ତଥ୍ୟ ହାସଲ କରି ଫେରିଛନ୍ତି। ଝରାଫୁଲ ଗତ ୨୪ ତାରିଖରେ ଗାଁରୁ ଭୁବନେଶ୍ୱର ଯିବା ଓ ୨୬ ତାରିଖ ପର୍ଯ୍ୟନ୍ତ ମୋବାଇଲରେ ବାପାଙ୍କ ସହ କ’ଣ କ’ଣ ବାର୍ତ୍ତାଳାପ ହୋଇଥିଲା ତଦନ୍ତକାରୀ ଅଫିସର ତାଙ୍କଠାରୁ ପଚାରି ବୁଝିଥିଲେ।

Comments
Loading...