ବଦଳିଲା ଜୋ ବାଇଡ଼େନଙ୍କ ସ୍ବର: ବିପଦ ସମୟରେ ଭାରତ ସହ ବନ୍ଧୁ ଭାବେ ଠିଆ ହେବି

କମଳା ହ୍ୟାରିସ ହେବେ ପ୍ରଥମ ଭାରତୀୟ-ଆମେରିକୀୟ ଉପରାଷ୍ଟ୍ରପତି

ୱାଶିଂଟନ: କାଶ୍ମୀରରେ ଧାରା ୩୭୦ ଉଚ୍ଛେଦ ପ୍ରସଙ୍ଗରେ ଏକଦା  ଭାରତ ବିରୋଧୀ ମନୋଭାବ ପ୍ରଦର୍ଶନ କରିଥିବା ଜୋ ବାଇଡ଼େନ ଆମେରିକାର ରାଷ୍ଟ୍ରପତି ପ୍ରାର୍ଥୀ ହେବା ପରେ ତାଙ୍କର ସ୍ବର ବଦଳାଇଛନ୍ତି । କେବଳ ସ୍ବର ବଦଳାଇ ନାହାନ୍ତି, ଭାରତ ସହ ସମ୍ପର୍କ ଅତୁଟ ରଖିବା ଓ ଭାରତର ବିପଦ ସମୟରେ ବନ୍ଧୁ ପରି ଠିଆ ହେବେ ବୋଲି ଘୋଷଣା କରିଛନ୍ତି । ଏହା ସହ ତାଙ୍କର ଉପରାଷ୍ଟ୍ରପତି ପ୍ରାର୍ଥୀ କମଳା ହ୍ୟାରିସ ଯଦି ନିର୍ବାଚିତ ହୁଅନ୍ତି ତେବେ ପ୍ରଥମ ଭାରତୀୟ-ଆମେରିକୀୟ ମହିଳା ଏହି ପଦରେ ଆସୀନ ହେବେ ବୋଲି ବାଇଡ଼େନ କହିଛନ୍ତି ।

ଗତକାଲି ରାତିରେ ଭାରତର ସ୍ବାଧୀନତା ଦିବସ ଅବସରରେ ଭାରତୀୟ-ଆମେରିକୀୟ ସମୁଦାୟକୁ ସମ୍ବୋଧନ ଅବସରରେ ବାଇଡ଼େନ ଭାରତ ଓ ଆମେରିକା ମଧ୍ୟରେ ରହିଥିବା ସମ୍ପର୍କକୁ ଆହୁରି ମଜବୁତ କରାଯିବ ବୋଲି କହିଛନ୍ତି । ଓବାମା ସରକାରରେ ଉପରାଷ୍ଟ୍ରପତି ଭାବରେ କାର୍ଯ୍ୟ କରିଥିବା ଜୋ ବାଇଡ଼େନ୍ କହିଛନ୍ତି ଯେ ୧୫ ବର୍ଷ ପୂର୍ବରୁ ଭାରତ ସହ ଐତିହାସିକ ବେସାମରିକ ପରମାଣୁ ବୁଝାମଣାକୁ ମଞ୍ଜୁରୀ ଦେବା ପ୍ରୟାସକୁ ସେ ନେତୃତ୍ଵ ଦେଇଥିଲେ । ଭାରତ ଓ ଆମେରିକା ଯଦି ପରସ୍ପରର ବନ୍ଧୁ ଓ ସହଯୋଗୀ ହୋଇଯିବେ ତେବେ ବିଶ୍ଵ ଅଧିକ ସୁରକ୍ଷିତ ହୋଇଯିବ । ଯଦି ସେ ନିର୍ବାଚନରେ ବିଜୟୀ ହେବେ,  ସୀମା ପରି ସମସ୍ୟା ବେଳେ ସେ ଭାରତ ସହ ଠିଆ ହେବେ । ଦୁଇ ଦେଶ ମଧ୍ୟରେ ବ୍ୟବସାୟ ବୃଦ୍ଧି ଓ ଜଳବାୟୁ ପରିବର୍ତନ ପରି ବୈଶ୍ଵିକ ପ୍ରସଙ୍ଗ ନେଇ ସେ କାମ କରିବେ ।

 ଏହି ଅବସରରେ ସେ ତାଙ୍କ ଦଳର ଉପରାଷ୍ଟ୍ରପତି ପ୍ରାର୍ଥୀ କମଳା ହ୍ୟାରିସଙ୍କର ବେଶ୍ ପ୍ରଶଂସା କରିଥିଲେ । ସେ କହିଥିଲେ କମଳା ଯଦି ନିର୍ବାଚିତ ହୁଅନ୍ତି ତେବେ ଭାରତୀୟ-ଆମେରିକୀୟ ମହିଳାଙ୍କର ବିଜୟ ହେବ । ସମସ୍ତେ ଜାଣନ୍ତି କମଳା ଅତ୍ୟନ୍ତ ବୁଦ୍ଧିମତୀ । ତାଙ୍କ ମା ଭାରତରୁ ଯାତ୍ରା ଆରମ୍ଭ କରିଥିଲେ । ତାଙ୍କର ସାହସ ତାଙ୍କ ଝିଅକୁ ଏହି ସ୍ଥାନରେ ପହଞ୍ଚାଇଛି । ମୁଁ ଜାଣିଛି ଆପଣମାନେ ଏଥିପାଇଁ ଗର୍ବ ଅନୁଭବ କରୁଥିବେ । ସେହି ଲୋକମାନଙ୍କ ପାଇଁ ମୁଁ ଦୁଃଖ ଅନୁଭବ କରୁଛି ଯେଉଁମାନେ ଘୃଣା ଅପରାଧ ଓ ଏଚ-୧ ଭିସା ଉପରେ କ୍ଷତିକାରକ ପଦକ୍ଷେପ ଉଠାଇଛନ୍ତି ।

Comments are closed.