ନୂଆଦିଲ୍ଲୀ : ଡାକ୍ତର, ନର୍ସ ଓ ଅନ୍ୟାନ୍ୟ ସ୍ୱାସ୍ଥ୍ୟ କର୍ମଚାରୀଙ୍କ ଉପରେ ଆକ୍ରମଣକୁ ରୋକିବା ଲାଗି ସ୍ୱତନ୍ତ୍ର ବିଧେୟକ ଶନିବାର ରାଜ୍ୟସଭାରେ ଗୃହୀତ ହୋଇଛି। ସ୍ୱାସ୍ଥ୍ୟମନ୍ତ୍ରୀ ଡାକ୍ତର ହର୍ଷବର୍ଦ୍ଧନ ଆଗତ କରିଥିବା ବିଧେୟକ ମହାମାରୀ ରୋଗ (ସଂଶୋଧନ) ବିଧେୟକ ୨୦୨୦ ସର୍ବସମ୍ମତିକ୍ରମେ ଗୃହୀତ ହୋଇଛି। ପୂର୍ବରୁ ଥିବା ମହାମାରୀ ରୋଗ ଆଇନ ୧୮୯୭ରେ ସଂଶୋଧନ କରାଯାଇ ନୂଆ ବିଧେୟକ ପ୍ରସ୍ତୁତ କରାଯାଇଛି। ସ୍ୱାସ୍ଥ୍ୟ କର୍ମଚାରୀଙ୍କ ଉପରେ ଆକ୍ରମଣ କରୁଥିବା ବ୍ୟକ୍ତି ବିଶେଷଙ୍କ ଉପରେ କଠୋର ଦଣ୍ଡବିଧାନ ଲାଗି ଉକ୍ତ ବିଧେୟକରେ ବ୍ୟବସ୍ଥା କରାଯାଇଛି। ବ୍ୟବସ୍ଥା ଅନୁଯାୟୀ ସ୍ୱାସ୍ଥ୍ୟ କର୍ମଚାରୀଙ୍କ ଉପରେ ଆକ୍ରମଣ କ୍ଷେତ୍ରରେ ୩ମାସରୁ ୫ବର୍ଷ ଜେଲଦଣ୍ଡ ଏବଂ ୫୦ହଜାରରୁ ୨ଲକ୍ଷ ପର୍ଯ୍ୟନ୍ତ ଜୋରିମାନା ଦେବାକୁ ପଡ଼ିବ। ଇନ୍ସପେକ୍ଟର ପାହ୍ୟାର ଜଣେ ଅଧିକାରୀ ଏହି ହିଂସା ଘଟଣାର ତଦନ୍ତ ୧ମାସ ମଧ୍ୟରେ ଶେଷ କରିବେ ଓ ମାମଲାର ବିଚାର ୧ବର୍ଷ ମଧ୍ୟରେ ଶେଷ ହେବ। କରୋନା ମହାମାରୀ ସମୟରେ ସ୍ୱାସ୍ଥ୍ୟ କର୍ମଚାରୀଙ୍କ ଉପରେ ହିଂସାତ୍ମକ କାର୍ଯ୍ୟକୁ ରୋକିବା ଲାଗି ଗତ ଏପ୍ରିଲରେ ସରକାର ଅଧ୍ୟାଦେଶ ଆଣିଥିଲେ। ଏବେ ଏହି ଅଧ୍ୟାଦେଶ ସପକ୍ଷରେ ବିଧେୟକ ଅଣାଯାଇଛି।
Comments are closed.