ଛଅ ମାସ ହେବ ଜଳୁନି ଷ୍ଟ୍ରିଟ ଲାଇଟ, ଅନ୍ଧାରରେ ଆଲୋକୀକରଣ

ନବରଙ୍ଗପୁର : ନବରଙ୍ଗପୁର ଜିଲ୍ଲା ପାପଡାହାଣ୍ଡି ସ୍ଥତ ହରିଣ ପାର୍କ ଠାରୁ ପାପଡାହାଣ୍ଡି ବସଷ୍ଟାଣ୍ଡ ଛକ ପର୍ଯ୍ୟନ୍ତ ରାସ୍ତା କଡରେ ଆଲୋକିତ କରିବା ପାଇଁ ଲକ୍ଷାଧିକ ଟଙ୍କା ବ୍ୟୟରେ ଆଜକୁ ୨ ବର୍ଷ ପୂର୍ବେ ନବରଙ୍ଗପୁର ଜିଲ୍ଲାପାଳ ଡ଼ ଅଜିତ କୁମାର ମିଶ୍ର ଙ୍କ ଉଦ୍ୟମରେ ପାର୍କ ଠାରୁ ବସଷ୍ଟାଣ୍ଡ ପର୍ଯ୍ୟନ୍ତ ପ୍ରାୟ ଏକ କିମି ଦୂରତା ମଧ୍ୟରେ ୫୦ଟି ହାଇମାସ୍କ ଲାଇଟ ଲଗାଯାଇଥିଲେ । ଏହି ଆଲୋକୀକରଣ ପରେ ସ୍ଥାନୀୟ ବାସିନ୍ଦା ଜିଲ୍ଲାପାଳଙ୍କ ମହତ ପ୍ରୟାସ ପାଇଁ ସାଧୁବାଦ ଜଣାଇଥିଲେ । ପ୍ରାୟ ଏକ କିମି ଦୁଇ ପଟ ଜଙ୍ଗଲ ପରିବେଶ ମଧ୍ୟରେ ଆଲୋକରେ  ଝଲକି ଉଠୁଥିଲା ଏହି ରାସ୍ତା । କିନ୍ତୁ ଦୁଃଖର ବିଷୟ ଆଜକୁ ପ୍ରାୟ ଛଅ ମାସରୁ ଉର୍ଦ୍ଧ୍ବ ହେବ ଅଧିକାଂଶ ଲାଇଟ ଗୁଡିକ ବନ୍ଦ ହୋଇଯିବା ଯୋଗୁଁ ରାସ୍ତା ଅନ୍ଧକାର ମୟ ହୋଇ ପଡ଼ିଛି । ଏହାକୁ ନେଇ ସ୍ଥାନୀୟ ବାସିନ୍ଦା ବିଦ୍ୟୁତ ବିଭାଗ ଏବଂ ପଂଚାୟତକୁ  ଜଣାଇ ଥିଲେ ହେଁ ଏହାର ମରାମତି ହୋଇପାରୁନାହିଁ । ଏ ନେଇ ପାପଡାହାଣ୍ଡି ବିଦ୍ୟୁତ ବିଭାଗ ଯନ୍ତ୍ରୀଙ୍କୁ ପଚାରି ବୁଝିବାରୁ ସେ କହିଥିଲେ ଯେ ପାପଡାହାଣ୍ଡି ବ୍ଲକ ସଦରମହକୁମାରେ ଜଳୁଥିବା ସମସ୍ତ ଷ୍ଟ୍ରିଟ ଲାଇଟ ଗୁଡିକର ତଦାରଖ ଦାୟିତ୍ୱ ପାପଡାହାଣ୍ଡି ପଂଚାୟତକୁ ଦିଆଯାଇଛି । ପଂଚାୟତ ସେ ଗୁଡିକର ମରାମତି ପଂଚାୟତ ଅର୍ଥରେ କରିବା ସହ ବିଦ୍ୟୁତ ବିଲ ପୈଠ କରିବ ବୋଲି ଏଗ୍ରିମେଣ୍ଟ ମଧ୍ୟ ହୋଇଅଛି । କିନ୍ତୁ ପଂଚାୟତ ବିଭାଗର ଇଛାଶକ୍ତିର ଅଭାବ ଯୋଗୁଁ ପାପଡାହାଣ୍ଡି ସଦର ମହକୁମାର ଅଧିକାଂଶ ଷ୍ଟ୍ରିଟ ଲାଇଟ ଖରାପ ହୋଇ ଅନ୍ଧାର ହୋଇଯାଇଥିବା ବେଳେ କିଛି ସାହି ମାନଙ୍କ ରେ ଷ୍ଟ୍ରିଟ ଲାଇଟ ଗୁଡିକ ଦିନ ରାତି ଜଳୁଥିବା ବେଳେ ସୁଇ ର ମରାମତି ନ କରିବା ଯୋଗୁଁ ବିଦ୍ୟୁତ ବିଲ ବାବଦରେ ଲକ୍ଷାଧିକ ଟଙ୍କା ନଷ୍ଟ ହେଉଛି । ପଂଚାୟତ ତରଫରୁ ଜଣଙ୍କୁ ବିଦ୍ୟୁତ ମରାମତି ପାଇଁ ନିଯୁକ୍ତି ଦିଆ ଯାଇଥିବା ବେଳେ ମଧ୍ୟ ମରାମତି ହେଇପାରୁନାହିଁ ଷ୍ଟ୍ରିଟ ଲାଇଟ । ଯାହା ଦ୍ୱାରା କି ଅଧିକାଂଶ ଅଂଚଳ ଅନ୍ଧାରରେ ରହିଛି। ଏଥିପାଇଁ ଅସନ୍ତୋଷ ଜାହିର କରିଛନ୍ତି ସ୍ଥାନୀୟ ବାସିନ୍ଦା । କିଛିଦିନ ପୂର୍ବେ ନବରଙ୍ଗପୁର ଜିଲ୍ଲାପାଳ ଏହି ରାସ୍ତା ଦେଇ ଉମରକୋଟରୁ ଫେରୁଥିବା ସମୟ ରେ ଷ୍ଟ୍ରିଟ ଲାଇଟ ଲାଗୁ ନଥିବା ଦେଖି ଅସନ୍ତୋଷ ପ୍ରକାଶ କରିବା ସହ ଶୀଘ୍ର ମରାମତି କରିବା ପାଇଁ ନିର୍ଦେଶ ଦେଇଥିଲେ, ପରେ ଜଣେ ମେକାନିକ ଆସି ଯାଞ୍ଚ ସମୟରେ ୫୦ଟି ଷ୍ଟ୍ରିଟ ଲାଇଟ ରୁ ୨୬ଟି ପୋଡି ଯାଇଥିବା ଜଣାପଡିଥିଲା । ତା ପରେ ବି ଏଯାବତ ତିଆରି ହୋଇପାରିଲା ନାହିଁ, ସ୍ଥାନୀୟ ବ୍ଲକ ଏବଂ ପଂଚାୟତ ଅଧିକାରୀ ମାନେ ଏଦିଗରେ ତୁରନ୍ତ ପଦକ୍ଷେପ ନେଇ ପାପଡାହାଣ୍ଡିର ଆଲୋକ ବ୍ୟବସ୍ଥା କୁ ଶୀଘ୍ର ସଜାଡ଼ିବା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି।

Comments are closed.