ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜ୍ରୁ ଈଶାନ୍ତ ବାଦ୍; ଡିସେମ୍ବର ୧୧ରେ ରୋହିତଙ୍କ ସଂପର୍କରେ ନିଷ୍ପତ୍ତି
ସିଡନୀ : ଭ୍ରମଣକାରୀ ଭାରତ ଓ ଘରୋଇ ଅଷ୍ଟ୍ରେଲିଆ କ୍ରିକେଟ୍ ଦଳ ମଧ୍ୟରେ ଖେଳାଯିବାକୁ ଥିବା ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରୁ ବାଦ୍ ପଡ଼ିଛନ୍ତି ବରିଷ୍ଠ ଭାରତୀୟ ଦ୍ରୁତ ବୋଲର ଈଶାନ୍ତ ଶର୍ମା। ଟେଷ୍ଟ ସିରିଜ୍ ଖେଳିବା ନିମନ୍ତେ ମ୍ୟାଚ୍ ଫିଟନେସ୍ ହାସଲ କରିପାରିନଥିବାରୁ ଈଶାନ୍ତଙ୍କୁ ଟେଷ୍ଟ ସିରିଜରୁ ବାଦ୍ ଦିଆଯାଇଥିବା ବିସିସିଆଇ ତରଫରୁ ଗଣମାଧ୍ୟମକୁ ସୂଚନା ଦିଆଯାଇଛି। ଈଶାନ୍ତ ଓ ରୋହିତଙ୍କ ଫିଟନେସ୍ ସଂପର୍କରେ ତାଙ୍କ ନିକଟରେ କୌଣସି ତଥ୍ୟ ନ ଥିବା ଭାରତୀୟ ଦଳର ଅଧିନାୟକ ବିରାଟ କୋହଲି ମତ ଦେବା ପରେ ବିସିସିଆଇ ସ୍ପଷ୍ଟୀକରଣ ଦେବାକୁ ବାଧ୍ୟ ହୋଇଥିବା କୁହାଯାଉଛି।
ସେହିପରି ବରିଷ୍ଠ ବ୍ୟାଟସମ୍ୟାନ୍ ରୋହିତ ଟେଷ୍ଟ ସିରିଜ୍ରେ ଖେଳିବାକୁ ଅଷ୍ଟ୍ରେଲିଆ ଗସ୍ତରେ ଯିବେ କି ନାହିଁ ସେ ସଂପର୍କରେ ଡିସେମ୍ବର ୧୧ରେ ନିଷ୍ପତ୍ତି ନିଆଯିବ। ସୂଚନାଥାଉକି ଆଇପିଏଲ୍ରେ ଖେଳିବା ସମୟରେ ଜଂଘ ମାଂସପେଶୀରେ ଆଘାତଜନିତ କାରଣରୁ ଭାରତୀୟ ଦଳ ସହ ଅଷ୍ଟ୍ରେଲିଆ ଗସ୍ତରେ ନ ଯାଇ ସ୍ବଦେଶ ଫେରି ରୋହିତ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ୍ ଏକାଡେମୀରେ ଶାରୀରିକ ଅଭ୍ୟାସ ଜାରି ରଖିଛନ୍ତି। ଡିସେମ୍ବର ୧୧ରେ ତାଙ୍କର ଚୂଡ଼ାନ୍ତ ଫିଟନେସ୍ ପରୀକ୍ଷା କରାଯିବ। ଫିଟନେସ୍ ପରୀକ୍ଷା ପରେ ସେ ଅଷ୍ଟ୍ରେଲିଆ ଗସ୍ତରେ ଯିବେ କି ନାହିଁ ତାହା ସ୍ପଷ୍ଟ ହୋଇଯିବ।
ରୋହିତ ୟୁଏଇରେ ଆଇପିଏଲ୍ ଖେଳିସାରି ସିଧାସଳଖ କାହିଁକି ଅଷ୍ଟ୍ରେଲିଆ ନ ଯାଇ ଭାରତ ଫେରିଲେ ତାହାକୁ ନେଇ ଚର୍ଚ୍ଚା ଜାରି ରହିଛି। ଏ ସଂପର୍କରେ ଗଣମାଧ୍ୟମକୁ ସୂଚନା ଦେଇ ବିସିସିଆଇ ସମ୍ପାଦକ ଜୟ ଶାହା କହିଥିଲେ ରୋହିତଙ୍କ ବାପା ଅସୁସ୍ଥ ଥିବାରୁ ସେ ୟୁଏଇରୁ ଭାରତ ଫେରି ଆସିଥିଲେ। ମୁମ୍ବଇ ଆସି ବାପାଙ୍କ ସହ କିଛିଦିନ ବିତାଇବା ପରେ ସେ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ୍ ଏକାଡେମୀ ଶିବିରରେ ଅଛନ୍ତି।
ଅନ୍ୟପକ୍ଷରେ ବିଶ୍ବସ୍ତ ସୂତ୍ରରୁ ମିଳିଥିବା ଖବର ଅନୁଯାୟୀ ଯଦି ରୋହିତ ଶର୍ମା ଫିଟ୍ ଘୋଷିତ ହୁଅନ୍ତି ତେବେ ଅଷ୍ଟ୍ରେଲିଆରେ ସଙ୍ଗରୋଧ ସମୟରେ ତାଙ୍କୁ ଅଭ୍ୟାସ କରିବାକୁ ସୁଯୋଗ ଦେବାକୁ ବିସିସିଆଇ ସଭାପତି ସୌରଭ ଗାଙ୍ଗୁଲି କ୍ରିକେଟ୍ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ନିକ୍ ହକ୍ଲେଙ୍କୁ ଅନୁରୋଧ କରିବେ ବୋଲି ଆଶା ରହିଛି।
Comments are closed.