ଆଇପିଏଲ୍ ୨୦୨୦ : ଧୋନି-ବିରାଟ-ରୋହିତଙ୍କ ଭଳି ଅଧିନାୟକଙ୍କ ଗୋଟିଏ ସିଜନର ଦରମା କେତେ ?

ମୁମ୍ବାଇ : ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) କୁ ନେଇ ଚର୍ଚ୍ଚା ପୁଣି ଜୋର ଧରିଛି। ଶୁକ୍ରବାର ଅନୁଷ୍ଠିତ ବିସିସିଆଇ ବୈଠକରେ ଆଇପିଏଲ୍ ଆୟୋଜନ ଉପରେ ଆଲୋଚନା କରାଯାଇଥିଲା। ବର୍ତ୍ତମାନ ଶୁଣିବାକୁ ମିଳୁଛି ଯେ, ବିଶ୍ୱର ସର୍ବବୃହତ କ୍ରିକେଟ୍ ଲିଗ୍ ଦେଶ ବାହାରେ ଆୟୋଜିତ ହେବ। ଆଇପିଏଲ ନିଲାମରେ ଖେଳାଳିଙ୍କ ଉପରେ ବହୁତ ଟଙ୍କା ଲାଗିଥାଏ। ମହେନ୍ଦ୍ର ସିଂ ଧୋନି, ରୋହିତ ଶର୍ମା ଏବଂ ବିରାଟ କୋହଲିଙ୍କ ଭଳି ଅଧିନାୟକଙ୍କୁ ଫ୍ରାଞ୍ଚାଇଜି କେତେ ଟଙ୍କା ଦେଇଥାଏ ତାହା କେବେ ଖୋଲାଖୋଲି ଭାବେ ପ୍ରକାଶ କରାଯାଇ ନାହିଁ। କିନ୍ତୁ ଆଜି ଆସନ୍ତୁ ଜାଣିବା ଗୋଟିଏ ସିଜିନ ପାଇଁ ଆଇପିଏଲର ଅଧିନାୟକଙ୍କୁ କେତେ ଟଙ୍କା ମିଳିଥାଏ।

ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମା ଆଇପିଏଲର ସବୁଠାରୁ ସଫଳ ଅଧିନାୟକ। ତାଙ୍କ ନେତୃତ୍ୱରେ ରୋହିତ ମୁମ୍ବାଇ ଇଣ୍ଡିଆନ୍ସକୁ ଚାରିଥର ଚାମ୍ପିୟନ କରିଛନ୍ତି। ରୋହିତଙ୍କୁ ଆଇପିଏଲ୍ (୨୦୧୩) ର ଷଷ୍ଠ ସିଜନରେ ମୁମ୍ବାଇ ଇଣ୍ଡିଆନ୍ସର ଅଧିନାୟକ ଭାବରେ ମନୋନୀତ କରାଯାଇଥିଲା ଏବଂ ଏହି ସିଜନରେ ମୁମ୍ବାଇ ପ୍ରଥମ ଥର ପାଇଁ ଆଇପିଏଲ୍ ଟ୍ରଫି ଜିତିଥିଲା। ଏହି ସିଜନ ପାଇଁ ରୋହିତଙ୍କୁ ମୁମ୍ବାଇ ଇଣ୍ଡିଆନ୍ସର ଫ୍ରାଞ୍ଚାଇଜ୍ ଦ୍ୱାରା ୧୫ କୋଟି ଟଙ୍କା ପ୍ରଦାନ କରାଯିବ।

ଅଷ୍ଟ୍ରେଲୀୟ କିମ୍ବଦନ୍ତୀ ଷ୍ଟିଭ ସ୍ମିଥ ପ୍ରଥମେ ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଦ୍ୱାରା ୨୦୧୦ ରେ କିଣାଯାଇଥିଲେ। ସ୍ମିଥ ଏପର୍ଯ୍ୟନ୍ତ ଆଇପିଏଲରେ ଚାରିଟି ଦଳ ପାଇଁ ଖେଳିଛନ୍ତି। ସ୍ମିଥ୍ ଆଇପିଏଲ୍ ୨୦୨୦ ରେ ରାଜସ୍ଥାନ ରୟାଲ୍ସର ଅଧିନାୟକ । ଏଥିପାଇଁ ତାଙ୍କୁ ପ୍ରାୟ ୧୨ କୋଟି ଟଙ୍କା ଦରମା ପ୍ରଦାନ କରାଯିବ।

ମହେନ୍ଦ୍ର ସିଂ ଧୋନି ଆଇପିଏଲର ପ୍ରଥମ ସିଜିନରୁ ଚେନ୍ନାଇ ସୁପର କିଙ୍ଗ୍ସର ନେତୃତ୍ୱ ନେଉଛନ୍ତି। ଧୋନିଙ୍କ ଅଧିନାୟକତ୍ୱରେ ଚେନ୍ନାଇ ତିନିଥର ଆଇପିଏଲ୍ ଟାଇଟଲ୍ ଜିତିଛି। ଧୋନିଙ୍କୁ ଆଇପିଏଲର ପରବର୍ତ୍ତୀ ସିଜନ ପାଇଁ ସିଏସ୍‌କେ ଫ୍ରାଞ୍ଚାଇଜ୍ ଠାରୁ ୧୫ କୋଟି ଟଙ୍କା ପ୍ରଦାନ କରାଯିବ।

ଆଇପିଏଲର କନିଷ୍ଠ ଅଧିନାୟକ ଶ୍ରେୟସ ଅୟରଙ୍କୁ ଗୌତମ ଗମ୍ଭୀରଙ୍କୁ ହଟାଇ ୨୦୧୮ ରେ ଦିଲ୍ଲୀ ରାଜଧାନୀର ଅଧିନାୟକ କରାଯାଇଥିଲା। ଆଇପିଏଲର ଦ୍ୱାଦଶ ସିଜନରେ ଦିଲ୍ଲୀ ଅୟରଙ୍କ ଅଧିନାୟକତ୍ୱରେ ସାତ ବର୍ଷ ପରେ ସେମିଫାଇନାଲରେ ପ୍ରବେଶ କରିଥିଲେ। ପରବର୍ତ୍ତୀ ସିଜନ ପାଇଁ ଅୟର ଦିଲ୍ଲୀ କ୍ୟାପିଟାଲ୍ ଫ୍ରାଞ୍ଚାଇଜ୍ ଠାରୁ ୭ କୋଟି ଟଙ୍କା ପାଇବେ।

ଡାନିଏଲ ଭେଟ୍ଟୋରି ଆଇପିଏଲରୁ ଅବସର ନେବା ପରେ ବିରାଟ କୋହଲି ୨୦୧୩ ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକତ୍ୱ ପାଇଥିଲେ। ଏପର୍ଯ୍ୟନ୍ତ ଆରସିବି ଥରେ ମଧ୍ୟ ଆଇପିଏଲ୍ ଟାଇଟଲ୍ ଜିତିବାରେ ସକ୍ଷମ ହୋଇନାହିଁ। ପ୍ରଥମ ସିଜନରୁ ବିରାଟ ଏହି ଦଳର ସଦସ୍ୟ ରହିଆସିଛନ୍ତି। ଏହି ସିଜନ ପାଇଁ ବିରାଟ ବାଙ୍ଗାଲୋରର ଫ୍ରାଞ୍ଚାଇଜରୁ ୧୭ କୋଟି ଟଙ୍କା ନେଉଛନ୍ତି।

କିଙ୍ଗସ ଏକାଦଶ ପଞ୍ଜାବ ପୁଣି ଥରେ ସେମାନଙ୍କ ଅଧିନାୟକଙ୍କୁ ବଦଳାଇ ଦେଇଛନ୍ତି। ୨୦୨୦ ସିଜନ୍ ପାଇଁ କେ.ଏଲ୍ ରାହୁଲଙ୍କୁ ଫ୍ରାଞ୍ଚାଇଜ୍ ଦ୍ବାରା ଅଧିନାୟକ କରାଯାଇଛି। ରାହୁଲ ଏପର୍ଯ୍ୟନ୍ତ ଆଇପିଏଲର ଅଧିନାୟକ ନଥିଲେ। ଏହି ସିଜନରେ ରାହୁଲ ପଞ୍ଜାବ ଫ୍ରାଞ୍ଚାଇଜରୁ ୧୧ କୋଟି ଟଙ୍କା ପାଇବେ।

ନ୍ୟୁଜିଲ୍ୟାଣ୍ଡ ଦଳର ଅଧିନାୟକ କେନ୍ ୱିଲିୟମସନଙ୍କୁ ୨୦୧୫ ରେ ସନରାଇଜର୍ସ ହାଇଦ୍ରାବାଦ କିଣିଥିଲା। ୨୦୧୮ ରେ ୱିଲିୟମସନଙ୍କୁ ଡେଭିଡ ୱାର୍ଣ୍ଣରଙ୍କ ଅନୁପସ୍ଥିତିରେ ହାଇଦ୍ରାବାଦର ଅଧିନାୟକତ୍ୱ ପ୍ରଦାନ କରାଯାଇଥିଲା। ୱିଲିୟମସନ ଦଳକୁ ଫାଇନାଲକୁ ନେଇ ଆଇପିଏଲରେ ପ୍ରଥମ ଥର ପାଇଁ ଅଧିନାୟକ ହୋଇଥିଲେ ହେଁ ଦଳ ଫାଇନାଲରେ ହାରିଥିଲା। ଡେଭିଡ ୱାର୍ନର ଏହି ସିଜନରେ ପ୍ରତ୍ୟାବର୍ତ୍ତନ କରିବା ସହ ଦଳର ନେତୃତ୍ବ ନେବେ। ଆଇପିଏଲ୍ ୨୦୨୦ ପାଇଁ ୱାର୍ନରଙ୍କୁ ୧୨ କୋଟି ଟଙ୍କା ପ୍ରଦାନ କରାଯିବ।

୨୦୧୮ ମସିହାରେ ଦୀନେଶ କାର୍ତ୍ତିକଙ୍କୁ କୋଲକାତା ନାଇଟ୍ ରାଇଡର୍ସ କ୍ରୟ କରି ଦଳର ଅଧିନାୟକତ୍ୱ ପ୍ରଦାନ କରିଥିଲା। ଦଳକୁ ପ୍ଲେ ଅଫରେ ଆଗେଇ ନେବାରେ କାର୍ତ୍ତିକ ମଧ୍ୟ ସଫଳ ହୋଇଥିଲେ। ୧୩ ତମ ସିଜନରେ ମଧ୍ୟ କାର୍ତ୍ତିକ କୋଲକାତାର ଅଧିନାୟକ ହେବେ। ଏଥିପାଇଁ ସେମାନେ ୭.୪ କୋଟି ଟଙ୍କା ପାଇବେ। କାର୍ତ୍ତିକ ଏପର୍ଯ୍ୟନ୍ତ ଆଇପିଏଲରେ ୬ଟି ଦଳ ପାଇଁ ଖେଳିଛନ୍ତି।

Comments
Loading...