ଛକ ସ୍ଥିତ ନଳକୂପ କହୁଛି ଅତାବିରା ଜଳ ପରିମଳ କଥା

ରେଙ୍ଗାଲିକେମ୍ପ : ବରଗଡ଼ ଜିଲ୍ଲା ଅତାବିରା ଏନଏସିରେ ପାଣି ପାଇଁ ଲୋକେ ଡହଳବିକଳ। ଯାହା ଦେଖିବାକୁ ମିଳିଛି ଜାତୀୟ ରାଜପଥ କଡ଼ରେ ଥିବା ଟେଲିଫୋନ ଏସ୍କଚେଞ୍ଜ ଛକରେ। ଏହି ଛକ ଦେଇ ରାତି ପାହିଲେ ହଜାର ହଜାର ଗାଡି ମଟର ଯିବା ଆସିବା କରୁଥିବାବେଳେ ବହୁ ଲୋକଙ୍କ ଭିଡ଼ ଜମି ରହିଥାଏ। ଲୋକେ ପାଣି ଟୋପେ ପାଇଁ ନାହିଁ ନ ଥିବା ଅସୁବିଧାର ସମ୍‌ମୁଖୀନ ହୋଇଥାନ୍ତି। ଏନଏସି ପକ୍ଷରୁ ଏକ ମାତ୍ର ନଳକୂପ ଖନନ ହୋଇଛି ସତ, ହେଲେ ସେଥିରୁ ଲୁହା ପାଣି ବାହାରୁ ଥିବାରୁ ତାହା ପାନୀୟ ଯୋଗ୍ୟ ହେଇପାରୁନାହିଁ। କିନ୍ତୁ ରକ୍ଷଣବେକ୍ଷଣ ଅଭାବରୁ ନଳକୂପର ପାରିପାର୍ଶ୍ୱିକ ଅବସ୍ଥା ଶୋଚନୀୟ ହୋଇ ପଡ଼ିଛି। ଅଳିଆ ଆବର୍ଜନା ମୟ ହେବା ଯୋଗୁଁ ପାଣି ଟୋପେ ପାଇଁ ନଳକୂପକୁ ଯିବା ପାଇଁ ଲୋକେ ନାକ ଟେକୁଛନ୍ତି। ତେବେ ଏହି ବାଟ ଦେଇ ନୀତି ପ୍ରଶାସନିକ ଅଧିକାରୀ ତଥା ବିଭାଗୀୟ ଅଧିକାରୀମାନେ ଯିବାଆସିବା କରୁଥିଲେ ହେଁ ଅଳିଆ ଆବର୍ଜନା ସହ ଭଙ୍ଗା ଦଦରା ହେଇ ପଡିରହିଥିବା ନଳକୂପ କୁ କାହାରି ନଜର ପଡୁନଥିବା ଅଞ୍ଚଳରେ ବେଶ ଚର୍ଚ୍ଚାର ବିଷୟ ହୋଇପଡିଛି। ଆଗକୁ ଖରା ଦିନ ଆସୁଛି । ପାଣି ପିଇ ନ ପାରିଲେ ବି ମୁହଁ ହାତ ଧୋଇବା ପାଇଁ ମଧ୍ୟ ନଳକୂପ ଅଯୋଗ୍ୟ ମନେ ହେଉଛି ଏହାର ପରିବେଶ ଦେଖି । ତେବେ ପରିମଳ ବିଭାଗର  ଅବହେଳା ନା ଅପାରଗତା ତାହା ବିଭାଗୀୟ ଅଧିକାରୀ ମାନେ ହିଁ ଜାଣିଥିବେ। ଆଉ କେତେ ଦିନ ବିତିଲେ ବିଭାଗୀୟ ଅଧିକାରୀ ମାନଙ୍କ ଦୃଷ୍ଟି ପଡିବ ତାକୁ ଅନେଇ ରହିଛନ୍ତି ଅଞ୍ଚଳବାସୀ।

Comments
Loading...