ଜମ୍ମୁ କାଶ୍ମୀରରେ ଇସଲାମିକ ଷ୍ଟେଟର ସିଧାସଳଖ ଉପସ୍ଥିତିର ପ୍ରମାଣ ମିଳିଲା

ନୂଆଦିଲ୍ଲୀ: ଜମ୍ମୁ କାଶ୍ମୀରରେ ବିଭିନ୍ନ ଆତଙ୍କବାଦୀ ସଂଗଠନ ସହିତ ସଂପ୍ରତି ଇସଲାମିକ ଷ୍ଟେଟର ସିଧାସଳଖ ଉପସ୍ଥିତିର ପ୍ରମାଣ ମିଳିଛି, ଯାହା ସୁରକ୍ଷା ବାହିନୀକୁ ଚିନ୍ତାରେ ପକାଇ ଦେଇଛି। ଜୁଲାଇ ୧୧ ତାରିଖରେ ଉମର ନିଶାର ଭଟ୍ଟ ଏବଂ ତାଙ୍କର ଦୁଇ ସହଯୋଗୀ ଗିରଫ ହେବାପରେ ଭାରତୀୟ ଗୁଇନ୍ଦା ସଂସ୍ଥାଗୁଡିକ ଏଠାରେ ଇସଲାମିକ ଷ୍ଟେଟର ପ୍ରତ୍ୟକ୍ଷ ଉପସ୍ଥିତି ଥିବା ପ୍ରମାଣ ପାଇପାରିଛନ୍ତି। ଏହା ପୂର୍ବରୁ ଜୁଲାଇ ପ୍ରଥମ ଭାଗରେ ରାଷ୍ଟ୍ରୀୟ ତଦନ୍ତକାରୀ ସଂସ୍ଥା (ଏନଆଇଏ) ନିସାର ଓରଫ କାସିମ ଖୋରାସାନି ଏବଂ ତାଙ୍କ ସହଯୋଗୀ ତନଭିର ଅହମଦ ଭଟ ଏବଂ ରମିଜ ଅହମଦ ଲୋନଙ୍କୁ ମୌଳବାଦୀ ଚିନ୍ତାଧାରା ପ୍ରଚାର ପ୍ରସାର ଏବଂ ଜିହାଦ ପାଇଁ ଭାରତର ଯୁବକଙ୍କୁ ଆଇଏସଆଇଏସରେ ସାମିଲ କରିବା ଅଭିଯୋଗରେ ଗିରଫ କରିବା ବିଷୟ ପ୍ରକାଶ କରିଥିଲା। ଏହି ତିନିଜଣ ଯାକ ଜମ୍ମୁ କାଶ୍ମୀରର ଅନନ୍ତନାଗ ଜିଲାର ବାସିନ୍ଦା ଅଟନ୍ତି।

କାସିମ ଖୋରାସାନି ଜମ୍ମୁ କାଶ୍ମୀରରେ ଇସଲାମିକ ଷ୍ଟେଟର ଅନ୍ୟତମ ପ୍ରତିଷ୍ଠାତା ବୋଲି କୁହାଯାଉଛି ଏବଂ ଗୁଇନ୍ଦା ସଂସ୍ଥା ଗତ ଏକବର୍ଷ ଧରି ତାଙ୍କର ପିଛା କରୁଥିଲେ। ଭାରତୀୟ ଗୁଇନ୍ଦା ସଂସ୍ଥା ୨୦୨୦ ଏପ୍ରିଲରେ ଏକ ମେସେଜିଂ ଆପ୍ଲିକେସନରୁ ଖୋରାସାନିଙ୍କୁ ଚିହ୍ନଟ କରିଥିଲେ। ସେ ଭାରତରେ ଇସଲାମିକ ଷ୍ଟେଟ ସମ୍ପର୍କରେ ପ୍ରଚାର ପ୍ରସାର କରିବାକୁ ‘ସ୍ୱାତ ଅଲ-ହିନ୍ଦ’ ପତ୍ରିକା ପ୍ରସାରଣ ବିଷୟରେ ତାଙ୍କ ଆତଙ୍କବାଦୀ ଗୋଷ୍ଠୀର ସଦସ୍ୟମାନଙ୍କ ସହିତ ଆଲୋଚନା କରୁଥିବା ଉକ୍ତ ଆପ୍ଲିକେସନରେ ଦେଖିବାକୁ ମିଳିଥିଲା। ଉକ୍ତ ପତ୍ରିକାରେ ଭାରତ ବିରୁଦ୍ଧରେ ଧର୍ମ ଯୁଦ୍ଧ ପାଇଁ ମଧ୍ୟ ଆହ୍ୱାନ ଦିଆଯାଇଥିଲା। ଯେଉଁଥିରେ ସିରିୟାରୁ ଜେହାଦିମାନେ କଳା ପତାକା ଧରି ଭାରତ ଅଭିମୁଖେ ଯାତ୍ରା କରିବା ସହିତ ଭାରତକୁ ଇସିଲାମିକ ଷ୍ଟେଟ ରାଷ୍ଟ୍ରରେ ପରିଣତ କରିବା ବିଷୟ ଉଲ୍ଲେଖ ରହିଥିଲା। ସୁରକ୍ଷା ବାହିନୀ ଏହି ଆତଙ୍କବାଦୀଙ୍କୁ ଗିରଫ କରିବା ସହିତ ସେମାନଙ୍କ ନିକଟରୁ ବିପୁଳ ପରିମାଣ ଆପତ୍ତିଜନକ କାଗଜପତ୍ର, ମୋବାଇଲଫୋନ, ଟାବଲେଟ, ଲାପଟପ, ହାର୍ଡ ଡିସ୍କ, ଆଇଏସଆଇଏସ ଲୋଗୋ ଥିବା ଟି ସାର୍ଟ ଆଦି ଜବତ କରିଛନ୍ତି।

Comments
Loading...