ବଢୁଛି ଇନ୍ଦ୍ରାବତୀ ଜଳ ଭଣ୍ଡାରର ଜଳସ୍ତର ହାତୀନଦୀ ଗର୍ଭକୁ ଛଡ଼ାଯାଉଛି ୨୧୬.୫୮କ୍ୟୁସେକ୍ ଜଳ

ମୁଖୀଗୁଡା: ଲଘୁଚାପଜନିତ ବର୍ଷା ଜୟପାଟଣା ଅଞ୍ଚଳରେ ଲାଗି ରହିଥିବା ଯୋଗୁଁ ବ୍ଲକରେ ଗତ ୨୪ଘଣ୍ଟା ମଧ୍ୟରେ ୧୪୪ମି.ମି ବର୍ଷା ରେକର୍ଡ କରାଯାଉଛି। ହାତୀ ନଦୀର ଉପର ମୁଣ୍ଡରେ ବର୍ଷା ଯୋଗୁଁ ନଦୀର ଜଳସ୍ତର ବୃଦ୍ଧି ପାଉଛି। ଇନ୍ଦ୍ରାବତୀ ଜଳଭଣ୍ଡାରର ଜଳସ୍ତର ଆଜି ସକାଳ ୮ଟା ସୁଦ୍ଧା ୬୩୪.୨୫ମିକୁ ପହଞ୍ଚିଛି। ହାତୀ ବ୍ୟାରେଜର ଜଳସ୍ତର ୨୬୧ ମି ରହିଥିବା ବେଳେ ହାତୀନଦୀ ଗର୍ଭକୁ ୨୧୬.୫୮କ୍ୟୁସେକ୍ ଜଳ ଛଡ଼ାଯାଉଛି। ଇନ୍ଦ୍ରାବତୀ ବାମ, ଡ଼ାହାଣ ଏବଂ ଲିଫ୍ଟ କେନାଲରେ ଜଳ ଯୋଗାଣ ବନ୍ଦକରାଯାଇଛି। ଇନ୍ଦ୍ରାବତୀ ଜଳବିଦ୍ୟୁତ ପ୍ରକଳ୍ପର ପାୱାରହାଉସରୁ ଗତ କାଲି ୨୧୩ ମେଗାୱାଟ ବିଦ୍ୟୁତ ଉତ୍ପାଦନ କରାଯାଇଥିବା ବେଳେ ଆଜି ସକାଳୁ ୧୫୦ ମେଗାୱାଟ ବିଦ୍ୟୁତ ଉତ୍ପାଦନ ହେଉଥିବା ସୂଚନା ମିଳିଛି। ଡ୍ରେନେଜ ବ୍ୟବସ୍ଥା ବିପର୍ୟ୍ୟସ୍ତ ଯୋଗୁଁ ମୁଖୀଗୁଡା ଇରିଗେସନ କଲୋନି ଏବଂ ଷଣ୍ଢଛକ ପଛପଟ କେତେକ କ୍ୱାର୍ଟରକୁ ପାଣିପଶି ଯାଇଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ।

Comments
Loading...