ମୁମ୍ବଇ: ଲିଭା ମିସ୍ ଦିଭା ୟୁନିଭର୍ସ ୨୦୨୧ ହରନାଜ ସାନ୍ଧୁ ଆନୁଷ୍ଠାନିକ ଭାବରେ ମିସ୍ ୟୁନିଭର୍ସ ୨୦୨୧ ବିଜୟିନୀ ଘୋଷିତ ହୋଇଛନ୍ତି । ମିସ୍ ପାରାଗୁଏ ଏବଂ ମିସ୍ ସାଉଥ ଆଫ୍ରିକାଙ୍କ ସହିତ ପ୍ରତିଯୋଗିତା କରି ଶେଷରେ ହରନାଜ୍ ଏହି ମୁକୁଟ ପିନ୍ଧିଛନ୍ତି । ପ୍ରଥମେ ଶ୍ରେଷ୍ଠ ୧୦ ଜଣଙ୍କ ମଧ୍ୟରେ ସ୍ଥାନ ପାଇଥିବା ହରନାଜ ପରବର୍ତ୍ତୀ ସମୟରେ ଶ୍ରେଷ୍ଠ ୩ ଜଣଙ୍କ ମଧ୍ୟରେ ନିଜକୁ ସ୍ଥାନ ଦେବାରେ ସଫଳ ହୋଇଥିଲେ । ଏହାପରେ ତାଙ୍କୁନେଇ ଦେଶବାସୀଙ୍କ ମଧ୍ୟରେ ଉତ୍ସୁକତା ପ୍ରକାଶ ପାଇଥିବାବେଳେ ଚୂଡାନ୍ତ ଫଳାଫଳ ଘୋଷଣା ସମୟରେ ହରନାଜ ୭୦ତମ ମିସ୍ ୟୁନିଭର୍ସ ୨୦୨୧ ମୁକୁଟ ପିନ୍ଧିବା ତାଙ୍କ ଶୁଭେଚ୍ଛୁ, ପ୍ରଶଂସକ ଏବଂ କୋଟି କୋଟି ଭାରତୀୟ ପାଇଁ ଗୌରବ ଆଣିଦେଇଛି । ସେ ତୃତୀୟ ଭାରତୀୟ ଯୁବତୀ ଭାବରେ ଏହି ଟାଇଟଲ ହାସଲ କରିଛନ୍ତି । ସୁଇମ ସୁଟ୍ ପର୍ଯ୍ୟାୟରେ ହରନାଜ ବେଶ୍ ଆକର୍ଷଣୀୟ ମନେହେଉଥିଲେ ଏବଂ ଅତ୍ୟନ୍ତ ଲାଳିତ୍ୟ ତଥା ଗାମ୍ଭୀର୍ଯ୍ୟର ସହିତ ସେ ର୍ୟାମ୍ପରେ ଚାଲିଥିଲେ । ପୂର୍ବରୁ ଏକ ଗଣମାଧ୍ୟମକୁ ସାକ୍ଷାତକାର ଦେବା ସମୟରେ ସେ ଏଭଳି ଏକ ବିଶ୍ୱସ୍ତରୀୟ ମଞ୍ଚରେ ଭାରତର ପ୍ରତିନିଧିତ୍ୱ କରିବାକୁ ସ୍ୱପ୍ନ ଦେଖୁଥିବା ବିଷୟ ପ୍ରକାଶ କରିଥିଲେ । ଶେଷରେ ତାଙ୍କ ସ୍ୱପ୍ନ ସାକାର ହୋଇଛି ଏବଂ ଏଥିପାଇଁ ସେ ଗର୍ବିତ ମନେ କରୁଥିବା କହିଛନ୍ତି ହରନାଜ ।
Comments are closed.