ଏହି ଭାରତୀୟ ହେଲେ ବିଶ୍ଵର ସର୍ବଶ୍ରେଷ୍ଠ ଶିକ୍ଷକ, ମିଳିଲା ୭ କୋଟିର ପୁରସ୍କାର, ସବୁ ଦାନ କରିଦେଲେ

ଜଣେ ଭାରତୀୟଙ୍କୁ ମିଳିଛି ବିଶ୍ଵର ସର୍ବଶ୍ରେଷ୍ଠ ଶିକ୍ଷକର ମାନ୍ୟତା। ତାଙ୍କୁ ଗ୍ଲୋବାଲ୍‌ ଟିଚର ବା ବିଶ୍ଵ ଶିକ୍ଷକ ଭାବେ ମାନ୍ୟତା ପ୍ରଦାନ କରାଯାଇଛି। ଏଥିପାଇଁ ସମ୍ପୃକ୍ତ ଶିକ୍ଷକଙ୍କୁ ମିଳିଛି ୭ କୋଟି ଟଙ୍କାର ପୁରସ୍କାର। ଶିକ୍ଷକଙ୍କ କର୍ତ୍ତବ୍ୟନିଷ୍ଠା ଏବଂ ବୃତ୍ତିଗତ ଦକ୍ଷତା ପାଇଁ ତାଙ୍କୁ ଏହି ପୁରସ୍କାର ମିଳିଛି। ସେ ହେଉଛନ୍ତି ମହାରାଷ୍ଟ୍ରର ସୋଲାପୁର ଜିଲା ପରିଷଦ ସ୍କୁଲର ଶିକ୍ଷକ ରଣଜିତ ସିଂହ ଡିସ୍‌ଲେ।

ପ୍ରଥମ ଥର ପାଇଁ କୌଣସି ଜଣେ ଭାରତୀୟଙ୍କୁ ବିଶ୍ଵର ସର୍ବଶ୍ରେଷ୍ଠ ଶିକ୍ଷକ ହେବାର ସମ୍ମାନ ମିଳିଛି। ୟୁନେସ୍କୋ ଏବଂ ଲଣ୍ଡନସ୍ଥିତ ବାର୍କି ଫାଉଣ୍ଡେଶନ ଦ୍ବାରା ଦିଆଯାଉଥିବା ବିଶ୍ଵ ଶିକ୍ଷକ ପୁରସ୍କାର ଗତ ଗୁରୁବାର ଘୋଷଣା କରାଯାଇଥିଲା। ରଣଜିତ ଡିସ୍‌ଲେ ସୋଲାପୁର ଜିଲା ଅନ୍ତର୍ଗତ ପରିତେୱାଡ଼ି ଜିଲା ପରିଷଦ ସ୍କୁଲରେ ଶିକ୍ଷକତା କରୁଛନ୍ତି। ଲଣ୍ଡନର ନ୍ୟାଚୁରାଲ ହିଷ୍ଟ୍ରୀ ମ୍ୟୁଜିୟମରେ ସମ୍ପନ୍ନ ହୋଇଥିବା ଏକ ଭର୍ଚୁଆଲ ସମାରୋହରେ ରଣଜିତଙ୍କୁ ଗ୍ଲୋବାଲ ଟିଚର ଆୱାର୍ଡ ପ୍ରଦାନ କରାଯିବା ନେଇ ଘୋଷଣା କରାଯାଇଥିଲା। ପ୍ରତିଦ୍ଧ ଅଭିନେତା ଷ୍ଟିଫେନ ଫ୍ରାଏ ଏହି ଘୋଷଣା କରିଥିଲେ।

ପ୍ରତିଯୋଗିତାରେ ୧୪୦ ଦେଶର ୧୨ ହଜାରରୁ ଅଧିକ ଶିକ୍ଷକ ଅଂଶଗ୍ରହଣ କରିଥିଲେ। ବାଳିକା ଶିକ୍ଷାକୁ ପ୍ରୋତ୍ସାହିତ କରିବା ଏବଂ ଭାରତରେ ତ୍ଵରିତ ପ୍ରତିକ୍ରିୟା ବା କ୍ୟୁଆର କୋଡେଡ୍‌ ପାଠ୍ୟ ବିପ୍ଳବକୁ ତ୍ଵରାନ୍ବିତ କରିବା ଦିଗରେ ସ୍ବତନ୍ତ୍ର ଅବଦାନ ଲାଗି ରଣଜିତଙ୍କୁ ଏହି ପୁରସ୍କାର ପ୍ରଦାନ କରାଯାଇଛି।

Image Courtesy: Al Jazeera

ତେବେ ପୁରସ୍କାର ବାବଦ ରାଶିରୁ ୫୦ ପ୍ରତିଶତକୁ ରଣଜିତ ତାଙ୍କ ସହିତ ପ୍ରତିଯୋଗିତାର ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଥିବା ଅନ୍ୟ ୯ ଶିକ୍ଷକଙ୍କ ମଧ୍ୟରେ ବାଣ୍ଟିବାକୁ ଘୋଷଣା କରିଛନ୍ତି। ଅବଶିଷ୍ଟ ୫୦ ପ୍ରତିଶତରେ ସେ ଏକ ପାଣ୍ଠି ପ୍ରସ୍ତୁତ କରିବେ, ଯାହାକୁ ଭଲ କାମ କରୁଥିବା ଶିକ୍ଷକଙ୍କ ପାଇଁ ବିନିଯୋଗ କରାଯିବ ବୋଲି ରଣଜିତ କହିଛନ୍ତି।

ବାର୍କି ଫାଉଣ୍ଡେଶନ ୨୦୧୪ରୁ ଏହି ପୁରସ୍କାର ପ୍ରଦାନ କରିଆସୁଛି। ଶିକ୍ଷା କ୍ଷେତ୍ରରେ ଉତ୍କୃଷ୍ଟ ଯୋଗଦାନ କରିଥିବା ଶିକ୍ଷକଙ୍କୁ ଏହି ପୁରସ୍କାର ପ୍ରଦାନ କରାଯାଇଥାଏ। ରଣଜିତ ଏହି ପୁରସ୍କାର ପାଇବା ପରେ ମହାରାଷ୍ଟ୍ର ରାଜ୍ୟପାଳ ଭଗତ ସିଂହ କୋଶିୟାରୀ ତାଙ୍କୁ ଶୁଭେଚ୍ଛା ଜଣାଇଛନ୍ତି।

Comments
Loading...