ବାତ୍ୟା ବିପର୍ଯ୍ୟସ୍ତ କୋଲକାତାରେ ପୁନରୁଦ୍ଧାର କାର୍ଯ୍ୟରେ ସେନା

ସମାଜ ପୋର୍ଟାଲ ଡେସ୍କ: ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଅନୁରୋଧ କ୍ରମେ କୋଲକାତାରେ ଭାରତୀୟ ସେନା ପୁନରୁଦ୍ଧାର କାର୍ଯ୍ୟ ଆରମ୍ଭ କରିଛି। ସାମୁଦ୍ରିକ ବାତ୍ୟା ଅମ୍ଫନ ପଶ୍ଚିମବଙ୍ଗର ଅନେକ ଅଞ୍ଚଳରେ ବ୍ୟାପକ କ୍ଷୟକ୍ଷତି କରିଥିବା ବେଳେ ସେଥିରେ ୮୬ ଜଣଙ୍କର ମୃତ୍ୟୁ ଘଟିଛି। ପ୍ରତିରକ୍ଷା ମୁଖପାତ୍ର କହିଛନ୍ତି ଯେ ସେନା କର୍ମଚାରୀମାନେ କୋଲକାତାର ସାଉଥ୍ ଆଭେନ୍ୟୁରେ ପୁନରୁଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ପଶ୍ଚିମବଙ୍ଗ ସରକାରଙ୍କ ଅନୁରୋଧ କ୍ରମେ ଭାରତୀୟ ସେନାର ପାଞ୍ଚଟି ଦଳ ପୁନରୁଦ୍ଧାର କାମରେ ଲାଗିଛନ୍ତି ।

ସେନା ପକ୍ଷରୁ ସର୍ବାଧିକ ପ୍ରଭାବିତ ଟାଲିଗଞ୍ଜ, ବାଲିଗଞ୍ଜ, ରାଜାରହାଟ ନ୍ୟୁ ଟାଉନ୍, ଡାଇମଣ୍ଡ ହାରବର୍ବେ ଓ ବେହାଲାଠାରେ ପ୍ରଥମ ପର୍ଯ୍ୟାୟରେ ପୁନରୁଦ୍ଧାର କାର୍ଯ୍ୟ ଆରମ୍ଭ କରାଯାଇଛି। ମୁଖପାତ୍ର କହିଛନ୍ତି, ସଡକ ସଫା କରିବା ଏବଂ ଗଛକଟା ଉପକରଣ ସହିତ ସେନା କାମ କରୁଛି। ପୂର୍ବରୁ ପଶ୍ଚିମବଙ୍ଗ ସରକାର କହିଥିଲେ ଯେ ଆମେ ସେନା ସହାୟତା ପାଇଁ ଅନୁରୋଧ କରିଛୁ ଏବଂ ଜରୁରୀ ଭିତ୍ତିଭୂମି ତଥା ସେବାର ତୁରନ୍ତ ପୁନରୁଦ୍ଧାର ପାଇଁ ଉଦ୍ୟମ କରାଯାଉଛି। ପଶ୍ଚିମବଙ୍ଗ ସରକାର ଅତ୍ୟାବଶ୍ୟକ ଭିତ୍ତିଭୂମି ଏବଂ ସେବା ପୁନଃସ୍ଥାପନ ପାଇଁ ଉଦ୍ୟମ କରୁଥିବା କହିଛନ୍ତି। ସେନା ବ୍ୟତୀତ ଏନଡିଆରଏଫ ଏବଂ ଏସଡିଆରଏଫ ଦଳ ଗୁଡିକୁ ପୁନରୁଦ୍ଧାର କାର୍ଯ୍ୟରେ ନିୟୋଜିତ କରାଯାଇଥିବା ବେଳେ ରେଳବାଇ, ବନ୍ଦର ଏବଂ ବେସରକାରୀ କ୍ଷେତ୍ରକୁ ମଧ୍ୟ ଉଦ୍ଧାରକାରୀ ଦଳ ଏବଂ ଯନ୍ତ୍ରପାତି ଯୋଗାଇବାକୁ ସରକାର ଅନୁରୋଧ କରିଥିବା କୁହାଯାଇଛି।

Comments
Loading...