୨୦୧୬ରେ ହୋଇଥିଲା ପ୍ରଥମ ସର୍ଜିକାଲ ଷ୍ଟ୍ରାଇକ୍‍ : ସେନା

ନୂଆଦିଲ୍ଲୀ : ସର୍ଜିକାଲ ଷ୍ଟ୍ରାଇକ୍‍କୁ ନେଇ ଭାରତୀୟ ସେନାର ନର୍ଦନ କମାଣ୍ଡ ଜେନେରାଲ ଅଫିସର କମାଣ୍ଡିଂ ଇନ୍‍ ଚିଫ ଲେଫ୍ଟନାଣ୍ଟ ଜେନେରାଲ ରଣବୀର ସିଂହ ସୋମବାର ବଡ଼ ଖୁଲାସା କରିଛନ୍ତି। ସେ କହିଛନ୍ତି ଯେ କିଛି ଦିନ ତଳେ ଡିଜିଏମଓ ଏକ ଆରଟିଆଇ ଜବାବରେ ୨୦୧୬ ସେପ୍ଟେମ୍ବରରେ ମାତ୍ର ଗୋଟିଏ ହିଁ ସର୍ଜିକାଲ ଷ୍ଟ୍ରାଇକ୍‍ ହୋଇଥିବା କଥା କହିଥିଲା। ରାଜନୈତିକ ଦଳଗୁଡ଼ିକର ଦାବି ନୁହେଁ ଆମ ଉତ୍ତର ତଥ୍ୟାତ୍ମକ। ପ୍ରକାଶ ଯେ ନିକଟରେ ନିର୍ବାଚନୀ ପ୍ରଚାର ସମୟରେ କଂଗ୍ରେସ ନେତା ରାଜୀବ ଶୁକ୍ଳା ଦାବି କରିଥିଲେ ଯେ ୟୁପିଏ ଶାସନ କାଳରେ ୬ଥର ସର୍ଜିକାଲ ଷ୍ଟ୍ରାଇକ୍‍ ହୋଇଥିଲା।
ଲେଫ୍ଟନାଣ୍ଟ ଜେନେରାଲ ରଣବୀର ସିଂହ କହିଛନ୍ତି ଯେ ବାଲାକୋଟର ଆତଙ୍କବାଦୀ ଆଡ୍ଡା ଉପରେ ବିମାନ ଆକ୍ରମଣ ଭାରତୀୟ ବାୟୁସେନାର ଏକ ବଡ଼ ଉପଲବ୍ଧୀ ଥିଲା। ପ୍ରଥମ ଥର ଆମ ବିମାନ ଶତ୍ରୁ ଅଞ୍ଚଳ ଭିତରେ ପଶି ଆତଙ୍କବାଦୀ ଲଞ୍ଚପ୍ୟାଡ଼କୁ ଧ୍ୱଂସ କରିଥିଲା। ଚଳିତ ବର୍ଷ ଆମ ଯବାନ ୮୬ ଜଣ ଆତଙ୍କବାଦୀଙ୍କୁ ନିପାତ କରିଛନ୍ତି ଓ ୨୦ ଜଣଙ୍କୁ ଗିରଫ କରିଛନ୍ତି। ଆତଙ୍କବାଦ ବିରୋଧରେ ଆମ ଅଭିଯାନ ଜାରି ରହିବ।
ଉଲ୍ଲେଖଯୋଗ୍ୟ ଯେ ମଇ ୨ରେ କଂଗ୍ରେସ ନେତା ରାଜୀବ ଶୁକ୍ଳା ଟ୍ୱିଟ୍‍ କରିଥିଲେ ଯେ ୟୁପିଏ ଶାସନକାଳରେ ୬ ଥର ସର୍ଜିକାଲ ଷ୍ଟ୍ରାଇକ୍‍ ହୋଇଥିଲା। ପ୍ରଥମ ସର୍ଜିକାଲ ଷ୍ଟ୍ରାଇକ୍‍ ୨୦୦୮ ଜୁନ୍‍ ୧୯ରେ ଆସାମ ରାଇଫଲ୍ସ ଗୋରଖା ରେଜିମେଣ୍ଟ ଭତ୍ତଲ ସେକ୍ଟରରେ କରିଥିଲା। ଦ୍ୱିତୀୟ ସର୍ଜିକାଲ ଷ୍ଟ୍ରାଇକ୍‍ ୨୦୧୧ ଅଗଷ୍ଟ ୩୦ରେ ଶାଦରା ସେକ୍ଟରରେ ରାଜପୁତ ଏବଂ କୁମାୟୁଁ ରେଜିମେଣ୍ଟ କରିଥିଲେ। ତୃତୀୟ ସର୍ଜିକାଲ ଷ୍ଟ୍ରାଇକ୍‍ ୨୦୧୩ ଜୁନ୍‍ ୩ରେ ସାଭନା ପାତ୍ରା ଚେକପୋଷ୍ଟରେ ହୋଇଥିଲା। ଚତୁର୍ଥ ଷ୍ଟ୍ରାଇକ୍‍ ୨୦୧୩ ଜୁଲାଇ ୨୭ ଓ ୨୮ରେ ନାଜପୀର ସେକ୍ଟରରେ, ପଞ୍ଚମ ଷ୍ଟ୍ରାଇକ୍‍ ୨୦୧୩ ଅଗଷ୍ଟ ୬ରେ ନୀଲମ ଘାଟିରେ ଓ ଷଷ୍ଠ ସର୍ଜିକାଲ ଷ୍ଟ୍ରାଇକ୍‍ ୨୦୧୪ ଜାନୁଆରୀ ୧୪ରେ ହୋଇଥିଲା।

Comments
Loading...