ଜାତିସଂଘ ସଚିବଙ୍କ ମଧ୍ୟସ୍ଥତା ପ୍ରସ୍ତାବକୁ ଭାରତର ନାଁ

ସମାଜ ପୋର୍ଟାଲ ଡେସ୍କ: କେନ୍ଦ୍ର ସରକାର କହିଛନ୍ତି ଯେ ଜାମ୍ମୁ ଓ କାଶ୍ମୀର ଦେଶର ଅବିଚ୍ଛେଦ୍ୟ ଅଙ୍ଗ ଓ ଏ ସଂକ୍ରାନ୍ତରେ ଭାରତର ସ୍ଥିତି ପୂର୍ବଭଳି ଅପରିବର୍ତ୍ତିତ ରହିଛି। ଜାତିସଂଘର ସଚିବ ଜେନେରାଲ୍‍ ଆଣ୍ଟୋନିଓ ଗୁଟେରସ୍‍ ଇସ୍‍ଲାମାବାଦରେ ଦେଇଥିବା ମତାମତକୁ ଆଧାର କରି ସାମ୍ବାଦିକମାନଙ୍କ ପ୍ରଶ୍ନର ଉତ୍ତରରେ ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରବିଶକୁମାର କହିଛନ୍ତି ଯେ ଭାରତ କେବଳ ପାକିସ୍ଥାନ ଦ୍ୱାରା ବେଆଇନ ଭାବେ ଭାରତୀୟ ଜମି ଅଧିଗ୍ରହଣକୁ ବିରୋଧ କରୁଛି ଏବଂ ସେ ଜମିକୁ ପୁଣି ଫେରାଇ ଆଣିବା ପାଇଁ ଗୁରୁତ୍ୱ ଦେଉଛି। ଅନ୍ୟାନ୍ୟ ପ୍ରସଙ୍ଗରେ ଦୁଇଦେଶ ମଧ୍ୟରେ ଦ୍ୱିପାକ୍ଷିକ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରାଯାଇ ପାରିବ।

ଜାମ୍ମୁ କାଶ୍ମୀର ପ୍ରସଙ୍ଗରେ ତୃତୀୟ ପକ୍ଷ ମଧ୍ୟସ୍ଥତାର କୌଣସି ଭୂମିକା ନାହିଁ ବୋଲି ସେ ସ୍ପଷ୍ଟ କରିଥିଲେ। ଭାରତ ବିପକ୍ଷରେ ପାକିସ୍ଥାନ ଚଳାଇଥିବା ସୀମାପାର ଆତଙ୍କବାଦକୁ ରୋକିବା ଦିଗରେ କାର୍ଯ୍ୟ କରିବାକୁ ଜାତିସଂଘ ମହାସଚିବ ପାକିସ୍ଥାନକୁ ପରାମର୍ଶ ଦେବେ ବୋଲି ମୁଖପାତ୍ର ରବିଶକୁମାର ଆଶାବ୍ୟକ୍ତ କରିଛନ୍ତି।

Comments
Loading...