ଭାରତରେ କରୋନା ମୃତ୍ୟୁ ବିଶ୍ଵରେ ସର୍ବନିମ୍ନ : ଡଃ ହର୍ଷ ବର୍ଦ୍ଧନ

ଡଃ ହର୍ଷ ବର୍ଦ୍ଧନଙ୍କ ଅଧ୍ୟକ୍ଷତାରେ କୋଭିଡ-୧୯ ମନ୍ତ୍ରୀସ୍ତରୀୟ ବୈଠକ

ନୂଆଦିଲ୍ଲୀ : ଭାରତରେ କରୋନା ମୃତ୍ୟୁ ବିଶ୍ଵରେ ସର୍ବନିମ୍ନ ବୋଲି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡଃ ହର୍ଷ ବର୍ଦ୍ଧନ କହିଛନ୍ତି। ଡଃ ହର୍ଷ ବର୍ଦ୍ଧନଙ୍କ ଅଧ୍ୟକ୍ଷତାରେ ଶନିବାର କୋଭିଡ-୧୯ ସଂକ୍ରାନ୍ତ ୨୦ତମ ଉଚ୍ଚସ୍ତରୀୟ ମନ୍ତ୍ରୀମଣ୍ଡଳ ବୈଠକ ଅନୁଷ୍ଠିତରେ ସେ ଏହି ସୂଚନା ଦେଇଛନ୍ତି।
ବୈଠକ ଆରମ୍ଭରେ ଡଃ ହର୍ଷ ବର୍ଦ୍ଧନ କୋଭିଡ-୧୯ର ମୁକାବିଲା ଲାଗି ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକର ସହଯୋଗକୁ ପ୍ରଶଂସା କରିଥିଲେ । ଗତ ମାସ ୩୧ ତାରିଖରେ ହୋଇଥିବା ଶେଷ ଜିଓଏମ ବୈଠକଠାରୁ ଆଜି ମଧ୍ୟରେ ରୋଗର ନିରାକରଣ ଦିଗରେ ଯଥେଷ୍ଟ ସଫଳତା ମିଳିଥିବା ସେ କହିଥିଲେ ।  ବର୍ତ୍ତମାନ ସୁଦ୍ଧା ୨୬.୪୦ ଲକ୍ଷ ରୋଗୀ ଆରୋଗ୍ୟ ଲାଭ କରିଛନ୍ତି। ଦେଶରେ ମୃତ୍ୟୁହାର ହ୍ରାସ ପାଇ ୧.୮୧ ପ୍ରତିଶତରେ ପହଞ୍ଚିଥିବା ବେଳେ ସୁସ୍ଥତା ହାର ମଧ୍ୟ ୭୬.୪୭ ପ୍ରତିଶତକୁ ବୃଦ୍ଧି ପାଇଛି। ବ୍ୟାପକ ସ୍ୱାସ୍ଥ୍ୟ ସୁବିଧା ସୁଯୋଗ ଯୋଗାଇ ଦିଆଯାଇଥିବା ଯୋଗୁଁ ଦେଶର ସ୍ୱାସ୍ଥ୍ୟ ଭିତ୍ତିଭୂମି ମଧ୍ୟ ଖୁବ ମଜବୁତ ହୋଇଛି। ମାତ୍ର ୦.୨୯ ପ୍ରତିଶତ ରୋଗୀ ଭେଣ୍ଟିଲେଟରରେ ଥିବା ବେଳେ ୧.୯୩ ପ୍ରତିଶତ ଆଇସିୟୁ ଓ ୨.୮୮ ପ୍ରତିଶତ ରୋଗୀ ଅମ୍ଳଜାନ ସହାୟତାରେ ଅଛନ୍ତି। ମୋଟ ୧୫୭୬ଟି ପରୀକ୍ଷାଗାର ଜରିଆରେ ଦେଶରେ ୧୦ ଲକ୍ଷ ନମୁନା ପରୀକ୍ଷଣ ଲକ୍ଷ ପୂରଣ ହୋଇପାରିଛି । କେବଳ ଗତ ୨୪ ଘଣ୍ଟା ମଧ୍ୟରେ ୯ ଲକ୍ଷରୁ ଉର୍ଦ୍ଧ୍ଵ ନମୁନା ପରୀକ୍ଷଣ କରାଯାଇଥିବା ବେଳେ ମୋଟ ପରୀକ୍ଷଣ ସଂଖ୍ୟା ୪ କୋଟି ଅତିକ୍ରମ କରିଛି ବୋଲି ସେ କହିଛନ୍ତି।  ଡଃ ହର୍ଷ ବର୍ଦ୍ଧନ ଜିଓଏମକୁ ଆହୁରି ଜଣାଇଥିଲେ ଯେ, ୩୩୮ ଲକ୍ଷ ଏନ-୯୫ ମାସ୍କ, ପାଖାପାଖି ୧୩୫ ଲକ୍ଷ ପିପିଇ ଓ ପ୍ରାୟ ୨୭ ହଜାର ଭେଣ୍ଟିଲେଟର କେନ୍ଦ୍ର ସରକାର ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ଯୋଗାଇ ଦେଇଛନ୍ତି।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ତାଙ୍କ ମନ୍ତ୍ରଣାଳୟକୁ ସଂସଦ ଓ ବିଧାନସଭା ପାଇଁ କୋଭିଡ ସଂକ୍ରାନ୍ତ ଏସଓପି ଜାରି କରିବା ପାଇଁ ନିର୍ଦ୍ଦେଶ ଦେଇଛନ୍ତି। ଜିଓଏମ ପକ୍ଷରୁ ଆଗକୁ ଆସୁଥିବା ପର୍ବ ପର୍ବାଣୀ ନେଇ ଉଦବେଗ ପ୍ରକାଶ କରାଯିବା ସହ ସମସ୍ତେ ଆବଶ୍ୟକ ସୁରକ୍ଷା ଓ ପ୍ରତିଷେଧକ ବ୍ୟବସ୍ଥା ଗ୍ରହଣ କରିବାକୁ ପରାମର୍ଶ ଦେଇଥିଲେ ।

Image Source : PIB

ଜିଓଏମକୁ ଦେଶର ସର୍ବଶେଷ କୋଭିଡ ସ୍ଥିତି ଉପରେ ମଧ୍ୟ ଅବଗତ କରାଯାଇଥିଲା। ବିଶ୍ଵର ଅନ୍ୟାନ୍ୟ ଦେଶ ତୁଳନାରେ ଦେଶରେ ନିୟୁତ ପିଛା ସର୍ବନିମ୍ନ ସଂକ୍ରମଣ ୨୪୨୪ ଥିବା ବେଳେ ମୃତ୍ୟୁ ସଂଖ୍ୟା ନିୟୁତ ପିଛା ୪୪ ରହିଛି । ତେବେ ବିଶ୍ଵରେ ନିୟୁତ ପିଛା ହାରାହାରି ୩୧୬୧ ସଂକ୍ରମିତ ବ୍ୟକ୍ତି ଥିବା ବେଳେ ମୃତ୍ୟୁ ସଂଖ୍ୟା ୧୦୭.୨ ରହିଛି । ଏଥିରେ ଉଲ୍ଲେଖଯୋଗ୍ୟ ଯେ, ଦେଶରେ କମ ସମ୍ବଳ ଓ ଘନ ଜନସଂଖ୍ୟା ସତ୍ଵେ ସମୟୋଚିତ ଲକଡାଉନ ଓ ସ୍ୱାସ୍ଥ୍ୟ ଭିତ୍ତିଭୂମିର ଦ୍ରୁତ ବିକାଶ ଯୋଗୁଁ ବିଶ୍ଵର ଅନ୍ୟାନ୍ୟ ଦେଶ ତୁଳନାରେ ନିୟୁତ ପିଛା ସଂକ୍ରମଣ ଓ ମୃତ୍ୟୁହାରକୁ କମ କରାଯାଇପାରିଛି । ଦେଶରେ ୮ଟି ରାଜ୍ୟ ମହାରାଷ୍ଟ୍ର, କର୍ଣ୍ଣାଟକ, ଆନ୍ଧ୍ରପ୍ରଦେଶ, ତାମିଲନାଡୁ, ଉତ୍ତର ପ୍ରଦେଶ, ପଶ୍ଚିମବଙ୍ଗ, ଓଡିଶା ଏବଂ ତେଲଙ୍ଗାନାରେ ମୋଟ ସଂକ୍ରମିତଙ୍କ ଶତକଡା ୭୩ ଭାଗ ଅଛନ୍ତି । ଏହାଛଡା ୭ଟି ରାଜ୍ୟ ଯଥା ମହାରାଷ୍ଟ୍ର, ଦିଲ୍ଲୀ, ତାମିଲନାଡୁ, ଆନ୍ଧ୍ରପ୍ରଦେଶ, କର୍ଣ୍ଣାଟକ, ଉତ୍ତର ପ୍ରଦେଶ ଏବଂ ପଶ୍ଚିମବଙ୍ଗରେ ମୋଟ ମୃତ୍ୟୁ ସଂଖ୍ୟାର ଶତକଡା ୮୧ ଭାଗ ଅଛନ୍ତି । ଏହାଛଡା ଜିଓଏମକୁ ଟିବି ଏବଂ କୋଭିଡ ଚିହ୍ନଟ, ମଧୁମେହ ପରିଚାଳନା ଇତ୍ୟାଦି ସମ୍ପର୍କରେ ସୂଚନା ଦିଆଯାଇଥିଲା । ଯେଉଁ ରାଜ୍ୟରେ ମୃତ୍ୟୁହାର ଅଧିକ ଅଛି, ସେଠାରେ ନମୁନା ପରୀକ୍ଷାକୁ ବ୍ୟାପକ କରାଯାଇ ମୃତ୍ୟୁହାର ଶତକଡା ୧ ଭାଗରୁ କମ କରିବା ପାଇଁ ପରାମର୍ଶ କ୍ୟାବିନେଟ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଦିଆଯାଇଛି ବୋଲି ଜିଓଏମକୁ ଅବଗତ କରାଯାଇଥିଲା ।
ଦେଶ ଓ ବିଶ୍ଵରେ କୋଭିଡ ଟିକାର ଅଗ୍ରଗତି ନେଇ ଡଃ ଭି କେ ପଲ ସୂଚନା ଦେଇଥିଲେ। ସେ କହିଥିଲେ ଯେ, ଦୁଇ ଜଣ ଭାରତୀୟଙ୍କ ସମେତ ୨୯ ଜଣ ତୃତୀୟ ପର୍ୟ୍ୟାୟ ପରୀକ୍ଷଣରେ ସାମିଲ ଅଛନ୍ତି। ଭାରତ ବାୟୋଟେକ ଦ୍ଵାରା ପ୍ରସ୍ତୁତ ଟୀକା ଦ୍ଵିତୀୟ ପର୍ୟ୍ୟାୟ ପରୀକ୍ଷଣରେ ରହିଛି । ଅକ୍ସଫୋର୍ଡ ପକ୍ଷରୁ ପ୍ରସ୍ତୁତ ଓ ସିରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ ଦ୍ଵାରା ବିକଶିତ ଟୀକା ମହାରାଷ୍ଟ୍ର ଓ ଅନ୍ୟାନ୍ୟ ରାଜ୍ୟରେ ପରୀକ୍ଷାର ତୃତୀୟ ସ୍ତରରେ ରହିଛି । ଜାତୀୟ ଭେକ୍ସିନ ପ୍ରଶାସନ ପାଇଁ ଗଠିତ ଜାତୀୟ ବିଶେଷଜ୍ଞ ଦଳ ମଧ୍ୟ ଭଲ କାମ କରୁଛି ବୋଲି ଡଃ ପଲ ଜିଓଏମକୁ ସୂଚନା ଦେଇଥିଲେ। ଏହି ଗ୍ରୁପ ଟୀକାର ବିଭିନ୍ନ ପର୍ୟ୍ୟାୟ ପରୀକ୍ଷଣ, ଏଥିପାଇଁ ଏହାର ପରିବଣ୍ଟନ ଓ ହିତାଧିକାରୀ ଚୟନ ତଥା ଟୀକା ବାଛିବା ନେଇ ବୈଜ୍ଞାନିକ ଭିତ୍ତିଭୂମି ସମ୍ପର୍କରେ ସୂଚନା ଦେଇଥିଲେ । ଏହି ବିଶେଷଜ୍ଞ ଦଳର ଏପର୍ୟ୍ୟନ୍ତ ୩ଟି ବୈଠକ ହୋଇଛି ବୋଲି ସେ କହିଥିଲେ ।
ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ବୈଶ୍ଵିକ ମହାମାରୀ କାଳରେ ମାନସିକ ସ୍ଥିତି ନେଇ ମନ୍ତ୍ରଣାଳୟ ନେଉଥିବା ପଦକ୍ଷେପ ସମ୍ପର୍କରେ ସୂଚନା ଦେଇଥିଲେ। ସେ କହିଥିଲେ ଯେ, ଯେଉଁ ରାଜ୍ୟଗୁଡିକରେ କରୋନା ମାମଲା ବୃଦ୍ଧି ପାଉଛି ଓ ମୃତ୍ୟୁହାର ଅଧିକ ହେଉଛି, କେନ୍ଦ୍ର ସରକାର ସେମାନଙ୍କ ସହ ଯୋଗାଯୋଗରେ ଅଛନ୍ତି ।

ଏନସିଡିସିର ନିର୍ଦ୍ଦେଶକ ଡଃ ସୁଜିତ ସିଂ କରୋନା ବୈଶ୍ଵିକ ମହାମାରୀ କାଳରେ ଦିଆଯାଇଥିବା ସମନ୍ଵିତ ରୋଗ ନିରୀକ୍ଷଣ କାର୍ୟ୍ୟକ୍ରମ ସମ୍ପର୍କରେ ଏକ ରିପୋର୍ଟ ପ୍ରଦାନ କରିଥିଲେ । ସେ ବିଭିନ୍ନ ଆହ୍ଵାନର ପ୍ରତିକାର ଓ ରାଜ୍ୟଗୁଡିକର ରଣନୀତି ସମ୍ପର୍କରେ ସୂଚନା ଦେଇଥିଲେ । ଦେଶରେ ମାସ୍କ ପରିଧାନ, ସାମାଜିକ ଦୂରତ୍ଵ ଓ ଶ୍ଵାସକ୍ରିୟା ଜନିତ ନୀତିନିୟମ ପାଳନ ଇତ୍ୟାଦି ନେଇ ବୈଠକରେ ଗୁରୁତ୍ଵାରୋପ କରାଯାଇଥିଲା।

ଏଥିରେ କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଡଃ ଏସ. ଜୟଶଙ୍କର, କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀ, ଜାହାଜ ଚଳାଚଳ ଓ ସାର ଓ ରସାୟନ (ସ୍ଵାଧୀନ ଦାୟିତ୍ଵ) ମନ୍ତ୍ରୀ  ମନସୁଖ ଲାଲ ମାଣ୍ଡଭିୟ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ଶ୍ରୀ ଅଶ୍ୱିନ କୁମାର ଚୌବେ, ଗୃହ ରାଷ୍ଟ୍ରମନ୍ତ୍ରୀ  ନିତ୍ୟାନନ୍ଦ ରାୟ, ନୀତି ଆୟୋଗ ସଦସ୍ୟ (ସ୍ୱାସ୍ଥ୍ୟ) ଡଃ ବିନୋଦ ପଲ ଭର୍ଚୁଆଲ ମାଧ୍ୟମରେ ଯୋଗଦେଇଥିଲେ ।
ବୟାନ ସଚିବ ରବି କାପୁର, ନୀତି ଆୟୋଗର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ଅମିତାଭ କାନ୍ତ, ଆଇସିଏମଆର ମହାନିର୍ଦ୍ଦେଶକ ଡଃ ବଳରାମ ଭାର୍ଗଭ, ଡିଜିଏଫଟି ମହାନିର୍ଦ୍ଦେଶକ ଅମିତ ଯାଦବ, ସ୍ଵରାଷ୍ଟ୍ର ବ୍ୟାପାର ଅତିରିକ୍ତ ସଚିବ ଅନିଲ ମଲିକ, ବୈଦେଶିକ ବ୍ୟାପାର ମନ୍ତ୍ରଣାଳୟ ଅତିରିକ୍ତ ସଚିବ ଡି ରବି ଓ ଅନ୍ୟାନ୍ୟ ବରିଷ୍ଠ ପଦାଧିକାରୀମାନେ ସମ୍ମିଳନୀରେ ଭର୍ଚୁଆଲି ଯୋଗଦେଇଥିଲେ ।

 

Comments are closed.