କରୋନା ଅପଡେଟ୍ : ସଂକ୍ରମିତଙ୍କ ସଂଖ୍ୟା ୮୪କୁ ବୃଦ୍ଧି, ଖୋଲିଲା ୫୨ଟି ପରୀକ୍ଷାଗାର

ନୂଆଦିଲ୍ଲୀ : ଭାରତରେ ଶନିବାର ସୁଦ୍ଧା ୮୪ ଜଣ ବ୍ୟକ୍ତି କରୋନା ଭୂତାଣୁରେ ସଂକ୍ରମିତ ହୋଇଥିବା ନିଶ୍ଚିତ ହୋଇଛି ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ ସ୍ୱତନ୍ତ୍ର ସଚିବ ସଞ୍ଜୀବ କୁମାର କହିଛନ୍ତି। ସେମାନଙ୍କ ମଧ୍ୟରୁ ୧୦ ଜଣ ସମ୍ପୂର୍ଣ୍ଣ ସୁସ୍ଥ ହୋଇ ହସ୍ପିଟାଲ୍‍ରୁ ସେମାନଙ୍କର ନିଜ ନିଜର ଘରକୁ ଫେରିଯାଇଛନ୍ତି।

ସେ କହିଛନ୍ତି, ୪ ହଜାରରୁ ଅଧିକ ଲୋକଙ୍କୁ ଡାକ୍ତରୀ ପର୍ଯ୍ୟବେକ୍ଷଣରେ ରଖାଯାଇଛି। ସେହି ଲୋକମାନେ ଭୂତାଣୁରେ ସଂକ୍ରମିତ ହୋଇଥିବା ଲୋକମାନଙ୍କ ସଂସ୍ପର୍ଶରେ ଆସିଥିଲେ। ସ୍ୱାସ୍ଥ୍ୟ ସଚିବ କହିଛନ୍ତି, ଆଉ କେଉଁ ଲୋକମାନେ ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସିଛନ୍ତି, ତାହା ଜାଣିବାପାଇଁ ଉଦ୍ୟମ ଜାରି ରହିଛି। କରୋନା ଭୂତାଣୁର ମୁକାବିଲା ପାଇଁ ସରକାର ନେଇଥିବା ପଦକ୍ଷେପ ଗୁଡ଼ିକ ବିଷୟରେ ସେ ସାମ୍ବାଦିକମାନଙ୍କୁ ଜଣାଇଛନ୍ତି। ସେ କହିଛନ୍ତି, ଭାରତରେ ଦୁଇ ଜଣ ବ୍ୟକ୍ତିଙ୍କର କରୋନା ଭୂତାଣୁ ସଂକ୍ରମଣ ଯୋଗୁଁ ମୃତ୍ୟୁ ଘଟିଛି। ସେହି ଦୁଇ ଜଣ ବ୍ୟକ୍ତି ଏକାଧିକ ରୋଗରେ ପୀଡ଼ିତ ଥିଲେ। ଶ୍ରୀ କୁମାର କହିଛନ୍ତି, ମହାନ୍‍ ଏୟାର୍‍ ଲାଇନ୍‍ସ ଇରାନ୍‍ରୁ କିଛି ଭାରତୀୟଙ୍କୁ ଆଜି ରାତିରେ ଆଣି ମୁମ୍ବାଇରେ ପହଞ୍ଚାଇବ। ସେହିଭଳି
ଇଟାଲୀରେ ଅଟକି ରହିଥିବା ଭାରତୀୟ ଛାତ୍ରମାନଙ୍କୁ ଆଣିବାପାଇଁ ଏୟାର୍‍ ଇଣ୍ଡିଆର ଏକ ସ୍ୱତନ୍ତ୍ର ବିମାନକୁ ମିଲନ୍‍ ପଠାଯିବ। ସ୍ୱାସ୍ଥ୍ୟ ବିଭାଗ ସ୍ୱତନ୍ତ୍ର ସଚିବ କହିଛନ୍ତି, କରୋନା ଭୂତାଣୁ ସଂକ୍ରମଣର ପରୀକ୍ଷା ପାଇଁ ଦେଶରେ ପରୀକ୍ଷାଗାର ଗୁଡ଼ିକର ସଂଖ୍ୟା ୫୨କୁ ବୃଦ୍ଧି କରାଯାଇଛି।