ଭାରତ-ଚୀନ ସୈନ୍ୟ ଅଧିକାରୀସ୍ତରୀୟ ଆଲୋଚନା ଆରମ୍ଭ

ଲେହ: ବାସ୍ତବିକ ନିୟନ୍ତ୍ରଣ ରେଖା(ଏଲଏସି)ରେ ଉତ୍ତେଜନା ଲାଗି ରହିଥିବାବେଳେ ଭାରତ ଏବଂ ଚୀନ ସେନା ଅଧିକାରୀସ୍ତରୀୟ ବୈଠକ ମଙ୍ଗଳବାର ପୁଣି ଥରେ ଆରମ୍ଭ ହୋଇଛି। ଲେହର ଚୁଶୁଲରେ ଅଧିକାରୀମାନଙ୍କ ମଧ୍ୟରେ ଆଲୋଚନା ଜାରି ରହିଛି। ଦୁଇ ଦେଶର ସୈନ୍ୟଙ୍କୁ ପଛକୁ ହଟାଇବା ପ୍ରସଙ୍ଗରେ ବୈଠକରେ ଆଲୋଚନା ହେବ ବୋଲି ବିଶେଷ ସୂତ୍ରରୁ ସୂଚନା ମିଳିଛି।

ଆଲୋଚନାରେ ଭାରତ ପକ୍ଷରୁ ୧୪ତମ କୋର କମାଣ୍ଡର ଲ୍ୟୁଟନାଣ୍ଟ ଜେନେରାଲ ହରିନ୍ଦର ସିଂହ ପ୍ରତିନିଧିତ୍ଵ କରୁଛନ୍ତି। ଚୀନ ପକ୍ଷରୁ ମେଜର ଜେନେରାଲ ଲିନ୍‌ ଲିଉ ଉପସ୍ଥିତ ଅଛନ୍ତି। ଚଳିତ ମାସରେ ଦୁଇ ଦେଶ ମଧ୍ୟରେ ସୈନ୍ୟ ଅଧିକାରୀସ୍ତରରେ ଏହା ୩ୟ ଆଲୋଚନା। ଏହା ପୂର୍ବରୁ ଜୁନ ୬ ଏବଂ ୨୨ ତାରିଖରେ ଆଲୋଚନା ହୋଇଥିଲା। ତେବେ ଜୁନ ୧୫ରେ ଗଲୱାନ ଘାଟିରେ ହୋଇଥିବା ସଂଘର୍ଷ ପରେ ଏହା ୨ୟ ବୈଠକ। ପୂର୍ବର ୨ ବୈଠକ ଚୀନର ମୋଲ୍‌ଡୋରେ ଅନୁଷ୍ଠିତ ହୋଇଥିଲା। କିନ୍ତୁ ଏହି ବୈଠକ ଭାରତୀୟ କ୍ଷେତ୍ର ଚୁଶୁଲରେ ବସିଛି।

ସୂଚନା ଯେ, ପେନଗୋଙ୍ଗରେ ୨/୩ କିଲୋମିଟର ପଛକୁ ହଟିବା ଲାଗି ଭାରତ ସହମତ ହୋଇନାହିଁ। ଅର୍ଥାତ ଫିଙ୍ଗର ୪ରୁ ଭାରତୀୟ ସେନା ପଛକୁ ହଟିବ ନାହିଁ। କାରଣ ଏହି ଅଂଶ ସର୍ବଦା ଭାରତର ନିୟନ୍ତ୍ରଣରେ ରହିଆସିଛି। ଭାରତ ଫିଙ୍ଗର ୮କୁ ଏଲଏସି ବୋଲି ଦାବି କରିଛି। ଅନ୍ୟପଟେ ଗଲୱାନରେ ଚୀନ ୨/୩ କିଲୋମିଟର ପଛକୁ ଯିବାକୁ ସହମତ ହେଉନାହିଁ। ଗତ ବୈଠକରେ ଚୀନ କହିଥିଲା ଯେ, ସେ ଏବେ ବି ନିଜର ଦାବି ଅଞ୍ଚଳରୁ ୮୦୦ ମିଟର ପଛରେ ରହିଛି। ଆଜିର ବୈଠକରେ ଗଲୱାନ ଘାଟିରୁ ଚୀନ ସୈନ୍ୟ ପଛକୁ ହଟିବା ନେଇ ମଧ୍ୟ ଆଲୋଚନା ହୋଇପାରେ। ଏହା ସହିତ ଡେପସାଙ୍ଗ ଏବଂ ଡେମଚୋକରେ ଜାରି ବିବାଦ ଉପରେ ବି ଆଲୋଚନା ହେବାର ସମ୍ଭାବନା ରହିଛି।

Comments
Loading...