କରୋନା : ବିଶ୍ଵର ସପ୍ତମ ସ୍ଥାନରେ ଭାରତ, ଗୋଟିଏ ସପ୍ତାହରେ ୫୦ ହଜାର ନୂଆ ସଂକ୍ରମିତ ଚିହ୍ନଟ

ନୂଆଦିଲ୍ଲୀ : ଭାରତରେ ମହାମାରୀ କରୋନାର ପ୍ରକୋପ ହୁ ହୁ ହୋଇ ବଢିବାରେ ଲାଗିଛି । ବିଶ୍ଵର କରୋନା ସଂକ୍ରମିତ ଦେଶ ତାଲିକାରେ ଦଶମ ସ୍ଥାନରେ ଥିବା ଭାରତ ବର୍ତ୍ତମାନ ବିଶ୍ଵର ସପ୍ତମ ସ୍ଥାନରେ ପହଞ୍ଚିଛି । ଦଶମ ସ୍ଥାନରେ ଥିବା ଭାରତକୁ ସପ୍ତମ ସ୍ଥାନରେ ପହଞ୍ଚିବା ପାଇଁ ମାତ୍ର ଗୋଟିଏ ସପ୍ତାହ ଲାଗିଛି । ଏହି ଏକ ସପ୍ତାହ ମଧ୍ୟରେ ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ପ୍ରାୟ ୫୦ ହଜାର ବୃଦ୍ଧି ପାଇଛି ।

ମେ ୨୫ ରେ ଭାରତ ଇରାନକୁ ଅତିକ୍ରମ କରି କରୋନା ମହାମାରୀ ଦ୍ୱାରା ପ୍ରଭାବିତ ବିଶ୍ୱର ଦଶମ ଦେଶ ହୋଇଥିଲା । ସେହି ସମୟରେ ଦେଶରେ ୧ଲକ୍ଷ ୩୮ ହଜାର କରୋନା  ମାମଲା ଥିଲା । ରବିବାର ଏହି ସଂଖ୍ୟା ୧ଲକ୍ଷ ୮୨ ହଜାରରେ ପହଞ୍ଚିଥିଲା ଏବଂ ସୋମବାର ଭାରତରେ ଏହି ସଂଖ୍ୟା ୧ଲକ୍ଷ ୯୦ ହଜାର ଟପିଛି । ତେବେ ବର୍ତ୍ତମାନ ସୁଦ୍ଧା ଭାରତ ଆମେରିକାଠାରୁ ବହୁ ଦୂରରେ ରହିଛି । ଆମେରିକା କରୋନା ଭୂତାଣୁ ଦ୍ୱାରା ଅଧିକ ପ୍ରଭାବିତ ଦେଶ ତାଲିକାରେ ପ୍ରଥମ ସ୍ଥାନରେ ରହିଛି ।

ଯୁକ୍ତରାଷ୍ଟ୍ର ଆମେରିକାରେ ବର୍ତ୍ତମାନ ୧୮ ଲକ୍ଷରୁ ଅଧିକ ମାମଲା ରହିଛି। ଏଥି ସହିତ ପାଞ୍ଚ ଲକ୍ଷ ମାମଲା ସହିତ ବ୍ରାଜିଲ ଦ୍ୱିତୀୟ ସ୍ଥାନରେ ରହିଛି। ଋଷିଆ ତୃତୀୟ ସ୍ଥାନରେ ଅଛି ଯେଉଁଠାରେ ତିନି ଲକ୍ଷ କରୋନା ମାମଲା ରୁଜୁ ହୋଇଛି। ରବିବାର ଦିନ ରେଡିଓ କାର୍ଯ୍ୟକ୍ରମ ମନ କି ବାତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ବହୁଳ ଜନସଂଖ୍ୟା ସତ୍ତେ ଭାରତ ଅନ୍ୟ ଦେଶ ପରି କରୋନାରେ ଅଧିକ ପ୍ରଭାବିତ ହୋଇନାହିଁ।

ସେ କହିଛନ୍ତି ଯେ ଚାରି ପର୍ଯ୍ୟାୟ ଲକଡାଉନ୍ ଲାଗୁ କରିବା ପରେ ସରକାର ବର୍ତ୍ତମାନ ଅର୍ଥନୀତି ଖୋଲୁଛନ୍ତି କିନ୍ତୁ ଲୋକମାନେ ସତର୍କ ରହିବା ଆବଶ୍ୟକ। ଭାରତରେ ରୋଗୀଙ୍କ ଆରୋଗ୍ୟ ହାର ମଧ୍ୟ ବୃଦ୍ଧି ପାଇଛି। ଗତ ସପ୍ତାହରେ ଏହି ହାର 42 ପ୍ରତିଶତ ଥିଲା, ଯାହା ବର୍ତ୍ତମାନ 47 ପ୍ରତିଶତକୁ ବୃଦ୍ଧି ପାଇଛି।

ଏଥି ସହିତ ଜୁନ୍ ୧ ତାରିଖ ସକାଳ ୮ଟା ସୁଦ୍ଧା ସମଗ୍ର ଦେଶରେ ୧ ଲକ୍ଷ୯୦ ହଜାର ୫୩୫ ଜଣ କରୋନା ଭାଇରସ୍ ଦ୍ୱାରା ଆକ୍ରାନ୍ତ ହୋଇଥିବା କଥା କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ତରଫରୁ ସୂଚନା ଦିଆଯାଇଛି । ଆକ୍ରାନ୍ତଙ୍କ ମଧ୍ୟରୁ ୮୬୯୮୩ ଜଣ ସୁସ୍ଥ ହୋଇଛନ୍ତି ଏବଂ ୫ ହଜାର ୩୯୪ ଜଣ ଆକ୍ରାନ୍ତ ବ୍ୟକ୍ତିଙ୍କର ମୃତ୍ୟୁ ଘଟିଛି । ସେହିପରି ବର୍ତ୍ତମାନ ସୁଦ୍ଧା ସକ୍ରିୟ ଆକ୍ରାନ୍ତଙ୍କ ସଂଖ୍ୟା ୯୩୩୨୨ ରହିଛି।