ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଶାନ୍ତି, ସ୍ଥିରତା ଓ ସମୃଦ୍ଧି ଲାଗି ଭାରତ, ଅଷ୍ଟ୍ରେଲିଆ, ଜାପାନ ଓ ଆମେରିକା ପ୍ରତିଶ୍ରୁତିବଦ୍ଧ
ବ୍ୟାଙ୍କକ୍ : ମୂଲ୍ୟବୋଧ ଓ ନୀତି ଆଦାନ ପ୍ରଦାନ ଭିତ୍ତିରେ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଅବାଧ, ମୁକ୍ତ, ସମୃଦ୍ଧ ଏବଂ ସମଷ୍ଟିଗତ ପ୍ରତିବଦ୍ଧତା ପାଇଁ ଭାରତ, ଅଷ୍ଟ୍ରେଲିଆ, ଜାପାନ ଓ ଯୁକ୍ତରାଷ୍ଟ୍ର ଆମେରିକା ସେମାନଙ୍କର ପ୍ରତିଶ୍ରୁତିବଦ୍ଧତାକୁ ଦୋହରାଇଛନ୍ତି। ବୈଦେଶିକ ମନ୍ତ୍ରଣାଳୟ ପକ୍ଷରୁ ଜାରି ଏକ ଇସ୍ତାହାରରେ କୁହାଯାଇଛି ଏହି ଚାରୋଟିଯାକ ଦେଶର ବରିଷ୍ଠ ଅଧିକାରୀମାନେ ଶୁକ୍ରବାର ଥାଇଲ୍ୟାଣ୍ଡର ବ୍ୟାଙ୍କକ୍ଠାରେ ଏକାଠି ହୋଇ ସାଧାରଣ ସ୍ୱାର୍ଥରକ୍ଷା ପାଇଁ ଆଞ୍ଚଳିକ ଓ ବିଶ୍ୱସ୍ତରୀୟ ପ୍ରସଙ୍ଗଗୁଡ଼ିକ ଉପରେ ଆଲୋଚନା କରିଥିଲେ।
ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳର ଆଞ୍ଚଳିକ ଢାଞ୍ଚା ସୁରକ୍ଷା ଲାଗି ଆସିଆନ୍ ଦେଶଗୁଡ଼ିକ ପ୍ରତି କୈନ୍ଦ୍ରିକତା ଓ ଆସିଆନ୍ ନେତୃତ୍ୱ ବ୍ୟବସ୍ଥା ପ୍ରତି ଏହି ଦେଶଗୁଡ଼ିକ ଦୃଢ଼ ସମର୍ଥନ ଜଣାଇଛନ୍ତି । ଏହି ଇସ୍ତାହାରରେ କୁହାଯାଇଛି, ଗମନାଗମନ କ୍ଷେତ୍ରରେ ସଂଯୋଗ ବ୍ୟବସ୍ଥା, ମୌଳିକ ଢାଞ୍ଚାର ବିକାଶ, ଆଞ୍ଚଳିକ ନିରାପତ୍ତା, ଆତଙ୍କବାଦ ଦମନ, ସାମୁଦ୍ରିକ ସହଯୋଗ ଓ ସାଇବର୍ ନିରାପତ୍ତା ସଂକ୍ରାନ୍ତରେ ସହଯୋଗ ଉପରେ ମଧ୍ୟ ସେମାନେ ଆଲୋଚନା କରିଛନ୍ତି। ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଶାନ୍ତି, ସ୍ଥିରତା ଓ ସମୃଦ୍ଧି ଲାଗି ଏହିସବୁ ପ୍ରସଙ୍ଗଗୁଡ଼ିକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ
ବୋଲି ସେମାନେ ମତବ୍ୟକ୍ତ କରିଛନ୍ତି ।
Comments are closed.