ନୂଆଦିଲ୍ଲୀ . – ଦେଶର ପ୍ରତିରକ୍ଷା ପାଇଁ ଏବେ ଏକ ଭଲ ଖବର । ପ୍ରାୟ ୩ ଦଶକ ପରେ ଭାରତୀୟ ସେନାରେ ଦୁଇଟି ନୂଆ ତୋପ ସାମିଲ ହେବାକୁ ଯାଉଛି । ନଭେମ୍ବର ୯ ତାରିଖରେ ମହାରାଷ୍ଟ୍ରରେ ଦେବଲାଲୀରେ ଆୟୋଜିତ ହେବାକୁ ଥିବା ସେନାର ଏକ ସମାରୋହରେ ପ୍ରତିରକ୍ଷା ମନ୍ତ୍ରୀ ନିର୍ମାଳା ସୀତାରମଣ ଓ ସେନା ମୁଖ୍ୟ ବିପିନ ରାଓ୍ୱତଙ୍କ ଉପସ୍ଥିତିରେ ଭାରତୀୟ ସେନାରେ ଏମ୍ ୭୭୭ ଓ କେ-୯ ବ୍ରଜ ତୋପ ସାମିଲ ହେବ ।
ଆମେରିକାରେ କମ୍ ଓଜନ ବିଶିଷ୍ଟ ଏମ୍ ୭୭୭ ହେବିଟ୍ୱେଜର୍ ତୋପ ନିର୍ମାଣ କରାଯାଇଛି । ଏହି ହାଲୁକା ତୋପ ଭାରତ ଓ ଚୀନ ସୀମାରେ ମୁତୟନ ଥିବା ସୈନିକମାନଙ୍କୁ ପ୍ରଦାନ କରାଯିବ ।
କେ-୯ ବ୍ରଜ ୧୫ ଏମ୍ଏମ୍/୫୩ କେଲିବର ବିଶିଷ୍ଟ ତୋପ । ଏହାକୁ ଦକ୍ଷିଣ କୋରିଆରେ ବିକଶିତ କରାଯାଇଛି । ଭାରତୀୟ ସେନାକୁ ପ୍ରଥମ ପର୍ଯ୍ୟାୟରେ ୧୦୦ଟି ତୋପ ପ୍ରଦାନ କରାଯାଉଛି । ଦକ୍ଷିଣ କୋରିଆର ଏହି କମ୍ପାନୀ ମେକ୍ ଇନ୍ ଇଣ୍ଡିଆ ପ୍ରକଳ୍ପରେ ସାମିଲ ହୋଇ ଭାରତରେ ଏହି ତୋପର ଉତ୍ପାଦନ ଆରମ୍ଭ କରୁଛି । ଆସନ୍ତା ବର୍ଷ ନଭେମ୍ବର ମାସରୁ ଭାରତରେ ଏହି ତୋପର ନିର୍ମାଣ ଆରମ୍ଭ ହେବ ।
ଭାରତୀୟସେନାରେ ଏବେ ୪୦୦ରୁ ଅଧିକ ତୋପର ଆବଶ୍ୟକତା ରହିଛି । ଆଧୁନିକ ତୋପ ସାମିଲ ହେଲେ ସେନାର କ୍ଷମତା ବୃଦ୍ଧି ପାଇବ ।
ମେ ୨୦୧୮ ମସିହାରେ ଧନୁଷ ୧୫୫/୪୫ କେଲିବର ତୋପର ପରୀକ୍ଷଣ ପୋଖରାନ୍ରେ ହୋଇଥିଲା । ଏବେ ଭାରତର ଗୋଳାବାରୁଦ ଫାକ୍ଟ୍ରିରେ ଏହାକୁ ନିର୍ମାଣ କରାଯିବା ପାଇଁ ନିର୍ଦେଶ ଦିଆଯାଇଛି।